د لاسرسۍ وړ لېنکونه

تازه خبر
سه شنبه ۸ کب ۱۴۰۲ کابل ۰۸:۴۳

خبرونه

د پاکستان پوځ د ۳ هېوادونو له ځانګړو ځواکونو سره د ترهګرۍ ضدو تمرینونو خبر ورکړ

له ارشیفه د یو شمېر پاکستاني پوځیانو تصویر
له ارشیفه د یو شمېر پاکستاني پوځیانو تصویر

د پاکستان پوځ وایي چې د بحرین، عراق او کویټ له ځانګړو ځواکونو سره یې په ګډه د ترهګرۍ ضد تمرینونه ترسره کړي دي.

د پوځ د عامه اړیکو څانګې پرون دوشنبه په یوه خبرپاڼه کې ویلي چې د فجر الشرق په نوم دغه تمرینونه دوه اوونۍ د پاکستان د ترهګرۍ ضد مبارزې په مرکز کې ترسره شول.

پاکستاني چارواکو د دغو تمرینونو هدف د خپلو ځواکونو د وړتیاوو لوړول او دګډې همکارۍ پراختیا ښودلې ده.

پاکستان دغه پوځي تمرینونه داسې مهال کوي چې په هغه هېواد کې د نا امنۍ پېښې ډېرې شوي دي.

په وروستۍ پېښه کې د یکشنبې په ورځ د خیبر پښتونخوا په بنو کې د امنیتي ځواکونو پر کاروان ځانمرګی برید وشو چې د پوځ په وینا دوه ملکیان په کې ووژل شول او د درېیو سرتیرو په ګډون لس تنه نور ټپیان شول.

د ورځې تازه خبرونه دلته ولولئ

د امریکا د بهرنیو چارو وزیر د افغان ښځو د اقتصادي مقاومت په نوم یوه ایتلاف ته نن وینا کوي

د امریکا د بهرنیو چارو وزیر انتوني بلېکین
د امریکا د بهرنیو چارو وزیر انتوني بلېکین

ټاکل شوې چې د امریکا د بهرنیو چارو وزیر انتوني بلېکین د افغان ښځو د اقتصادي مقاومت په نوم د یوه ایتلاف AWERغونډې ته نن وینا وکړي.

د امریکا د بهرنیو چارو وزارت د ویندوی له دفتره بېګا ناوخته په یوه خپره شوې اعلامیه کې ویل شوي چې دا غونډه نن د افغانستان په وخت د ماښام په اوو بجو په بهرنیو چارو وزارت کې د بوستون پوهنتون او ددې وازرت په ګډ کوربه توب جوړیږي.

د اعلامیې له مخې، د دغه ایتلاف دې غونډې ته د خصوصي سکتور، مدني ټولنې، پوهنتونونو او حکومتونو استازي بلل شوي او دوی به د دغه ایتلاف د نویو نوښتونو او دا چې هغه له نورو لوبغاړو او شریکانو سره په څه ډول پرمخ وړل کېدای او ګډ هدفونه ترلاسه کیدای شي، خبرې وکړي.

د بهرنیو چارو وزارت په وینا، د بهرنیو چارو وزارت او د بوستون پوهنتون ترمنځ دغه خصوصي ایتلاف چې په ۲۰۲۲ کال کې د ښاغلي بلېنکین له خوا رامینځته شوی، هدف یې زده کړې، کار او خصوصي سوداګرۍ ته د افغان ښځو او نجونود لاسرسي ملاتړ او په دې برخه کې د نوښتونو او همکاریو زیاتوالی ښودل شوی.

په افغاني ټولنه کې د افغان ښځو او نجونو د فعال ګډون په هدف دا غونډه داسې مهال جوړیږي چې په افغانستان کې د طالبانو د واکمنۍ په څه باندې دوه نیم کلنه موده کې نجونې له شپږم ټولګي پورته زده کړومنع شوي او ښځې هم په نادولتي موسسو او یو شمېر دولتي ادارو کې له کار کولو راګرځول شوې دي.

کرکټ؛ د افغانستان او ایرلنډ لوبډلې سبا یوازېنۍ ټسټ لوبه لري

له ارشیفه د افغان کرکټ ملي لوبډلې یو تصویر
له ارشیفه د افغان کرکټ ملي لوبډلې یو تصویر

په پام کې ده چې د افغانستان او ایرلنډ د ملي لوبډلو ترمنځ یوازینۍ ټسټ لوبه سبا چارشنبې د فبروري په ۲۸مه ترسره شي.

د افغانستان په کوربه توب دا لوبه په ابوظبي په پام کې ده او د کابل په وخت د سهار په لس نیمو بجو پیلېږي.

