د افغانستان د معترضو مېرمنو خود جوشه خوځښت، ملګرو ملتونو ته په یوه پرانیستي لیک کې چې یوه کاپي یې ازادي راډيو ته هم رالېږل شوې او د چهارشنبې په ورځ خپور شوی، د دې خوځښت د غړې منیژه صدیقي د وضعیت په اړه اندېښنه ښودلې.
په لیک کې راغلي چې مېرمن صدیقي چې د ۲۰۲۳ کال د اکتوبر په نهمه د طالبانو لخوا ونیول شوه او څه موده وروسته د څرخي پله زندان ته ولېږدول شوه، د نورو مواردو تر څنګ د طالبانو د مشرانو د عکس په سوځولو تورونه او په یوه نیم کال بند محکومه شوې ده.
خو په لیک کې دا تورونه رد شوي او لیکل شوي دي:
"هغه د جنسیتي اپارتاید پر ضد د مبارزې او د ښځو د بنسټيزو حقونو څخه د دفاع پرته هیڅ ګناه نه لري. "
د یاد خوځښت غړې، لیلا بسیم په زندان کې د منیژه صدیقي د وضعیت په اړه وویل:
" هغه مېرمن چې د خپلو حقونو او د افغانستان د ښځو د حقونو لپاره پورته شوې وه اوس د څرخي پله په زندان کې په ناوړه ډول شکنجه کیږي او خورا بد وضعیت کې ده. تر دې بدتره دا چې کورنۍ ته یې هم اجازه نه ورکول کیږي چې د هغې د روغتیا لپاره درمل یوسي."
د افغانستان د معترضو مېرمنو د خودجوشه خوځښت په لیک کې له ملګرو ملتونو غوښتل شوي چې په دې اړه مسوولانه، عملي او بېړنی اقدام وکړي.
همدا شان د ښځو او بشري حقونو فعاله، ترنم سعیدي وايي که د طالبانو د کړنو پر وړاندې بېړنی اقدام ونه شي، په افغانستان کې به د بشري حقونو ناورین رامنځته شي.
نوموړې ازادي راډیو ته وویل:
" که د دې ناوړه وضعیت لپاره کوم اقدام او ګډې کورنۍ او نړیوالې هڅې ترسره نه شي، د دې وضعیت پایلې به ډېرې وحشت ناکې وي."
ومو غوښتل د یاد خوځښت د ادعاوو په اړه د طالبانو حکومت نظر هم ولرو خو ویاند یې، ذبیح الله مجاهد په دې اړه زموږ پوښتنې ځواب نه کړې.
مجاهد تر دې مخکې طلوع نیوز خصوصي رسنۍ سره د خبرو پر مهال ویلي وو چې د ښځو د حقونو فعاله منیژه صدیقي او د زده کړې دوه نارینه فعالان: صدیق الله افغان او احمد فهیم عظیمي، د اسنادو او شواهدو پر بنسټ، د غیر قانوني او غیر شرعي کړنو په تور نیول شوي.
د بښنې نړیوال سازمان (ایمنیستي انټرنشنل) بیا د دوشنبې په ورځ د دوی لپاره د عدالت غوښتنې د کمپاین په دوام کې، د دغو فعالانو نیول خپلسري بللي او ویلي یې دي چې د طالبانو حکومت د دغو فعالانو پر ضد هېڅ اسناد نه لري، خو بیا هم دوی یې په بند کې ساتلي دي.
طالبانو پر افغانستان له بیا ځلي واکمنیدو وروسته، د دوی کړنلارو منتقدین، ګڼ شمېر معترضین او فعالان ونیول او بندیان یې کړل چې ځینې یې له څه مودې وروسته خوشې خو ځینې یې لا هم په بند کې دي.