د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۸:۱۲

جرمني د طالبانو له‌خوا په عام محضر کې د حدودو عملي کول ناوړه عمل وباله


د طالبانو بیرغ
د طالبانو بیرغ

د طالبانو له‌خوا په عام محضر کې د حدودو عملي کېدو ته جرمني په خپل غبرګون کې دا یو ناوړه عمل بللی.

جرمني په درو د افغانانو وهل له انساني کرامت سرغړونه بللې.

په افغانستان کې د جرمني سفارت چې اوس له برلین او دوحې فعالیت کوي په خپله رسمي ټویټرپاڼه لیکلي، دوی په درو د افغانانو وهل غندي.

په ټوېټ کې راغلي: "په افغانستان کې د طالبانو د واکمنۍ پر مهال افغانان یو ځل بیا په عام محضر کې په درو وهل کېږي. موږ د انساني کرامت دا ناوړه عمل په کلکه غندو."

جرمني طالبان مکلف ګڼي چې د نړیوالو قوانینو او د شکنجې د مخنیوي په برخه کې د ملګرو ملتونو کنوانسیون رعایت کړي.

خو د طالبانو د بهرنیو چارو وزارت د جرمني دې غبرګون ته خورا تُند عکس‌العمل ښودلی.

د طالبانو د بهرنیو چارو وزارت ویاند عبدالقهار بلخي دې ټویټ ته په ځواب کې لیکلي، د شریعت عملي کول عدل دی.

هغه جرمني په نژاد پرستۍ او د اجباري کار کولو په کمپونو لرلو تورن کړی او دا ډول څرګندونې یې د اندېښنې وړ بللي.

له دې وړاندې د طالبانو ویاند ذبیح‌الله مجاهد د نړیوالو بشر پاله سازمونو او تر خوا یې د ځینو هېوادونو له‌خوا په عام محضر کې د افغانانو په درو وهلو ته غبرګون ښودل، د اسلام سپکاوی بللی و.

د طالبانو ویاند ذبیح‌الله مجاهد
د طالبانو ویاند ذبیح‌الله مجاهد

د طالبانو له‌خوا په لوګر کې د ۳ ښځو په ګډون د ۱۲ تنو په درو وهل د دې لامل شول چې یو ځل بیا طالبان د بشري حقونو په نقض او تر خوا یې له انساني کرامت په سرغړونې تورن شي.

طالبان دغه شان ډول تورن دي چې له ښځو سره جنسیتي تبعیض کوي او د هغوی د زده‌کړو، کار او ټولنیز او سیاسي مشارکت پر وړاندې یې خنډونه رامنځته کړي دي.

خو دوی بیا له خپلو دې پرېکړو دفاع کوي او وايي، د اسلامي په چوکاټ کې یې ښځو ته حقوق ورکړي، هغه چوکاټ چې تر اوسه یې طالبانو په اړه یو روښانه تعریف نه‌دی وړاندې کړی.

اړوند مطالب

XS
SM
MD
LG