د اروپایي ټولنې ځانګړی استازی ټوماس نیکلاسن وایي، د دوحې غونډه د افغانستان په اړه د معنا لرونکو خبرو لپاره یو ښه فرصت دی.
نیکلاسن وایي، د افغانستان په اړه د دوحې په غونډه کې د کېدونکو بحثونو پرمختګ ته محطاطانه خوشبین دی.
نوموړي چې افغانستان ته د خپل څلور ورځې سفر په پای کې پرون پنجشنبې په کابل کې په یوه خبري کنفرانس کې څرګندونې کولي وویل، دغه غونډه د افغانستان په اړه د معنا لرونکو خبرو لپاره یوښه فرصت دی.
هغه زیاته کړه: "دا ځل د لیدنو کتنو اصلي تمرکز مې له واکمنو چارواکو، نورو افغانانو او د ډيپلوماتیکې ټولنې له استازیو سره د نظرونو پر تبادلې څرخېده. هیلهمن یو چې واقع بینانه انتظارات ولرو او په دوحه کې یوې رغونکې غونډې ته ښه چمتو شو."
نیکلاسن زیاته کړه چې د دوحې غونډې ته د افغانستان د مدني ټولنې استازي او د طالبانو چارواکي بلل شوي، خو زیاته یې کړه چې تراوسه یې د برخهوالو او هم د غونډې د اجندا په اړه ځینې پوښتنې شته.
د اروپایي ټولنې دې ځانګړي استازي همدارنګه وویل چې طالبانو د افغانستان لپاره د ملګرو ملتونو د یوه ځانګړې استازي له ګومارنې سره مخالفت څرګند کړی.
د دغسې یوه استازي ګومارنه د دوحې د غونډې د اجندا یوه موضوع ده.
طالبانو ویلي چې د افغانستان لپاره د ملګرو ملتونو د مرستندویه ماموریت یا یوناما په موجودیت کې د دغسې یوه استازي ټاکنې ته اړتیا نهشته.
د دوحې غونډې ته په ورنژدې کېدو سره طالبانو ویلي چې د افغانستان لپاره د ملګرو ملتونو د سرمنشي ځانګړې استازې روزا اوتونباییوا د دوی د حکومت د رییس الوزرا له سیاسي مرستیال مولوي عبدالکبیرسره په کتنه کې د دوحې د غونډې په باب خبرې کړې دي.
د طالبانو حکومت په خپله ایکسپاڼه یا پخواني ټویټر کې د مېرمن اوتونباییوا له قوله لیکلي چې ویلي یې دي د دوحې غونډه په افغانستان کې د ثبات او پرمختګ لپاره د بشري مرستو د جلب لپاره ښه فرصت دی.
یوناما د دغه راپور تر چمتو کېدو پورې د دغې کتنې په اړه څه نهدي ويلي.
طالبانو تراوسه نهدي ویلي چې ایا د دوحې په غونډه کې ګډون کوي کهنه؟
په عین حال کې د بشري حقونو یو شمېر ډلې او افغان ښځینه فعالانې په دې غونډه کې د ښځو پرزیات ګډون ټینګار کوي.
ښځې چې د طالبانو په تېره څه کم دوهنیم کلنه واکمني کې ډېرې ځپل شوې دي.
د ملګرو ملتونو چارواکو ویلي چې د دوحې د غونډې هدف دا دی چې د افغانستان په اړه د ملګرو ملتونو د ځانګړي همغږي کوونکي فریدون سینیرلي اوغلو د خپلواکې ارزونې سپارښتنو ته په پام په څه ډول کېدای شي چې په یوه همغږي او منسجم جوړښت کې د نړیوالو ښکېلتیا زیاتولو ته لاره هواره شي.
په دې هدف دا غونډه داسې مهال جوړېږي چې تراوسه د طالبانو حکومت د نړۍ هیڅ یوه هېواد په رسمیت نهدی پېژندلی او د نورو مسایلو ترڅنګ د په رسمیت پېژندلو په وړاندې یو مهم خنډ یې هم پر نجونو او ښځو له شپږم ټولګي پورته زده کړو باندې لګول شوی بندیزبلل کېږي.