په افغانستان کې د طالبانو حکومت وايي، د دوحې په ناسته کې د تفاهم او د ستونزو د حل په هدف برخه اخلي او ټول هېوادونه له افغانستان سره مثبت تعامل ته رابولي.
د طالبانو حکومت وايي، د دوحې په درېیمه ناسته کې د دوی ګډون له هېڅ لوري سره د دښمنۍ په مانا نه دی، بلکې دوی غواړي له ټولو اړخونو سره مثبت تعامل رامنځته کړي.
د طالبانو د حکومت ویاند او د دوحې په درېیمه ناسته کې د طالبانو د شپږ کسیز ګډون کوونکي پلاوی مشر ذبیحالله مجاهد نن په یو خبري کنفراس کې وویل چې دوی ناستې ته بشپړ چمتووالي سره روان دي.
نوموړي وویل چې د دوحې په ناسته کې پرېکړې نه کېږي، بلکې دوی یوازې پیغامونه انتقالوي.
ذبیحالله مجاهد په کنفرانس کې دا هم وویل چې د دوحې په ناسته کې دوی د تفاهم او د ستونزو د حل په هدف برخه اخلي او له ټولو هېوادونه له افغانستان سره مثبت تعامل ته رابولي.
نوموړي وویل: "موږ د هېواد ملي ګټو ته په کتو له ټولو هېوادونو غواړو چې د افغانستان خلک په سختو شرایطو کې یوازې پرېنهږدي او د افغانستان په بیارغونه او اقتصادي پیاوړتیا کې ونډه واخلي او خنډونه لیرې کړي."
ذبیحالله مجاهد په دې خبرې کنفرانس کې دا هم وویل چې د دوی حکومت په دې ناسته کې وروسته له هغې د ګډون پرېکړه وکړه چې ملګرو ملتونو یې یو لړ شرطونه ومنل، خو نوموړي د دغه شرطونو په اړه په واضح ډول څه ونه ویل.
خو نوموړي د دوحې په ناسته کې د ښځو د ګډون په اړه وویل چې دغه ناسته کې یې د افغانستان د واحد دریځ په موخه د ښځو له ګډون سره مخالفت کړی او د دوی پلاوی به د افغانستان په استازیتوب هلته برخه اخلي.
په ورته وخت کې د ښځو د حقونو یو شمېر فعالانې غوښتنه کوي چې د دوحې په درېیمه ناسته کې افغان مېرمنو ته د ګډون نه ورکولو د پرېکړې له امله باید بېلابېل لوري له دې ناستې سره پرېکون اعلان کړي.
سیدي وايي: ملګرو ملتونو ثابته کړه چې بشري حقونو ته احترام نه لري، بلکې د خپلو ګټو لپاره حاضر دی له طالبانو سره هر ډول تعامل وکړي.
د افغان ښځو د شبکې مشرې ترنم سیدي ازادي راډيو ته وویل: "ملګرو ملتونو د دوحې په درېیمه ناسته کې د ښځو او مدني ټولنې د استازو د نه ګډون په اړه د طالبانو غوښتنې ومنلې او په دې سره یې نه یوازې ثابته کړه چې بشري حقونو ته احترام نه لري، بلکې د خپلو ګټو لپاره حاضر دی له طالبانو سره هر ډول تعامل وکړي."
نوموړې وویل چې د ښځو له ګډون پرته د دوحې درېیمه ناسته ورته د منلو نه ده.
د دوحې په ناسته کې د ښځو او مدني ټولنې د استازو د نه ګډون پرېکړې له دې وړاندې هم په افغانستان کې دننه او بهر د ښځو د حقونو د ګڼو فعالانو او بنسټونو تندې نیوکې او اندېښنې راپارولي دي.
پرون د بشري حقونو د څار سازمان د ښځو د برخې مسوولې هیدر بار ازادي راډيو ته وویل دا د ډېر شرم وړ ده چې ملګري ملتونه طالبان د دوحې غونډې ته غواړي، خو افغان مېرمنې له پامه غورځوي.
له دې وړاندې ګڼو نورو سازمانونو هم ورته نیوکې کړي دي.
د دوحې درېیمه غونډه سبا پیلېږي.
له دې وړاندې د دوحې په دوه لومړنیو غونډو کې طالبانو برخه نه وه اخیستې.
