د دوحې غونډې ته څه کم دوه اوونۍ پاتې دي.
د بشري حقونو د څار بنسټ په دې غونډه کې د ښځو د پراخې ونډې په نشتوالي اندېښنه ښودلې.
په دغه بنسټ کې د ښځو د برخې مرستیالې هیدر بار ازادي راډيو ته وویل چې د ملګرو ملتونو د پرېکړه لیک له مخې باید ښځې د سولې او خبرو اترو په هر بهیر کې په پراخه کچه حضور ولري.
هغې زیاته کړه چې د دوحې په غونډه کې د افغان ښځو لپاره د ټاکل شویو شپږو ځایونو په اړه هیڅوک نه پوهیږي.
اغلې بار وویل:
"د ښځو فعالانې او د ښځو د حقونو مدافعین ډیرې پوښتنې کوي چې دا شپږ کسان به څوک غوره کړي او ایا په دې شپږو کسانو کې به هغه ښځې هم شاملې وي چې د طالبانو پر ضد دریدلې. نو بنا دا به د بشپړ اشتراک معنی نه ورکوي."
د قطر پلازمېنه دوحه به د فبرورۍ په ۱۸مه او ۱۹مه د افغانستان په اړه د یوې غونډې کوربه وي.
تمه ده چې د دې غونډې په لومړۍ ورځ به یوازې د افغانستان په چارو کې د یادو هېوادونو د استازو ترمنځ خبرې وشي.
ملګري ملتونه وايي، دا غونډه به د دې لپاره جوړه شي چې څنګه له افغانستان سره نړیواله همکاري لا زیاته همغږې، منظمه او یو لاس شي.
د دوحې په غونډه کې د ګډون لپاره د بېلابېلو هېوادونو او بنسټونو استازو ته بلنه ورکړل شوې ده.
د طالبانو حکومت تایید کړې چې د دوحې غونډې ته دوی هم وربلل شوي.
د طالبانو د بهرنیو چارو وزارت سرپرست دا اوونۍ د ملګرو ملتونو د سرمنشي ځانګړې استازې او د یوناما رییسې روزا اوتنبایووا سره لیدلي.
د طالبانو د حکومت د بیان په اساس په دې غونډه کې اغلې اتنبایووا د دوحې د غونډې په اړه معلومات ورکړي او له طالبانو یې غوښتي چې په دې غونډه کې ګډون وکړي.
تمه ده چې په دې غونډه کې به د افغانستان لپاره د ملګرو ملتونو د ځانګړي استازي پر ټاکل کېدو هم خبرې وشي.
طالبان وايي چې دغه استازي ته اړتیا نشته.
د طالبانو د حکومت ویاند ذبیح الله مجاهد ویلي چې دوی د افغانستان لپاره د ملګرو ملتونو له ځانګړي استازي سره همکاري نه کوي.
ښځینه فعالانې غواړي چې په دې غونډه کې د دوی غږ واوریدل شي او د خپلو حقونو غوښتنه وکړي.
د کار، تعلیم او ټولنیزو فعالیتونو په اړه بحث د دوحې په غونډه کې د ښځو له مهمو غوښتنو څخه دی.
یو شمېر ښځینه فعالانو ازادي راډيو ته وویل د دوحې په غونډه کې د فعالو ښځو او هغو ښځو نشتوالی چې د طالبانو د محدودیتونو په وړاندې یې غږ پورته کړی دوی ته د منلو نه دی.
