د لاسرسۍ وړ لېنکونه

تازه خبر
یکشنبه ۶ کب ۱۴۰۲ کابل ۰۱:۴۴

د کابل، کاناډا او جرمني اعتراض کوونکي: طالبانو ښځې په کورونو کې بندیانې کړي، خو بیا هم نړۍ دوی په واک کې ساتل غواړي


د طالبانو خلاف د څو ورځې وړاندې یوې اعتراضي ناستې انځور
د طالبانو خلاف د څو ورځې وړاندې یوې اعتراضي ناستې انځور

د طالبانو د واکمنۍ د دوه کلنۍ په مناسبت، په کابل، کاناډا او جرمني کې یو شمېر افغانو ښځو د هغه څه په غبرګون کې، چې د طالبانو له لوري یې د ښځو د حقونو نقض بولي، اعتراضیه غونډې کړي دي.

په دې لړ کې، د کابل د انتقادي مکتب غړو د دوشنبې په ورځ د طالبانو د دوه کلنې واکمنۍ په مناسبت په پوښلې فضا کې اعتراضیه غونډه وکړه.

دغو ښځو په خپله اعتراضیه غونډه کې د طالبانو پر وړاندې د نړۍ پر تګلارې نيوکې وکړې او ويې ويل چې طالبانو ښځې د کورونو په څلورو دیوالونوکې زنداني کړې دي.

له دغو ښځو څخه یوې یې نسرین فرامرز ازادي راډيو ته وویل: " په افغانستان کې د طالبانو له واکمنۍ څخه دوه کاله تېریږي دوی د افغانستان ښځې په بشپړه توګه د کور په څلورو دیوالونوکې بندیاني کړې د، موږ د نړۍ د سیاستونو پر ضد اعتراض لرو، چې تر ننه پورې د طالبانو حکومت په واک کې ساتلو هڅه کړې. "

په ورته وخت کې په کابل کې د « د خود جوشه ښځو غورځنګ » په نوم د ښځو یو بل خوځښت هم د دوشنبې په ورځ د اګسټ پر ۱۴ مه، د طالبانو د واکمنۍ د دوه کلنۍ په مناسبت اعتراضیه غونډه وکړه .

د دغه ِغورځنګ په اعلامیه کې په تیرو دوو کلونو کې د طالبانو له خوا د بشري حقونو د سرغړونو ته اشاره شوې ده.

شماری از زنان و دختران معترض
شماری از زنان و دختران معترض

په غونډه کې ګډونکونکې او د دغه حرکت غړې وحیدې امیري ازادي راډیو ته وویل: " په دې اعلامیه کې موږ د بشري حقونو هغه لوی راپورونه چې د بشري حقونو نړیوالو بنسټونو په ګوته کړي دي، موږ هم په ګوته کړي او د نړۍ په خپلو ټکو غږیږو. "

په افغانستان کې د طالبانو د واکمنۍ له دوه کلنۍ سره سم په دغه هېوادکې دننه او بهر د دوی د کړنو پر ضد اعتراضیه غونډې پراخې شوي.

د یکشنبې په ورځ له غرمې وروسته د جرمني په برلین او د کاناډا په تورنتو ښارونو کې هم اعتراضونه وشول.

د ښځو او ماشومانو د حقونو فعالې او د کاناډا په تورنتوکې ښار کې د اعتراض یوې تنظیموونکې زرقا یفتلي ازادي راډیو ته وویل: " نن له بده مرغه افغانستان په نړۍ کې یوازینی هیواد دی چې خلک یې له خپلو ټولو اساسي حقونو څخه بې برخې دي، په ځانګړي ډول زموږ د هیواد له پنځوس سلنې څخه زیات نفوس چې ښځې دي، نن ورځ له خپلو ټولو لومړنیو او اساسي حقوقو څخه محرومې دي، دوی د کار کولو، زده کړې، د ټولنیز کار او سیاسي مشارکت حق نه لري. "

د کاناډا د تورنټو په ښار کې له ښځو سره په لاريون کې نارينه وو هم برخه اخيستې وه، چې په پرېکړه ليک کې د دوحې د تړون په لغوه کولو او د يوه ټول ګډونه حکومت د رامنځته کولو لپاره د ملګرو ملتونو پر هڅو ټينګار وشو ، چې د ښځو په ګډون د ټولو افغانانو حقونه په کې خوندي وي .

گردهمایی اعتراضی افغانهای مقیم شهر تورنتو - کانادا
گردهمایی اعتراضی افغانهای مقیم شهر تورنتو - کانادا

د جرمني په برلین ښار کې د افغان ښځو د لاریون یوې ګډونوالې فوزیې وحدت ازادي راډیو ته وویل: " پرون ماښام په برلین کې یو شمیر افغانان د اګست د ۱۵ نیټې په مناسبت راټول شول ، او مظاهره یې وکړه ، دغو ګډونوالو یو ځل بیا د افغانانو د عدالت غوښتنې غږ پورته کړ ، له نړۍ او د اروپا له خلکو یې وغوښتل چې د افغانانو تر څنګ ودریږي. طالبان دې په رسمیت نه پېژني ، او له طالبانو سره دې په هېڅ ډول تعامل نه کوي. "

په افغانستان او نورو هیوادونو کې د طالبانو د واکمنۍ د دوه کلنۍ په مناسبت د افغانانو له خوا اعتراضیه غونډې دوام لري.

د دغو غوندو په اعلاميوو کې د طالبانو له خوا د کار، زده کړو، ټولنيزو او سياسي فعاليتونو په برخو کې پر ښځو د بنديزونو او له ټولو حقونو څخه د دوی د بې برخې کولو يادونه شوې ده.

په اعلاميه کې له ملګرو ملتونو، امريکا، اروپايي هېوادونو او د افغانستان له ګاونډيو هېوادونو هم غوښتل شوي، چې له طالبانو سره مرسته او همکاري بس کړي، او پر ځای يې د افغان مېرمنو ملاتړ وکړي.

اعتراض کوونکې ښځې داسې مهال نړیواله ټولنه له طالبانو سره په همکارۍ تورنوي، چې د ملګرو ملتونو په ګډون بیلابیلو نړیوالو سازمانونو تل د افغان میرمنو د ملاتړ او پر ښځو د طالبانو د بندیزونو د لرې کولو لپاره غونډې کړي او په دې اړه یې له طالبانو سره خبرې کړي دي.

دا اعتراضونه په داسې مهال دي، چې د طالبانو د حکومت چارواکي او ویاندویان ښځو او نجونو ته د اسلام په چوکاټ کې د حقونو د ورکړې ادعا لري او له دې اړخه پر دوی کیدونکې نیوکې بې بنسټه بولي.

XS
SM
MD
LG