د لاسرسۍ وړ لېنکونه

تازه خبر
یکشنبه ۶ کب ۱۴۰۲ کابل ۱۲:۴۹

طالبانو له ترهګرو سره د اړیکو درلودو په تړاو د امنیت شورا راپور رد کړ


د افغانستان په اړه د ملګرو ملتونو د امنیت شورا د یوې مخکینۍ غونډې انځور
د افغانستان په اړه د ملګرو ملتونو د امنیت شورا د یوې مخکینۍ غونډې انځور

په داسې حال کې چې د طالبانو حکومت په افغانستان کې د ترهګرو ډلو د فعالیت او نورو هېوادونو ته یې د ګواښ په اړه د ملګرو ملتونو د امنیت شورا راپور ناسم بولي، د افغانستان د ژغورنې لپاره د مقاومت ملي شورا ادعا کوي چې طالبان غواړي د افغانستان شمال د ترهګرو پر ځاله بدل کړي.

د طالبانو حکومت د ملګرو ملتونو سازمان امنیت شورا د بندیزونو د څارنې او څېړنې کمېټې هغه راپور نه مني، چې په‌کې د القاعده او پاکستاني طالبانو په ګډون ترهګرو ډلو سره د دوی د اړیکو دوام ښيي.

د طالبانو حکومت نن یکشنبه په یوه اعلامیه کې چې رسنیو ته یې استولې د امنیت شورا راپور یو اړخیز، نامتوازن او له واقعیته لېرې بللی.

د طالبانو بیرغ
د طالبانو بیرغ

په دې اعلامیه کې د طالبانو د مشرانو ترمنځ اختلاف، په افغانستان کې د ترهګرو ډلو شتون فعالیت او ازادي، د نشه‌يي توکو په تولید او قاچاق کې د طالب مشرانو لاس لرل، د صلاحیتونو انحصار او په حکومت کې د ټولو قومونو نه‌شتون او نور، بې‌بنیاده او بې‌اساسه تلبیغات بلل شوي دي.

د طالبانو حکومت په دغه اعلامیه کې په خپلې پخوانۍ خبرې یوځل بیا ټینګار کړی، چې د افغانستان خاوره به د هېڅ هېواد په ضد ونه کارول شي.

طالبان داسې مهال د ملګرو ملتونو سازمان د امنیت شورا د بندیزونو د څارنې او څېړنې کمېټې په راپور کې دا خبره، چې طالبانو د القاعده او یو شمېر نورو ترهګرو ډلو سره خپلې اړیکې نه‌دي پرې کړي ردوي، چې امریکا د تېر زېږدیز کال د جولای په ۳۱ د کابل ښار په شېرپور سیمه کې د القاعده ډلې مشر ایمن‌الظواهري د بې‌پیلوټه الوتکې په یو برید کې په نښه او وواژه.

په ورته وخت کې، تازه د افغانستان د ژغورنې لپاره د مقاومت ملي شورا ادعا کړې چې طالبان غواړي د افغانستان شمال د ترهګرو په ځاله بدل کړي.

دا شورا چې له افغانستانه د باندې فعالیت کوي تېره شپه يې په یوه اعلامیه کې تور لګولی چې طالبانو حکومت غواړي د پاکستاني کډوالو په نوم د پاکستاني طالبانو تحریک وسله‌وال د افغانستان په شمال کې ځای پر ځای کړي.

اعلامیه کې د دې چارې د ناوړه پایلو په اړه خبرداری ورکړل شوی او راغلي، دا کار به افغانستان په کور دننه او نړیواله کچه له سخت ناورین او ان د تجزیې له ګواښ سره مخ کړي.

مخکې تر دې د طالبانو د مخالفې جبهې، د ملي مقاومت جبهې د بهرني اړیکو مشر علي میثم نظري هم ورته ادعا کړې وه، خو په دې اړه نوموړي او د افغانستان د ژغورنې لپاره د مقاومت ملي شورا کوم اسناد نه دي وړاندې کړي.

دا ادعا کوم خپلواک بنسټ هم نه ده تایید کړې.

د افغانستان د ژغورنې لپاره د مقاومت ملي شورا دا هم ویلي چې افغانستان اوسمهال د نړیوالې ترهګرۍ د خپرېدو په مرکز بدل شوی دی.

د تحریک طالبان پاکستان یا ټي ټي پي وسله وال
د تحریک طالبان پاکستان یا ټي ټي پي وسله وال

د ملګرو ملتونو امنیت شورا د بندیزونو د څارنې او څېړنې کمېټې هم د جون په ۵مه خپل ۱۴م راپور کې لیکلي، داسې نښې نښانې شته چې ښيي القاعده خپله عملیاتي وړتیا بیا رغوي، ټي ټي پي یا تحریک طالبان پاکستان د طالبانو په ملاتړ په پاکستان کې بریدونه کوي، بهرنیو ترهګرو ډلو د افغانستان په پولو کې ګواښ رامنځ‌‌ته کړی دی او تر خوا یې د داعش بریدونه زیات او پېچلي شوي دي.

دوه اوونۍ د پاکستان د کورنیو چارو وزیر رانا ثناالله امریکا غږ اردو څانګې ته ویلي وو، د طالبانو حکومت دوی ته ویلي چې له ډیورنډ کرښې به پاکستاني طالبان لېرې او د افغانستان نورو سیمو ته ولېږدوي.

خو د نوموړي تر دې څرګندونو وروسته د طالبانو ویاند ذبیح‌الله مجاهد ازادي راډیو ته وویل، دوی پلان لري چې د خوست په ګډون په یو شمېر سرحدي ولایتونو کې ډیورنډ کرښې ته څېرمه مېشت پاکستاني کډوال د افغانستان نورو سیمو ته انتقال کړي.

نوموړي دا نه وو ویلي، چې یاد کډوال به کومو ولایتونو ته انتقال شي، خو دا خبره یې کړې وه، چې دوی دغه کار د پاکستاني لوري د اندېښنو د راکمولو او د ادعاوو د مخنیوی لپاره کوي.

په همدې حال کې د افغانستان لپاره د پاکستان نوی ټاکل شوی ځانګړی استازی اصف درانی وايي، د طالبانو له حکومت سره د پاکستان اړیکې ښې دي، خو له ترهګرۍ سره د مبارزې په مسئله کې به ورسره جوړجاړی ونه‌کړي.

هغه پرون له یوه خصوصي یوټيوب چینل سره مرکه کې دا خبره کړې ده.

واک ته د طالبانو له بیا ځلي رسېدو وروسته، پاکستان په ځلونو دا ادعا کړې چې پاکستاني طالبان د افغانستان له خاورې پر پاکستان کې بریدونه کوي او د پاکستاني طالبانو مشران په افغانستان کې مېشت دي.

خو طالبانو یې دا تورونه رد کړي دي.

اړوند مطالب

XS
SM
MD
LG