د دې لوبې په درشل کې پرون ماښام د افغانستان کرکټ بورډ سیالو لوبغاړو ته په متحده عربي اماراتو کې د ماښام مېلمستیا کړې وه.

د کرکټ بورډ د تجارتي څانګې مشر اکبر محمد پکتیان خپلو مېلمنو ته ښه راغلاست ووایه او ویې ویل:

" سلامونه، ماښام مو په خیر اتلانو او چارواکو، موږ دلته د ماښامنۍ مېلمستیا لپاره راټول شوي یو او د دواړو هېوادونو ترمنځ د یوې بلې ځانګړې سیالۍ لپاره د تیاریو په حال کې یو. البته د کرکټ د یوې بلې عالي سیالۍ د پیل لپاره به ښه وي چې له خپلو سیالانو سره یوه عالي او ښایسته ماښامنۍ ولرئ."

افغان لوبډله به له دې لوبې وروسته راتلونکې اونۍ له ایرلنډ سره درې یوورځنۍ لوبې هم وکړي او بیا د دوی ترمنځ درې شل اووره لوبې هم په پام کې دي.

افغان لوبډلې د شل اووره لوبو نړیوال جام ته د تیاریو په لړ کې له دې مخکې له سریلانکا، هند او متحده عربي اماراتو سره هم یولړ سیالۍ درلودې.

د شل اووره کرکټ نړیوال جام د متحدوایالتونو او ویست انډیز په کوربه توب د غبرګولي یا جوزا په ۱۲مه نېټه د نړۍ د شلو مخکښو لوبډلو ترمنځ پیلېږي او د چنګاښ یا سرطان تر نهمې پورې دوام کوي.

د هنګري پارلمان په ناټو کې د سویډن غړیتوب ته رایه ورکړه

د هنګري پارلمان
د هنګري پارلمان

د هنګري پارلمان پرون په ناټو کې د سویډن د غړیتوب لایحه تصویب کړه.

له دې سره په داسې حال کې چې د اوکراین جګړه لاهم روانه ده، په ناټو کې د اروپا د شمال د دې هېواد غړیتوب ته لاره اواره شوه.

هنګري د ناټو وروستی غړی دی چې له څو میاشتو ځنډ وروسته په دې ټلواله کې د سویډن غړیتوب مني.

د پارلمان غړو په ۱۸۸ موافقو او شپږ مخالفو رایو دا اقدام تایید کړ. په دې برخه کې د هنګري ځنډ د ناټو غړي هېوادونه په غوسه کړي وو.

د سویډن صدراعظم اولف کریسترسن Ulf Kristersson په غبرګون کې دا یوه تاریخي ورځ وبلله او ویې ویل سويډن چمتو دی چې د اروپا او اتلانتیک د امنیت د ټینګښت لپاره خپل مسوولیتونه ترسره کړي.

د ایران سلګونه فعالان: ټاکنو کې برخه نه اخلو، پایلې یې له مخکې تنظیم شوي

د ایران د ټاکنیزو هڅو یوه څنډه
د ایران د ټاکنیزو هڅو یوه څنډه

د ایران سلګونه سیاسي، ټولنیز او فرهنګي فعالان وايي، د دې هېواد د راروانو انتخاباتو نتایج له اوسه تنظیم شوي او دوی ګډون نه پکې کوي.

د مرتضا الویري، عبدالعلي بازرګان او علیرضا رجايي په ګډون ۲۷۵ تنه فعالانو د ایران د پارلمان د دولسمې دورې په انتخاباتو کې د ګڼ شمېر کاندیدانو ردېدلو ته د اشارې په ترڅ کې د یوې اعلامیې په خپرولو سره د انتخاباتي بنسټ وضعیت خواشینونکی بللی او پر چارواکو یې انتقاد کړی دی.

په اعلامیه کې پر هغو جریانونو چې په انتخاباتو کې ګډون د هېواد په مصلحت بولي انتقاد شوی دی. اعلامیه زیاتوي چې په انتخاباتو کې د مشارکت او حضور ازموېل شوی سیاست د استبداد له دوام پرته بله نتیجه نه ورکوي.

په پام کې ده چې د ایران د ولسي جرګې یا مجلس لپاره انتخابات او ورسره د خبره ګانو په نوم د بل مجلس لپاره د رایو اخیستل د راروانې جمعې په ورځ پیل شي، خو ډېری نوماند کاندیدان لا له مخکې رد شوي دي.

نن په افغانستان کې د ګوزڼ ناروغۍ پر ضد د واکسین د ۴ ورځني کمپاین دویمه ورځ ده

تصویر له ارشیفه
تصویر له ارشیفه

په پام کې ده په افغانستان کې د ماشومانو د ګوزڼ د ناروغۍ یا پولیو پرضد د واکسین د څلور ورځني کمپاین په ترڅ کې چې پرون په ۲۱ ولایتونو کې پیل شو، له پنځو کلونو کم عمره شاوخوا اوه ملیونه او شپږ لکه ماشومانو ته د واکسین څاڅکي ورکړل شي.

