هيل ورځپاڼه:
له امریکا خپرېدونکې "هیل" ورځپاڼې په خپلې وروستۍ ګڼه کې لیکي، ډېر ژر به د امریکا د متحدهایالتونو د استازو د جرګې د بهرنیو اړیکو کمېټه له افغانستان څخه د دغه هېواد د ځواکونو د ایستلو په اړه بحث وکړي.
د ورځپاڼې په ټکو، دغه ناسته به د مارچ په اتمه جوړه شي او د هغه مشران چې له افغانستان څخه د سرتېرو او نورو کسانو د ویستلو مسولیت یې پر غاړه و، دې ناستې ته وربلل شوي دي.
ورځپاڼه لیکي، د جوبایډن ادارې تر اوسه له ګډوډیو ډکې دې وتنې په اړه د توضحیاتو له ورکولو ډډه کړی، خو د هیل ورځپاڼه لیکي، اوس د کمېټې جوړښت بدلون کړی او غړی يې هیلهمن دي چې، د ولسمشر بایډن اداره دې ته اړ کړي چې د دې اقدام په اړه د امریکا د استازو جرګې او د امریکا خلکو ته معلومات ورکړي.
په همدې ورځ چې د امريکا د متحدهايالاتو د استازو د مجلس د بهرنيو اړيکو کمېټه له افغانستان څخه د امريکا د وتلو په اړه بحث کوي، په ټوله نړۍ کې د ښځو نړيواله ورځ لمانځل کېږي.
ددې ورځې په درشل کې نړیوالو ورځپانو او رسنیو د افغانو ښځو وضعیت ته پام اړولی دی.
ګلوب اینډ میل ورځپاڼه:
د ګلوب اینډ میل ورځپاڼې د افغانو ښځو د حقونو له فعالې او د نوبل سولې جایزې ته نوماندې محبوبې سراج سره مرکه خپره کړی دی.
ورځپاڼه وايي، مېرمن سراج چې د ښځو د حقونو ملاتړې ده، د ۲۰۲۱ کال د اګست په میاشت کې واک ته د طالبان له بیا ستنېدو وروسته يې پرېکړه وکړه چې، په افغانستان کې پاتې شي او د ښځو د حقونو ملاتړ ته دوام ورکړي، هغه مهال چې ډېرې افغان ښځې په الوتکو کې سپرې او له افغانستان څخه ووتلې.
مېرمن سراج په خپلو مرکو د هغې ډلې ګلوب اینډ میل سره ویلي، په خپله هره لیدنه کې له طالبانو غواړي چې د ښځو اندېښنو ته پام وکړي او د خبرو اترو دروازې د خلکو د ستونزو د حل لپاره خلاصې کړي.
مېرمن سراج وایي، په افغانستان کې د پاتې کېدو یوازینی علت یې د افغانو ښځو ترڅنګ درېدل دی.
هغې ګلوب اینډ میل سره په مرکه کې ویلي، غواړي د خلکو سره نږدې و اوسي.
هغه ټینګار کوي چې دنده يې د افغانستان د ښځو تر څنګ درېدل دي.
د مېرمن سراج په خبره دغه ښځې ورته اړتیا لري په ځانګړی ډول نوی او ځوان نسل.
نوموړې وايي، خوشاله ده چې د دې ښځو سره ده.
۷۵ کلنه محبوبه سراج چې د افغانستان د پخواني پاچا امان الله خان ورېره ده، په یوه مرکه کې يې ویلي وو، که په داسې یوه هېواد کې چې د ناڅرګند راتلونکې پر لور روان دی، د ژوند کولو لپاره د ځواک او باور یوه وړه سرچینه وي، هغه خوشاله ده چې افغانستان پرېنږدي.
هغه په پای کې وايي، غواړي خپل پاتې ژوند په افغانستان کې تېر کړی او همدلته ومري.