اوټلوک:
د هند اوټلوک مجلې د ملګرو ملتونو د امنیت شورا د بندیزونو د تحلیل او څار کمېټې پر تازه راپور لیکنه خپره کړې چې وايي، طالبان له القاعده شبکې سره قوي اړیکې لري.
دغې کمېټې په خپل راپور کې چې د جون پر پنځمه د امنیت شورا پر ویبپاڼه خپور شو ویلي، د تحریک طالبان پاکستان یا ټي ټي پي او القاعده سره د افغانستان د طالبانو اړیکې هغسې پیاوړې پاتې دي.
اوټلوک د امنیت شورا د بندیزونو د تحلیل او څار کمېټې د راپور په حواله لیکي، چې د طالبانو تر ولکې لاندې سیمو کې د ترهګرو ازادانه تګ راتګ په سیمه کې د ترهګرۍ خطر زیات کړی دی.
د طالبانو حکومت پرون یکشنبه د ملګرو ملتونو دغه راپور یوجانبه او غیرمتوازن وباله. د طالبانو ویاند ذبیح اله مجاهد په هغه اعلامیه کې چې رسنیو ته لېږل شوې ویلي، د امنیت شورا د بندیزونو دوام او دا ډول راپورونه له تعصب ډک دي، چې د استقلال او د نه لاسوهنې له اصولو سره په ټکر کې دي.
طالبانو ویاند ویلي، د دوی حکومت ډاډ ورکوي، چې له افغانستانه به ګاونډیو هېوادونو، سیمې او نړۍ ته هېڅ خطر نه وي او د طالبانو حکومت چا ته اجازه نه ورکوي، چې د افغانستان له خاورې د نورو پر خلاف کار واخیستل شي. د طالبانو ویاند د دوی د مشرانو ترمنځ د اختلافاتو موجودیت هم رد کړی دی.
د اوټلوک مجلې په لیکنه، د تحریک طالبان پاکستان یا ټي ټي پي چې په پاکستان کې یو ممنوعه سازمان دی، د پاکستان د دولت په وړاندې خونړي بریدونه کړي دي.
د مقالې لیکوال په جنورۍ میاشت کې د پېښور پر یوه جومات حملې ته اشاره کړې او د پاکستاني طالبانو کار یې بللی، چې په نتیجه کې یې لږ تر لږه ۱۰۰ کسان ووژل شول او شاوخوا ۲۰۰ نور ټپیان شول، چې ډېری یې پولیس وو.
مېل انلاین:
د بریتانیا انټرنېټي خپرونې مېل انلاین پرون په پاکستان کې ډیورنډ کرښې ته څېرمه د حملو پر زیاتېدو لیکنه خپره کړې ده.
د لیکنې په پیل کې د اسوشېټېډپرېس اژانس په حواله راغلي، چې د پاکستان پوځ پرون یکشنبه ویلي، تازه حمله په خیبرپښتونخوا کې پر یوه امنیتي پوسته شوې چې درې سرتېري او درې افراطي وسلهوال یې په نتیجه کې ووژل شول.
د خپرونې په وینا، د پاکستان پوځ په یوه اعلامیه کې ویلي، په دې حمله کې چې شنبه ناوخته د شمالي وزیرستان په مرکز میرانشاه کې شوې، څلور وسلهوال ټپیان شوي هم دي.
مېل انلاین زیاتوي، د پاکستان پوځ تر دې حملې وروسته په دې حمله کې د دخیلو کسانو د موندنې لپاره د پلټنې عملیات پیل کړي دي.
په لیکنه کې راغلي، تحریک طالبان پاکستان یا ټي ټي پي لا هم د افغان طالبانو چې د ۲۰۲۱م کال د اګست میاشتې په نیمايي کې پر افغانستان بیا ولکه ټینګه کړه، یوه متحده ډله ګڼل کېږي.
د ملګرو ملتونو امنیت شورا د بندیزونو د څار او څېړنې کمېټې نوی راپور وايي، طالبان له القاعده او د تحریک طالبان پاکستان یا TTP سره پیاوړې اړیکې لري.
د پاکستان د سولې د مطالعاتو انسټېټوټ وايي، په افغانستان کې د طالبانو د واکمنۍ له راتګ وروسته په پاکستان کې ترهګریز بریدونه زیات شوي دي.