د ناټو سرمنشي ینس سټولټنبرګ وايي، اوکراین د خپلو متحدانو په "قوي ملاتړ" د روسیې د ځواکونو د شاتګ لپاره په خپله جګړه کې لاسبری کېدای شي.
ستولتنبرګ دا خبره پرون (پنجشنبې) په پراګ کې د ناټو د ۳۲ غړو هېوادونو د بهرنیو چارو وزیرانو تر غونډې مخکې وکړه چې له اوکراین سره پر پوځي مرستو د خبرو لپاره دایریږي.
د چک په پلازمېنه کې د ناټو په غونډه کې، چې د امریکا د بهرنیو چارو وزیر انتوني بلېنکن به هم په کې ګډون وکړي، د اوکراین لپاره د هغو تازه مرستو په اړه خبرې کېږي چې د جولای په میاشت کې په واشنګټن کې د ناټو په سرمشریزه کې وړاندې کیږي.
ستولتنبرګ پرون له غونډې مخکې په خبرو کې وویل، اوس د هغو هېوادونو لپاره چې اوکراین ته پوځي مرستې ورکوي د دې وخت رارسېدلی چې د هغو محدودیتونو په اړه خبرې وکړي چې څه باندې دوه کاله وړاندې د روسیې د بشپړ یرغل په مهال پر کییف لګول شوي وو.
روسیې په وروستیو میاشتو کې د اوکراین پر ضد هوايي او ځمکني بریدونه ډېر کړي او دا په داسي حال کې ده چې اوکراین د وسلو له کمښت سره مخامخ دي.
کییف د مهماتو په رسولو کې د چټکتیا او همداراز د اوږد واټنه وسلو د کارولو د اجازې غوښتنه کړې ده.
اوکراین د خپلو متحدانو له لوري له دې منع دی چې د روسیې پر خاوره بریدونه وکړي.
په تېرو څو ورځو کې روسیې د اوکراین پر دوهم لوی ښار خارکیف او همدارنګه دونیڅک سیمې باندې بریدونه زیات کړي دي. روسي چارواکي وايي، د دغه هېواد پوځ هڅه کوي چې د اوکراین په شمال ختیځ کې د نیول شویو برخو او د اوکراین ترمنځ حایل سیمه رامنځته کړي.
د پنجشنبې په ورځ (د جون په لسمه) د اوکراین د پوځ عمومي قوماندان وویل چې د خارکیف سیمې شمالي برخې ته نژدې د روسي ځواکونو شمېر ډېر شوی دی.
رویټرز خبري اژانس د جنرال الکساندر سرسکي له خولې ویلي، روسیه د اوکراین په ختیځ کې خپل ځواکونه زیاتوي، خو د دغو ځواکونو شمېر دومره نه دی چې "یو لوی برید پیل کړي".
روسیې په دې میاشت کې د خارکیف ځینې برخې ونیولې او په دې توګه یې په تېرو ۱۸ میاشتو کې د اوکراین په ختیځ کې تر ټولو لوی پرمختګ وکړ.
د اوکرایني جنرال په وینا د دغه هېواد پوځ هم په سیمه کې "خپلې دفاعي کرښې پیاوړې کوي".
په همدې حال کې د امریکا د باندنیو چارو وزیر بلېنکن چې مالدووا ته له سفر وروسته پراګ ته رسېدلی،سمدستي له خپل چکي سیال جان لیپتوفسکي سره د روسیې د ناسمو تبلیغاتو د مخنیوي په اړه خبرې وکړې او ویې ویل چې مسکو هڅه کوي د اوکراین د ملاتړو او متحدانو ترمنځ درز رامنځته کړي.
