ګزیت:
له کلورادو ایالت څخه خپرېدونکې ګزیت ورځپاڼې په یوه مطلب کې د ملګرو ملتونو هغه راپور ته کتنه کړې چې وايي، له القاعده شبکې سره تړلي کسان د طالبانو په مشرۍ حکومت سره مرسته کوي.
ورځپاڼه لیکي، د ملګرو ملتونو یوې ځانګړې ډلې موندلې چې د طالبانو د حکومت لږ تر لږه درې مهم مشران د القاعده شبکې غړي وو او یا یې له دې تروریستي ډلې سره اړیکي پالل.
د ملګرو ملتونو د امنیت شورا د بندیزونو د تطبیق د څارنې او څېړنې ډلې په روانه جون میاشت کې په یو راپور کې وویل، د طالبانو د حکومت دوه تنه والیان قاري احسان الله بریال او حافظ محمد آغا حکیم له القاعده شبکې سره اړیکي لري.
قاري بریال پر افغانستان د طالبانو د واکمنېدو په پیل کې د کابل او وروسته د کاپیسا د والي په توګه وګومارل شو او حافظ محمدآغا حکیم چې پخوا د نورستان والي و، په تېره مې میاشت کې د پنجشېر والي شو.
د امنیت شورا کارپوهانو همداراز ویلي چې د طالبانو د حکومت د استخباراتو مرستیال تاجمیر جواد هم له القاعده شبکې سره اړیکي لري.
ورځپاڼه د دې راپور په یادونې سره لیکي چې طالبانو پر متحدوایالتونو د سپټمبر د یوولسمې له حملو مخکې او له هغه وروسته د القاعده شبکې ملاتړ کړی.
د یادونې وړ ده چې د طالبانو حکومت د امنیت شورا راپور یو اړخیز او نامتوازن بللی دی.
د طالبانو د حکومت ویاند ذبیحالله مجاهد په یو بیان کې ډاډ ورکړ چې د افغانستان له خاورې څخه به ګاونډیو هېوادونو، سیمې او نړۍ ته هېڅ راز خطر پېښ نهشي.
یوریشیا ریویو:
یوریشیا ریویو انلاین خپرونې په افغانستان کې د مخدرو موادو پر ضد د طالبانو د حکومت اقداماتو ته کتنه کړې او د مطلب په عنوان کې پوښتنه کوي چې پر تریاکو د طالبانو بندیز یوه بریا ده که یوه ناکامي؟
ورځپاڼه د کوکنارو کښت د پیسو هغه کرونده بولي چې له ډېرو کلونو راهیسې په تېره د هېواد په جنوب او جنوب ختیځ کې د خلکو د عوایدو سرچینه ده، خو په عین حال کې دا کروندې په نړۍ کې د مخدروموادو له نړیوالې ستونزې سره هم لویه مرسته کوي، ځکه تریاک په هیرویین او نورو غیرقانوني مخدروموادو بدلېږي او مخدرات بیا اعتیاد، جرایم او تاوتریخوالی زیاتوي.
خپرونه د ملګرو ملتونو د هغو اټکلونو یادونه کوي چې وايي، افغانستان په ۲۰۲۰ کال کې د نړۍ په سلو کې ۸۴ تریاک تولیدول او د دې هېواد پر اقتصاد ۱،۴ میلیارد ډالر ورزیاتوي.
یوریشیا ریویو پوښتنه کوي چې ولې طالبانو په افغانستان کې د کوکنار پر کرنه بندیز ولګاوه؟ خپرونه د څارونکو له قوله لیکي، طالبان غواړي د مخدرو موادو د مخنیوي په چاره کې همکارۍ ته د لېوالتیا په ښودلو سره په رسمیت وپېژندل شي.
خپرونه زیاتوي چې تر دې یو بل مهم دلیل دا دی چې طالبان اسلامي شریعت ته ژمن دي او د مُسکِراتو کارول شرعا حرام کار دی.
خپرونه د کوکنارو پر کروندو د طالبانو د بندیز د اغېزمنتوب په اړه د سپوږمکۍ په وسیله د اخیستل شویو تصویرونو یادونه کوي او لیکي چې د دې بندیز بریا د پام وړ ده.
خپرونه لیکي، د طالبانو بندیز یو ډېر زړور او د ستاینې وړ اقدام دی خو هدف یې دا نهدی چې نړیوال یې په رسمیت وپېژني بلکې دوی غواړي شریعت تطبیق کړي او افغانان د مخدروموادو له کارولو راوګرځوي.
د یوریشیا ریویو د مطلب په پای کې راغلي چې د طالبانو د حکومت بندیز د کوکنار د کرکېلې د مخنیوي په چاره کې کومه بریا نه بلکې یوه پېچلې او لانجمنه مسئله ده چې باید درناوی یې وشي او خبرې پرې وشي.