د طالبانو د حکومت د عامې روغتیا وزارت له کورنیو او دیني عالمانو غوښتي دي چې د دې کمپاین په تطبیق کې مرسته وکړي.

تېرکال په افغانستان کې د پولیو شپږ پېښې ثبت شوې چې ټولې په ننګرهار ولایت کې وې، خو سږکال تراوسه د کومې نوې پېښې خبر نه دی ورکړل شوی.

افغانستان او پاکستان د نړۍ یوازیني دوه هېوادونه دي چې د ماشومانو د ګوزڼ ناروغي تراوسه پکې ده او له منځه نه ده وړل شوې.

د طالبانو د حکومت یو اقتصادي پلاوی له چابهار بندر څخه لیدنه کوي

د ایران د چابهار بندر یوه څنډه
د ایران د چابهار بندر یوه څنډه

د ایراني رسنیو د راپورونو له مخې، د طالبانو د حکومت یو اقتصادي پلاوی له چاه بهار بندر څخه لیدنه کوي.

ایرنا خبري آژانس خبر ورکړی چې د طالبانو د حکومت دا تخنیکي او اقتصادي پلاوی د چاه بهار په آزاده تجارتي او صنعتي سیمه کې د افغان سوداګرو لپاره د سوداګرۍ او پانګونو د فرصتونو د ارزونې لپاره هلته تللی دی.

ایرنا د چاه بهار د یوه چارواکي اکبر باور له قوله خبر ورکړی چې د افغان پلاوي د سفر پرمهال به په دې بندر کې د استوګنې د کورونو او د اقتصاد او هوټلدارۍ په برخو کې څو پروژې پرانیستل شي.

افغانستان چې سمندر ته خپله لاره نه لري او د پاکستان له لارې د سوداګرۍ او ترانزیت په برخو کې تل له ستونزه سره مخامخ وي، هڅه کوي چې د چاه بهار بندر له لارې له نورې نړۍ سره سوداګري پراخه کړي.

متقي د ترکمنستان د بهرنیو چارو وزیر سره د افغانستان- ترکمنستان د ترانزیت او انتقالاتو په اړه خبرې کړي

د طالبانو د حکومت او ترکمنستان د بهرنیو چارو د وزیرانو ناسته
د طالبانو د حکومت او ترکمنستان د بهرنیو چارو د وزیرانو ناسته

د طالبانو د حکومت د بهرنیو چارو وزیر له خپل ترکمنستاني سیال سره په کتنه کې د افغانستان او ترکمنستان ترمنځ د ترانزیت او انتقالاتو په اړه خبرې کړي.

د طالبانو د حکومت د بهرنیوچارو وزارت مرستیال ویاند حافظ ضیااحمد پر خپله ایکس پاڼه د دې لیدنې خبر ورکړی او لیکلي یې دي چې امیرخان متقي په عشق آباد کې د ترکمنستان د بهرنیوچارو له وزیر او مرستیال صدراعظم رشید مرادوف سره په کتنه کې د دوه اړخیزو سیاسي او اقتصادي مسایلو او همداراز د انتقالاتو او ترانزیت پر اړوندو مسایلو خبرې وکړې.

ښاغلی متقي د ترکمنستان د بهرنیوچارو د وزیر په بلنه د یوه پلاوي په مشرۍ چې د طالبانو د حکومت د کانونو او پټرولیم وزارت او د افغانستان د رېلګاډي او برېښنا د ادارو چارواکي پکې شامل دي، ترکمنستان ته تللی دی.

د ملګرو ملتونو یوې مسوولې د افغان ښځو پر وړاندې د طالبانو تبعیضي کړنې وغندلې

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د ملګرو ملتونو یوه جګپوړې مسووله وايي، دوی په افغانستان کې د نجونو او ښځو پر وړاندې د طالبانو تبعیضي کړنې غندي.

په ملګرو ملتونو کې د ګیانا سفیرې کارولین رودریګوزبرکیټ چې د امنیت شورا دوره یي مشره ده، د ښځو، سولې او امنیت لپاره د ګډو ژمنو د ډلې په استازیتوب اعلامیه ولوستله او د طالبانو تر حاکمیت لاندې په افغانستان کې یې د بشري حقونو په رعایت ټینګار وکړ.

دغه څرګندونې د افغانستان په اړه د ملګرو ملتونو د امنیت شورا د نننۍ غونډې تر پیل مخکې شوې دي.

