د افغانستان د خبریالانو مرکز د رسنیو د وضعیت په اړه د اندېښنې له څرګندولو سره، په رسنیو کې د ښځو پر کار د بندیز د احتمال او د هغې د پایلو په اړه خبرداری ورکوي.
یاد شوي مرکز د چهارشنبې په ورځ د یوې اعلامیې له خپرولو سره دا اندېښنه وروسته له هغې څرګنده کړه چې د طالبانو حکومت د امر بالمعروف او نهې عن المنکر وزارت سرپرست، محمد خالد حنفي په یوه غونډه کې خبرداری ورکړ چې که ښځې په رسنیو کې د را څرګندېدو پر مهال د دوی مشخصې لارښوونې مراعات نه کړي؛ نو احتمال شته چې په رسنیو کې د ښځو پر کار بشپړبندیز ولګوي.
د افغانستان د خبریالانو مرکز د معلوماتو له مخې، په دې غونډه کې چې د سه شنبې په ورځ په کابل کې د طالبانو حکومت د امر بالمعروف او نهی عن المنکر وزارت د چارواکو او د رسنیو د استازو تر منځ ترسره شوه، د دې وزارت ویاند، عبدالغفار فاروق، سپارښتنه وکړه چې د رسنیو ښځینه کارکوونکې دې له تورو جامو او د مخونو په پټولو سره چې یوازې سترګې یې ولیدل شي، راڅرګندې شي او هم دې له هغو ښځو سره چې حجاب نه مراعتوي، له مرکو کولو ډډه وشي.
د یاد شوي مرکز په اعلامیه کې همدا شان راغلي: ښاغلي حنفي خبرداری ورکړی چې که دغه لارښوونې په پام کې ونه نیول شي؛ د دې احتمال شته چې د طالبانو مشر ملا هبت الله اخوندزاده ښځې په رسنیو کې له کار کولو منع کړي.
د افغانستان د خبریالانو مرکز د عدالت غوښتنې او اړیکو کمېټې مسوولې، سمیې ولي زاده، ازادي راډيو سره په خبرو کې وویل چې پر رسنیو او خبریالانو د محدودیتونو له امله، د دوی قانوني ازادۍ ترې اخیستل شوي دي.
ولي زاده زیاتوي:
" دا په رېښتیا د اندېښنې وړ دی، د افغانستان د خبریالانو مرکز د دې محدودیتونو د لرې کولو غوښتنه کوي؛ ځکه د هغو تګلارو له امله چې صادر شوي دي، زموږ خبریالان محدود شوي دي. په حقیقت کې دا ټول د دې لامل شوي چې د خبریالانو او رسنیو قانوني ازادۍ په افغانستان کې سلب شي. "
په ورته وخت کې یو شمیر ښځینه خبریالانو ازادي راډيو ته وویل، د ښځو پر وړاندې دا ډول محدودیتونه او ننګونې، له ټولنې څخه د ښځو د حذفولو او دبیان د ازادۍ د نقضولو لپاره د خطر زنګ دی.
یوې ښځینه خبریالې د حساسیت له امله د نوم نه ښودلو او غږ بدلولو په شرط ازادي راډيو ته وویل:
"د ښځو پر وړاندې دا محدودیتونه او ننګونې، له ټولنې څخه د ښځو د حضور د کمولو لپاره یو قدم دی چې اخیستل کیږي. زموږ په شان د خبریالو میرمنو ویره او اندیښنه دا ده چې دا محدودیتونه زیات نه شي او موږ سبا د دې شاهدان واوسو چې ښځې نور په رسنیو کې حضور ونه لري. "
یوه بله ښځینه خبریاله هم په ورته شرط وایي:
"که دا ډول محدودیتونه ډير شي، موږ به واقعا له یوې تیارې راتلونکې سره مخ شو. موږ د دې محدودیتونو له پایلو څخه وېره لرو."
د افغانستان د خبریالانو مرکز څېړنې ښيي، په داسې حال کې چې د طالبانو حکومت د تېر جمهوري نظام د رسنيو قوانین د تطبيق وړ بللى، خو دوی د خپلې بیا واکمنۍ له پیل راهیسې د رسنيو او خبريالانو په اړه لږ تر لږه ١٧ فرمانونه صادر کړي چې د رسنیو له قانون سره سمون نه لري او د خبریالانو او ازادو رسنیو لپاره یې کاري چاپېریال محدود کړی دی.
