د لاسرسۍ وړ لېنکونه

تازه خبر
یکشنبه ۲۶ وری ۱۴۰۳ کابل ۱۰:۲۱

رواداري سازمان: تېرو ۱۵ مياشتو کې طالبانو ۶۳۴ پخواني پوځيان او مخالفين په قصدي ډول وژلي دي


د طالبانو د ګزمې يو موټر، انځور - ارشيف
د طالبانو د ګزمې يو موټر، انځور - ارشيف

رواداري سازمان په یوه راپور کې چې د چهارشنبې په ورځ خپور شو، ادعا کړې چې د طالبانو د واکمنۍ په پنځلسو میاشتو کې په ۴ ولایتونو کې ۶۳۴ تنه ملکي وګړي، پخواني پوځيان، سلفیان، د ملي مقاومت جبهې غړي او د طالبانو نور مخالفین وژل شوي دي.

د دغه سازمان د معلوماتو له‌مخې، دغه شمېر کسان د ۲۰۲۱ کال له اګست څخه د ۲۰۲۲ کال تر نومبر میاشتې پورې په کندهار، پنجشېر، ننګرهار او سرپل ولایتونو کې د قضا له حکم پرته او په قصدي ډول وژل شوي دي.

راپور وايي، له دې شمېر په کندهار کې د ۷ ښځو او ۱۰ ماشومانو په ګډون ۳۲۰ تنه په قصدي او د قضا له حکم پرته وژل شوي او د ۱۲ ښځو او ۵ ماشومانو په ګډون ۹۵ تنه ټپیان شوي چې ۲۳ تنه یې د پخواني حکومت سرتېري وو.

۷۰ یې له داعش سره د تړاو په تور، ١٣ تنه د دوو مېرمنو په ګډون په مرموز ډول او د نامعلوم لامل له‌مخې وژل شوي دي.

د دغه سازمان د راپور له‌مخې، په ننګرهار کې د هغو ۱۰۱ کسانو له ډلې چې په مرموز ډول وژل شوي، ۷۰ یې له داعش سره د تړاو په تور، ١٣ تنه د دوو مېرمنو په ګډون په مرموز ډول او د نامعلوم لامل له‌مخې وژل شوي دي.

همدا شان ۵ دیني عالمان، ۸ پخواني دولتي کارکوونکي، یو خبریال او ٣ مدني فعالان وژل شوي دي.

له پنجشېر ولایت څخه د رواداري سازمان راپور ښيي چې طالبانو د ۲۰۲۱ کال له سپټمبر مياشتې څخه د ۲۰۲۲ کال د نومبر تر پایه چې دغه ولايت يې تر کنترول لاندې دى، د ملي مقاومت جبهې ۶۳ غړي چې نیول شوي و او یا هم تسلیم شوي وو د طالبانو وژلي دي.

راپور کې راغلي، چې طالبانو شاوخوا ۵۰ ملکي وګړي ملي مقاومت جبهې سره د تړاو په تور وژلي دي.

د مقاومت د ملي جبهې د يو قوماندان جسد چې د طالبانو له لوري وژل شوی.
د مقاومت د ملي جبهې د يو قوماندان جسد چې د طالبانو له لوري وژل شوی.

دا هغه ادعاوې دي ، چې طالبانو تل رد کړې دي.

همدارنګه د رواداري سازمان د راپور له‌مخې په سرپل ولایت کې د وژل شویو ۱۰۰ کسانو په منځ کې ډېرى هغه کسان دي، چې له طالبانو سره په جګړه کې وژل شوي دي.

یو یې د خلکو هدفي وژنې دي په تېره د پخواني پوځیانو او با نفوذه سیمه‌ییزو خلکو وژنه

د افغانستان د بشري حقونو خپلواک کمېسیون پخوانې رئیسه او د رواداري سازمان اجرائیوي رئيسې شهرزاد اکبر ازادي راډیو ته وویل: "زمونږ مطلب دوه ډوله قتلونه دي، یو یې د خلکو هدفي وژنې دي په تېره د پخواني پوځیانو او با نفوذه سیمه‌ییزو خلکو وژنه، چې د طالبانو له‌خوا نه څېړل کېږي. او بل ډول هغه وژنې دي چې طالب پوځیان ملکي وګړي وژني لکه د اسیرانو وژنې او د هغه خلکو وژنې چې د داعش او د ملي مقاومت جبهې سره د اړیکو په تور وژل شوي دي."

د اغلې اکبر په وینا، د طالبانو له‌خوا د عمومي عفوې له اعلان سره سره، د طالبانو په واکمنۍ کې افغانستان د پخوانیو سرتېرو، خبریالانو او د طالبانو د متنفذینو لپاره نا امنه دی.

شهرزاد اکبر
شهرزاد اکبر

خو د طالبانو د حکومت ویاند ذبیح الله مجاهد او د طالبانو د حکومت د دفاع او کورنیو چارو وزارتونو ویاندويانو د رواداري سازمان په راپور کې شوې ادعاوې رد کړې.

بل‌خوا د پخواني حکومت د ملي دفاع وزارت د جنرال، محمد ابراهیم جهادیار خپلوانو ازادي راډيو ته وویل چې، نوموړی د اکتوبر په ۲۷مه د طالبانو له‌خوا نیول شوی او د چهارشنبې په ورځ وژل شوی دی.

د نوموړي يو خپلوان، چې نه‌يې غوښتل نوم او غږ يې په راپور کې خپور شي، ادعا کړې، چې محمد ابراهيم جهاديار د طالبانو له‌خوا نيول شوى او وژل شوى دى.

خو د طالبانو د حکومت د دفاع وزارت ویاند عنایت الله خوارزمي ازادي راډيو ته په یوه لیکلي پیغام کې دا ادعا رد کړه.

د رواداري سازمان په راپور کې له طالبانو غوښتل شوي، چې د خپلو ځواکونو له لوري له قضا پرته او هدفي وژنې ودروي او د دې ډول اعمالو عاملین دې مجازات کړي.

دغه سازمان چې شاوخوا یوه میاشت وړاندې یې خپل شتون اعلان وکړ، وايي چې د طالبانو له بیاځلي واکمنېدو وروسته یې په افغانستان کې د بشري حقونو په برخه کې کار پیل کړی او کارکوونکي یې په بېلابېلو ولایتونو کې له بشري حقونو د سرغړونو قضیې ثبتوي.

که څه هم د طالبانو حکومت په وار وار د پخواني رژيم د کارکوونکو په هدفي وژنو کې د خپلو کسانو لاس لرل رد کړي، خو د ملګرو ملتونو په ګډون بېلا بېلو نړيوالو سازمانونو طالبان د خپل مشر د عمومي بښنې د حکم په نه مراعاتولو او د پخواني رژيم تر سلو د ډېر کسانو په وژلو یې تورن کړي دي.

نیویارک ټایمز هم د ۲۰۲۲ کال د اپرېل په ۱۲مه راپور ورکړ چې یوه څېړنه یې ترسره کړه او دا یې وموندل چې طالبانو د خپلې واکمنۍ په لومړیو شپږو میاشتو کې د پخواني حکومت ۵۰۰ پوځي افسران وژلي او یا یې په زوره ورک کړي دي.

هغه څه چې طالبانو رد کړل.

اړوند مطالب

XS
SM
MD
LG