د طالبانو حکومت د دفاع سرپرست وزیر مولوي محمد یعقوب مجاهد وايي، د افغانستان هوايي حریم اشغال شوی.
د طالبانو حکومت د دفاع سرپرست وزیر مولوي محمد یعقوب مجاهد د افغانستان د هوايي حریم د اشغالېدو په اړه اندېښنه ښيي.
نوموړي د پنجشنبې په ورځ په کابل کې د طالب ځواکونو د فراغت په یوې غونډه کې د افغانستان په هوايي حریم کې د بې پیلوټه الوتکو الوتنو ته اشاره کړې او ویلي چې د افغانستان هوايي حریم اشغال شوی دی.
مجاهد دغه شان د پوځي تسلیحاتو او تجهیزاتو پر زیاتېدو ټینګار کړی ویلي چې د پوهې پیاوړتیا ته اړتیا ده.
د طالبانو د حکومت د دفاع وزارت سرپرست ویلي، ټول ویني چې د افغانستان هوايي حریم اشغال شوی، خو څه کولای نه شي.
هغه زیاته کړه: "نن زمونږ او تاسې په سرونو ډرونونه الوتنې کوي، زمونږ او تاسې فضا یې اشغال کړې، زه هم ناهیلی ورته ګورم، ته هم ناهیلی ورته ګورې، وزیران، قومندانان، د قول اردوګانو مسوولان او جنرالان ټول اسمان ته ګوري، خو هېڅ هم کولای نه شو."
نوموړی دا خبرې داسې مهال کوي چې د افغانستان په هوايي حریم د بې پیلوټه الوتکو د الوتنې راپورونه موجود دي.
پاکستاني پلاوي سره د لیدنو کتنو په اړه د طالبانو حکومت په وروستۍ اعلامیه کې چې د طالبانو ویاند ذبیح الله مجاهد په خپل تویټر پاڼه خپره کړې راغلي چې په دغو ملاقاتونو کې د بې پیلوټه الوتکو د الوتنو پر مهمې موضوع هم خبرې شوي دي.
په ورته وخت کې د پوځي چارو پوه اسدالله ندیم د افغانستان په فضا کې د بې پیلوټه الوتکو د الوتنو لامل د طالبانو حکومت تګلاره بولي.
نوموړي په دې اړه ازادي راډیو ته وویل: "ښه دی چې د ښاغلي مجاهد دې ته پام شوی، چې افغانستان یو ناتوانه او بې دفاع هېواد دی. د افغانستان د ناتوانۍ یو لامل هم خپله طالبان دي. که طالبان خپلې دې تګلارې ته ادامه ورکړي افغانستان به لاناتوانه او کمزوری شي، اوس خو د ځواکمنو هېوادونو الوتکې د افغانستان په فضا ګرځي، خو ممکن په راتلونکې کې کمزوري هېوادونه هم دا کار وکړي، ځکه افغانستان افغانستان د طالبانو د تګلارو له امله د هرې ورځې په تېرېدو نور هم کمزوری کېږي."
دا په داسې حال کې ده چې یوې امریکايي بې پیلوټه الوتکې د ۲۰۲۲ کال د جولای په میاشت کې د کابل ښار په مرکز کې د القاعده شبکې مشر ایمن الظواهري په خپل استوګن ځای کې په نښه او وواژه.
طالبانو هغه مهال د ایمن الظواهري د حضور په اړه بې خبري وښوده ویې ویل چې د امریکا دا اقدام د افغانستان د هوايي حریم نقض دی.
خو د امریکا په ګډون د نړۍ بېلابېل هېوادونه په افغانستان کې د ترهګرو ډلو په ځانګړي ډول داعش د پراختیا په اړه په اندېښنه کې دي وايي چې دغه هېواد باید یو ځل بیا د ترهګرو په امن پټنځای بدل نه شي.
طالبانو بیا تل دا موضوع رد کړې او ویلي، چاته به اجازه ورنه کړي چې د افغانستان خاوره د نورو هېوادونو په ضد وکاروي.