په خبرپاڼه کې راغلي چې د دې ډلې غړي د طالبانو له حکومته غواړي چې ژر تر ژره د ښځو پر وړاندې خپلې تګلارې لغوه کړي چې په کې له شپږم ټولګي څخه پورته د نجونو پر زده کړو بندیز، د ښځو پر کار بندیز، د هغوی پر تګ راتګ بندیز او د بیان پر ازادۍ بندیزونه شامل دي.

د افغانستان لپاره د ملګرو ملتونو د ځانګړي استازي د ټاکلو په اړه د يوې پوښتنې په ځواب کې مېرمن رودريګوز برکيټ وويل چې تر اوسه دې څوکۍ ته څوک نه دي نومول شوي.

د افغانستان لپاره د ملګرو ملتونو د ځانګړي استازي ټاکنه د امنیت شورا د نننۍ غونډې له مهمو موضوعاتو څخه ده چې طالبانو یې له وړاندې خپل مخالفت ښودلی دی.

د هند مشهوره سندرغاړی 'پنکج ادهاس' د ۷۲ کلونو په عمر ومړ

د هند مشهوره سندرغاړی پنکج ادهاس چې نن د فبرورۍ په ۲۶ مه د ۷۲ کلونو په عمر ومړ.
د هند مشهوره سندرغاړی پنکج ادهاس چې نن د فبرورۍ په ۲۶ مه د ۷۲ کلونو په عمر ومړ.

د هند یو مشهوره سندرغاړی پنکج ادهاس نن د فبرورۍ په ۲۶ مه د ۷۲ کلونو په عمر ومړ.

هندوستان ټایمز ورځپاڼې د ادهاس د کورنۍ په حواله دا خبر تایید کړی او لیکلي یې دي چې نوموړی له اوږدې مودې راهیسې په ناروغۍ اخته وو.

ادهاس د لومړي ځل لپاره په ۱۹۸۰ کال کې په سټېج کې سندرې پیل کړې او په ۱۹۸۶ کې د "چتهي آيي هې وطن سې" سندرې سره مشهور شو.

هغه د خپل څو لسیزو موسیقۍ فعالیت کې، ډېری معتبرې نړیوالې او ملي جایزې ګټلې دي.

په ۲۰۰۶ کې د هند حکومت پنکج ادهاس ته د "پدمشیري" په نوم د هنر ترټولو معتبره جایزه ورکړه.

د افغانستان په اړه د 'ریچارډ بینېټ' راپور د بشري حقونو شورا ته وړاندې کېږي

د افغانستان لپاره د ملګرو ملتونو ځانګړی راپور ورکوونکی ریچارډ بینېټ
د افغانستان لپاره د ملګرو ملتونو ځانګړی راپور ورکوونکی ریچارډ بینېټ

د افغانستان لپاره د ملګرو ملتونو ځانګړی راپور ورکوونکی ریچارډ بینېټ وایي چې په افغانستان کې د بشري حقونو د وضعیت په اړه د ده نوی راپور به د راتلونکې پنجشنبې په ورځ د فبرورۍ په ۲۹مه د ملګرو ملتونو د بشري حقونو د شورا ۵۵مې غونډې ته وړاندې شي.

بینېټ دا خبره نن دوشنبې په خپله ټولنیزه شبکه ایکس‌پاڼه یا پخواني ټویټر کې کړې، خو د محتوا په اړه یې نور جزییات نه دي ورکړي.

خو هغه ویلي چې په دې غونډه کې به چې د افغانستان په وخت د ماښام په شپږ نیمې بجې پیلېږي، دا راپوروړاندې شي او د دولتونو او مدني ټولنې ترمنځ به نظریات تبادله شي.

دا به په روانه اوونۍ کې دوهم ځل وي چې د ملګرو ملتونو دوه مهم ارګانونه د افغانستان پر وضعیت خبرې کوي.

ټاکل شوې د ملګرو ملتونو امنیت شورا نن دوشنبې د تړلو دروازو تر شا په یوه غونډه کې د افغانستان پر وضعیت بحث وکړي.

ټاکل شوې د ملګرو ملتونو عمومي منشي انټونیو ګوټېرېش په دې غونډه کې په ټوله کې د افغانستان د وضعیت، د نوموړي په مشرۍ په دوحه کې د تېرې اوونۍ د غونډې او همدارنګه د افغانستان لپاره د ملګرو ملتونو د یوه ځانګړې استازې د ټاکنې پر مسئلو خپل راپور وړاندې وکړي.

دا غونډې داسې مهال جوړېږي چې پر افغانستان واکمن طالبان له بشري حقونو په تېره د نجونو او ښځو د زده کړې او کار په برخو کې پرجدي سرغړونو تورن شوي دي.

نور راوښيه

XS
SM
MD
LG