د افغانستان ګاونډیو هېوادونو یوځل بیا په افغانستان کې د ترهګرۍ په اړه اندېښنه وښوده.
په ملګرو ملتونو کې د پاکستان او ایران دایمي استازو د ياد سازمان د امنیت شورا په غونډه کې چې د جمعې په ورځ د جون په ٢١مه ترسره شوه په افغانستان کې د ترهګریزو ډلو د فعالیت او حضور په اړه اندېښنه وښوده.
په ملګرو ملتونو کې د پاکستان دایمي استازي منير اکرم په دې غونډه کې ادعا کړې چې د القاعده، ټيټيپي او اسلامي دولت یا داعش خراسان څانګې په ګډون یو شمېر نورې ترهګريزې ډلې په افغانستان کې حضور لري چې د افغانستان اوسنی حکومت یې باید پر وړاندې اغېزمن او دوامداره اقدامات ترسره کړي.
د ملګرو ملتونو د امنیت شورا په غونډه کې د منير اکرم د څرګندونو یوه برخه چې د ياد سازمان په ویبپاڼه خپره شوې ده.
هغه ویلي: "هغه تروریستي ډلې، چي په افغانستان کی د دولت له معافیت څخه ګټه اخلي، داسی ښکاري چې د افغانستان ټولو ګاونډیو هېوادونو او نړیوالې ټولنې ته مستقیم ګواښ دي. په پای کې دغه ترهګریزي ډلې د افغانستان موقت حکومت او د هغوی د اقتصادي او ټولنیزې پرمختیا اهدافو ته به هم یو لوی ګواښ وي."
منیر اکرم دغه شان د ملګرو ملتونو له امنیت شورا څخه غوښتي چې د افغانستان په اوسني حکومت دې غږ وکړي څو له ټيټيپي او همکارانو سره یې اړیکې پرې کړي، د پولې هاخوا د هغوی د بریدونو مخنیوی وکړي، د ټيټيپي ترهګر بې وسلې کړي او مشرتابه یې ونیسي او پاکستان ته یې وسپاري.
هممهاله په ملګرو ملتونو کې د ایران دایمي استازي سعید ایرواني د امنیت شورا په غونډه کې د افغانستان په اړه د د تماس سیمهییزې ډلې دویمې غونډې ته په اشارې سره چې د جون په اتمه ترسره شوه وویل، د سیمې هېوادونه له افغانستانه د ترهګریزو ګواښونو په اړه اندېښمن دي او دا د مسوولو چارواکو مسوولیت دی چې له ترهګرۍ سره مبارزه وکړي.
نوموړي زیاته کړه: "ایران په افغانستان کې د افراطیت، ترهګرۍ او وروسته پاتېوالي د حل کولو ملاتړ کوي او چمتو دی چې د دې بیارغونې لپاره فعاله برخه واخلي."
دا په داسې حال کې دی چې تر دې مخکې هم ګاونډیو او د سیمې هېوادونو په وار وار له افغانستانه د احتمالي ترهګریز ګواښونو په اړه اندېښنه څرګنده کړې ده.
د ګاونډیو هېوادونو د اندېښنو په اړه د طالبانو حکومت ویاند ذبیحالله مجاهد وپوښتل شو، خو هغه په دې اړه پوښتنې ځواب نه کړې.
خو تر دې مخکې د طالبانو حکومت بېلابېلو چارواکو ویلي چې د داعش په ګډون ترهګریزي ډلې یې په افغانستان کې ځپلي او د افغانستان خاوره به د هېڅ هېواد پر ضد ونه کارول شي.
