پاکستان د بلوچستان د نوشکي په سرحدي سیمه کې د افغان طالبانو له ځواکونو سره د نښتې خبر ورکړی دی.
په دې اړه په کابل کې واکمنو طالبانو څه نه دې ویلي، خو د نوشکي د کمېشنر مرستیال امجد سومرو تېر ماښام بيبيسي اردو ته ویلي چې افغان لوري ته یې درانه تلفات اړولي دي.
پاکستان په داسې وخت کې دا ادعا کوي چې د طالبانو د بهرنیو چارو وزارت ویاند عبدالقهار بلخي پرون په یوه پیغام کې وویل چې په ګاونډي پاکستان کې د حکومت د پلویانو او سیاسي مخالفینو ترمنځ کړکېچ د اندېښنې وړ حد ته رسېدلی دی.
عبدالقهار بلخي په خپله ایکسپاڼه یا پخواني ټویټر کې د پاکستان وضعیت ته په اشارې سره لیکلي چې کېدای شي په ټوله سیمه منفي اغېزه وکړي.
د پاکستان او افغانستان له چارو سره اشنا خبریال سمیع یوسفزي ازادي راډیو ته د افغان طالبانو د دې اندېښنې په اړه چې د پاکستان په باره کې یې لري، وویل: "یو خو طالبان پاکستان ته دا ورښیي، که تاسو د افغانستان په چارو کې کله کله مداخله کوئ هلته د ټولشموله حکومت چې د ټولو قومونو استازي پهکې وي، خبره کوئ، موږ هم ځانونو ته دا حق ورکوو چې د پاکستان په موضوعاتو باندې دا ډول خبرې وکړو، دوهم د دې خبرو مطلب دا دی چې کله پاکستان د افغانستان په اړه څه ووایي، طالبان هم د هغوی په ځواب کې مستقیماً دا ډول اظهارات کوي، دا په دې معنا دي چې روابط د دواړو هېوادونو ترمنځ ډېر خراب حالت ته رسېدلي دي او له دا ډول بیانونو نه وروسته داسې ښکارې چې دا اړیکې به نور ترینګلې شي."
د طالبانو د بهرنیو چارو د وزارت ویاند دا خبره په خپل بیان کې نه ده روښانه کړې چې اسلامآباد له کومو سیاسي مخالفانو سره خبرې وکړي.
د پاکستان حکومت تحریک طالبان پاکستان ډله د افغان طالبانو ملګرې او یوه ترهګره ډله بولي او وایي چې له دې ډلې او په بلوچستان کې له بلوچ بیلتون غوښتونکو سره خبرو ته چمتو نه دی.
بل لور ته د پاکستان حکومت د عمران خان په مشرۍ له اپوزسیون تحریک انصاف ګوند سره دا ستونزه لري چې تحریک انصاف وایي چې د فبروري د اتمې نېټې په انتخاباتو کې درغلۍ شوي دي، باید بیا انتخابات وشي او د دوی مشر عمران خان دې ژر تر ژره له زندانه ازاد کړي.
په تېرو دوو ورځو کې د تحریک انصاف د ګوند نږدې ۹۰۰ پلویان امنیتي ځواکونو په اسلامآباد کې د مظاهرو پر مهال نیولې دي.
په ورته وخت کې د پاکستان د کورنیو چارو وزارت پرون د پښتون ژغورنې د غورځنګ د سیاسي ډلې پر فعالیتونو بندیز ولګاوه.
تر دې وروسته د دې غورځنګ مشر منظور احمد پښتین وویل چې فدرالي حکومت له دې اعلان سره د پښتنو پر وړاندې د دښمنۍ ټولې پولې ماتې کړې.
د پښتون ژغورنې غورځنګ غواړي چې د جمعې په ورځ په خیبر دره کې د پښتنو لویه جرګه جوړه کړي، خو پولیسو تر اوسه د دې جرګې پرځای او هلته راغونډو شویو ځوانانو درې ځله حملې کړې دي.
پر دې ډلې تر بندیز وروسته هم د دې غورځنګ غړیو ویلي چې دا جرګه به جوړوي.
