د پاکستان پوځ وايي چې پر سرتېرو یې نن سهار وختي د ډېره اسماعیل خان په درابند سیمه کې برید وشو.
له جنوري میاشتې راهیسې دا د پاکستان پر پوځ تر ټولو خونړۍ حمله ده.
د درابند د پولیسو مشر محمدعدنان د ازادي راډیو مشال څانګې ته وویل چې نن سهار وختي لومړی وسله والو په چاودېدونکو موادو بار ټرک د پولیسو تاڼې ته دننه کړ او وایې لوزاوه.
د پاکستان پوځ په یوه بیان کې ویلي دي چې له چاودنې وروسته شپږ تنه وسه وال تاڼې ته ننوتل او د څلورو ساعتونو لپاره یې نښته وکړه.
په بیان کې راغلي دي چې په چاودنه کې د تاڼۍ د ودانۍ یوه برخه هم نړېدلې ده.
ویل کېږي چې پوځي ځواکونو له دې تاڼې څخه د خپل مرکز په توګه کار اخیست.
د پولیسو سیمه ییزو چارواکو تایید کړې چې په نښته کې شپږ واړه بریدګر هم وژل شوي دي.
پوځ په یوه جلا بیان کې په بېلابېلو سیمو کې د عملیاتو په ترڅ کې د ۲۷ وسله والو د وژلو خبر هم ورکړی دی.
د درابند د پولیسو د تاڼې مشر ذیشان اقبال مشال راډیو ته وویل، پېښه هغه مهال وشوه چې پوځ د استخباراتې معلوماتو له ترلاسه کولو وروسته غوښتل په سیمه کې عملیات وکړي.
اسوشیتیدپریس خبري آژانس د سیمې د پولیسو د یو بل مشر کمال شاه له قوله راپور ورکوي چې وايي د درابند د پولیسو په تاڼه کې له څه مودې راهیسې د پاکستان بېلابېل پوځي ځواکونه دېره وو، او هلته یې د سیمه ایزو ځواکونو په مرسته د استخباراتي معلوماتو پربنسټ د وسله والو مخالفینو پرضد عملیات کول.
درابند د ډیره اسماعیل خان په ۳۵ کیلومترۍ کې د بلوچستان پر لویه لاره او ناامنه جنوبي وزیرستان ته څېرمه پرته سیمه ده.
د پاکستان ولسمشر عارف علوي دا حمله غندلې ده ویلي یې دي چې دا حملې به پاکستاني امنیتي ځواکونه کمزوري نه کړي.
د کورنیوچارو سرپرست وزیر سرفراز بوګټي هم په یوه بیان کې دا یوه تروریستي حمله بللې ده.
د دې حملې پړه نوې جوړې شوې وسله والې ډلې تحریک جهاد پاکستان یا TJPپه یوه بیان کې منلې. ګومان کېږي چې دا ډله به د پاکستاني طالبانو د تحریک TTP یوه څانګه وي.
د موقت صدراعظم انوارالحق کاکړ په ګډون د پاکستان ګڼو چارواکو ویلي چې ډېری وسله والې ډلې د افغانستان له خاورې په پاکستان کې حملې کوي، خو د طالبانو حکومت دا ادعاوې رد کړې دي او ویلي یې دي چې پاکستان دې د خپلو ناکامیو پړه د افغانستان غاړې ته نه اچوي.
