د نړۍ مطبوعاتو کې د افغانستان مسایلو ته کتنه
ګارډین:
د بریتانیا چاپ ګارډین ورځپاڼې په افغانستان کې د طالبانو له خوا د درېیو برتانوي وګړو د نیول کېدو په اړه مقاله خپره کړې ده.
د ورځپاڼې په لیکنه په دغو کسانو کې د کیوین کارنویل په نوم یو ۵۳ کلن خیریه طبیب هم شامل دی چې د طالبانو له خوا توقیف شوی دی.
بل برتانوی وګړی چې نوم یې نه دی اخیستل شوی، په کابل کې د خیریه کارکوونکو لپاره د یوه هوټل د مدیریت مسوولیت درلود، چې له جنورۍ میاشتې راهیسې په توقیف کې دی.
د ګارډین په لیکنه، درېیم برتانوی ۲۳ کلن مایلز روتلیچ نومېږي چې افغانستان ته په رخصتۍ تللی و او پر افغانستان د طالبانو د ولکې له ټینګولو وروسته د تخلیې پر مهال د برتانوي ځواکونو له خوا ایستل شوی و، خو بیا یې افغانستان ته سفر کړی و.
د بریتانیا د بهرنیو چارو وزارت تایید کړه چې هڅه کوي له دغو برتانوي وګړو سره قنسولي تماس ټینګ کړي او په خبره یې د دغو توقیف شویو برتانوي وګړو د کورنیو ملاتړ کوي.
د ګارډین ورځپاڼې په لیکنه، یوې سرچینې ویلي چې د بریتانیا حکومت له طالبانو سره د مذاکرو لپاره پر بېلابېلو لومړیتوبونو غور کوي.
د ګارډین په لیکنه کې د 'مېل اون سنډې' ورځپاڼې په وینا ویل شوي چې خیریه طبیب کارنویل د طالبانو د استخباراتو له خوا د جنورۍ میاشتې پر ۱۱مه ونیول شو.
د لیکنې په وینا د طالبانو اجنټانو لومړی دی د دریا ولیج هوټل په یوه کوټه کې د وسلې په ساتلو تورن کړ. د همدې چاپې پر مهال د دې هوټل برتانوی مدیر هم ونیول شو.
د هغه کورنۍ ویلي چې طالبانو ده ته د یوې وسلې د ګرځولو جواز ورکړی و او په افغانستان کې یې د یوه طبیب په توګه ځايي اوسېدونکو ته طبي خدمات وړاندې کول.
ریلیف ویب:
د ملګرو ملتونو د بشري مرستو د همغږۍ ادارې یا اوچا ویبسایټ ریلیف ویب په افغانستان کې د ګرځنده روغتیايي کارکوونکو په باب مفصله لیکنه خپره کړې ده.
د لیکنې په پیل کې په پکتیا کې د بدرۍ په نوم د یوې ۷۰ کلنې مېرمنې په باب تفصیلات لیکل شوي چې له خپلې امیندوارې لور او نږور سره یوه ګرځنده روغتیايي ټیم ته ورغلي چې روغتیايي مشورې ورکړل شي.
د لیکنې په وینا، د افغانستان په لیرې پرتو سیمو کې خلکو ته په اسانۍ روغتیايي خدمات نه رسېږي، خو ګرځنده روغتیايي ډلې په اوونۍ کې یوه ورځ یعنې هره سې شنبه د سهار له اتو د مازیګر تر څلورو بجو د پکتیا د مرکز ګردېز د شین کلي په یوه جومات کې خلکو ته روغتیايي خدمات وړاندې کوي.
ملګرو ملتونو په وار وار خبرداری ورکړی چې پر افغانستان د طالبانو د ولکې له بیا ټینګولو وروسته د افغانستان روغتیايي نظام له ګډوډۍ سره مخامخ شوی دی.
د ریلیف ویب په لیکنه کې راغلي، د ملګرو ملتونو له ملاتړه برخمن ګرځنده روغتیايي ټیمونه د ننګرهار، کونړ، پکتیا او غزني په ۱۷۰ کلیو کې خلکو ته روغتیايي خدمات وړاندې کوي.
د ریلیف ویب په لیکنه کې د افغانستان لپاره دغه ګرځنده روغتیايي ټیمونه مهم بلل شوي چې دا مهال په کې ۱۷ میلیونه او شپږلکه وګړي روغتیايي مرستو ته اړتیا لري.
