د لاسرسۍ وړ لېنکونه

تازه خبر
پنجشنبه ۱۰ کب ۱۴۰۲ کابل ۱۰:۱۴

د طالبانو له بنده یو وار بیا د دوو فعالانو د خوشې کېدو غوښتنه وشوه


د عکس ښي لور ته صدیق الله افغان او چپ لور ته احمد فهیم عظیمي
د عکس ښي لور ته صدیق الله افغان او چپ لور ته احمد فهیم عظیمي

په داسې حال کې چې د طالبانو له لوري د زده کړو د دوو افغان فعالانو احمد فهیم عظیمي او صدیق‌الله افغان د نیول کېدو څه دپاسه درې میاشتې پوره کېږي د بخښنې نړیوال سازمان یو وار بیا د طالبانو له حکومته د دغه دوه فعالانو د سمدستي خوشې کېدو غوښتنه کړې ده.

د بخښنې نړیوال سازمان د افغانستان څانګې کمپاینرې سمیرا حمیدي ویلي سره له دې چې عظیمي او افغان پر ضد هېڅ ډول شواهد نه‌شته، خو د طالبانو حکومت په یوه غیرعادلانه محکمه کې محکوم کړي او زندان ته استولي دي.

اغلې حمیدي په خپل ایکس‌پاڼه د بخښنې نړیوال سازمان هغه لیک یو وار بیا شریک کړی چې د تېرې جمعې په ورځ د طالبانو د استخباراتو رییس ته لیکل شوی او خپور شوی و.

د بخښنې نړیوال سازمان د افغانستان څانګې کمپاینرې سمیرا حمیدي
د بخښنې نړیوال سازمان د افغانستان څانګې کمپاینرې سمیرا حمیدي

حمیدي لیکلي، د طالبانو د استخبارتو له دفتره د دوی "احمد فهیم عظیمي او صدیق الله افغان" د خلاصون غوښتنه مه هېروئ.

د طالبانو د حکومت د استخباراتو د رییس په نوم د بخښنې نړیوال سازمان په لیک کې راغلي چې د زده کړو دغه دوه افغان فعالان چې "د فکر بهتر" په نوم د پوهنې له یوې موسسې سره یې کار کاوه د تېر کال د اکټوبر په ۱۷ مه د کابل په کارته چهار سیمه کې د طالبانو د استخباراتو له لوري نیول شوي دي.

د بخښنې نړیوال سازمان ادعا کړې چې دغه فعالان په زندانونو کې شکنجه شوي او له عادلانه محاکمې او خپلو له بشري حقونو بې برخې دي.

که څه هم د بخښنې نړیوال سازمان ویلي چې دوی په یوې غیر عادلانه محکمه کې په بند محکوم شوي، خو د یادو فعالانو د کورنیو یو شمېر غړو ازادي راډيو ته وویل، دوی له محکمې پرته زندان ته استول شوي دي.

دوی زیاتوي، پر هغوی تور دی چې د افغان نجونو د زده کړو ملاتړ کوي او دغه شان یې له افغانستانه د روباټیک ټیم د ښځینه غړو په ویستلو کې مرسته کړې، خو په خبره یې دواړه جرمونه پرې نه دي ثابت شوي.

د صدیق الله افغان د کورنۍ یو غړي چې نه یې غوښتل په دې راپور کې یې نوم خپور شي ازادي راډيو ته وویل چې د افغان روغتیايي وضعیت ښه نه دی او د ساه بندۍ شدیده ستونزه لري.

هغه وايي: "محکمه یې نه ده شوې، موږ ډېره هڅه کړې چې لږ ترلږه له څلور میاشتو وروسته یې محکمه شوې وای، روغتیايي وضعیت یې هم ښه نه دی، د ساه بندۍ شدیده ستونزه لري. موږ چې کله ورځو د ملاقات لپاره درمل ورته وړو له هغې سره بیا یو څه ښه وي، خو په زندان کې یې روغتیايي وضعیت بد دی."

په ورته وخت کې د احمد فهیم عظیمي د کورنۍ یو غړی چې دا هم نه غواړي د امنیتي ستونزو له امله په راپور کې نوم واخیستل شي ازادي راډيو ته وویل: "یو بشپړ نامعلوم، بې سرنوشت او مبهم وضعیت لري، معلومه نه ده چې له دوی څه غواړي، ولې یې تراوسه محکمه نه ده شوې، ولې بې له محکمې د پل چرخی زندان ته استول شوي او له بده مرغه چې په زندان کې روغتیايي اسانتیاوو ته هم لاسرسی نه لري."

د طالبانو د حکومت ویاند ذبیح الله مجاهد په دې اړه د ازادي راډیو پوښتنې ځواب نه کړې او نه یې هم مخکې د زده کړو د دغو دوه فعالانو د نیولو په اړه په رسمي ډول څه ویلي دي.

د طالبانو د حکومت ویاند ذبیح الله مجاهد
د طالبانو د حکومت ویاند ذبیح الله مجاهد

دا په داسې حال کې ده چې د بېلابېلو سازمانونو د راپورونو پر بنسټ په افغانستان کې د طالبانو حکومت پراخه بشري سرغړونې کړي، هغه راپورونه چې د طالب چارواکو او ویندویانو وخت په وخت رد کړي دي.

د یادونې ده چې طالبانو له دې وړاندې هم د پوهنې د برخې یو شمېر فعالان د بېلابېلو جرمونو په تور نیولي چې ځني یې بېرته خوشې کړي او یو شمېر لا هم په بند کې دي.

طالبانو پر افغانستان د بیاځلي واکمنۍ له پیل وروسته له شپږمو ټولګیو پورته او د تېر میلادي کال د دسمبر میاشتې راهیسې په پوهنتونه کې د نجونو په زده کړو بندیز لګولی دی.

د طالبانو دا پرېکړې په نړیواله کچه په پراخه توګه غندل شوي، خو لا هم افغان نجونو ته اجازه نه ده ورکول شوې چې خپلو زده کړو ته وروګرځي.

اړوند مطالب

XS
SM
MD
LG