د طالبانو حکومت د لوړو زده کړو وزارت، د افغانستان ټولو دولتي پوهنتونونو ته امر کړی چې له کتابتونونو څخه دې د جمهوري دورې کتابونه لرې او پر ځای دې د «سیرت النبي» کتابونه ځای پر ځای کړي.
د هغه مکتوب یوه کاپي چې د یاد وزارت د سرپرست ندا محمد ندیم له خوا لاسلیک شوې، ازادي راډیو ته رسېدلې.
په دې مکتوب کې چې د طالبانو د لوړو زده کړو وزارت د بېلابېلو سرچینو له خوا ازادي راډیو ته تایید شوی، ویل شوي چې ټول دولتي پوهنتونونه دې د سلفیانو، تحریریانو، شیعه ګانو او حزبیانو کتابونه لرې او پر ځای دې سیرت النبي کتابونه ځای پر ځای کړي.
په دغه مکتوب کې چې د ۱۴۴۵ هـ ق کال د جمادي الاول په ۲۸مه خپور شوی، د طالبانو د حکومت د لوړو زده کړو وزارت سرپرست پوهنتونونو ته امر کړی چې د نویو کتابونو له ځای په ځایولو مخکې دې له هغه سره لېست شریک کړي.
د هېواد په خصوصي پوهنتون کې استاد او د طالبانو حکومت د لوړو زده کړو وزارت د ارشاد او دعوت د ریاست استازي، میر ظفرالدین انصاري د پنجشنبې په ورځ ازادي راډيو ته وویل چې دغه مکتوب د یاد ریاست له لارې د افغانستان دولتي پوهنتونونو ته استول شوی دی او ډېر ژر د هغې د تطبیق ډاډ ترلاسه کولو په موخه به پوهنتونونو ته یو پلاوی واستوي.
نوموړی زیاتوي:
" د ارشاد او دعوت ریاست لخوا پوهنتونونو ته یو مکتوب لېږل شوی او ټول پوهنتونونه دې ته مکلف دي چې دا کتابونه راټول کړي، که نه نو له وزارت څخه هیأت ځي او هغه کتابونه راټولوي، او شاید د هغه په ځای نور کتابونه خپله او یا پوهنتون وپېري او د هغو کتابونو پر ځای یې کېږدي."
د طالبانو حکومت د لوړو زده کړو وزارت نورې سرچینې ازادي راډيو ته وویل چې دغه فرمان به ډېر ژر په خصوصي پوهنتونونو کې هم عملي شي.
د پوهنتونونو یو شمېر پخواني استادان د طالبانو حکومت د لوړو زده کړو وزارت د نوي فرمان په غبرګون کې وايي چې دا پرېکړه به د دې لامل شي چې د افغانستان اوسنی نسل د ننني پرمختللو علومو له کاروان وروسته پاتې شي.
د البیروني پوهنتون د حقوقو او سیاسي علومو پخواني استاد ارش شهیرپور په دې اړه ازادي راډيو ته وویل:
"دا کار نه یواځې دا چې ګټه نه لري، بلکې هغه کسانو چې د هېواد دننه، کتابونه یې مطالعه کول، هغوی به مطالعه پرېږدي او په پای کې به داسې وشي چې موږ به د نني عصر د علم له کاروان څخه وروسته پاتې شو، او په راتلونکي نسلونو کې د وړاندې کولو لپاره به څه نه لرو."
د طالبانو د لوړو زده کړو سرپرست وزیر، ندا محمد ندیم چې د طالبانو مشر ملا هبت الله ته له نږدې کسانو څخه شمېرل کیږي، په سخت دریځۍ تورن شوی او تر دې وړاندې یې تل داسې فرمانونه او څرګندونې کړي دي چې غبرګونونه یې راپارولي دي.
کابو یو نیم کال وړاندې د طالبانو حکومت د لوړو زده کړو وزارت ټولو دولتي او خصوصي پوهنتونونو ته د یوه مکتوب په استولو سره د اسلامي ثقافت څانګه له اتو کریډیټو څخه ۲۴ کریډیټو ته لوړه کړه.
په دغه مکتوب کې ویل شوي و چې ثقافت په ټولو تحصیلي څانګو کې باید په اوونۍ کې درې ساعته له یو شمیر موضوعاتو لکه: تجوید، سیرت النبي او د اسلام سیاسي نظام له مضامینو سره تدریس شي.
د طالبانو حکومت د لوړو زده کړو وزارت، په داسې حال کې د افغانستان په تحصيلي نظام کې دغه فرمانونه پلي کوي چې په دغه هېواد کې پوهنتونونه یوازې د هلکانو پر مخ خلاص دي.
په افغانستان کې د طالبانو له بیا واکمنۍ وروسته، د ۲۰۲۲ کال په وروستیو کې د پوهنتونونو دروازې د نجونو پر مخ بندې شوې.
په افغانستان کې د طالبانو حکومت لخوا د نجونو په زده کړو بندیز له امله د پراخو نیوکو وروسته، د طالبانو د حکومت د لوړو زده کړو سرپرست وزیر مولوي ندا محمد ندیم تل له دې پرېکړې دفاع کړې ده.
دا په داسې حال کې ده چې د طالبانو د واکمنۍ پر مهال د افغانستان له تعلیمي موسسو څخه یو زیات شمېر متخصص استادان له هېواده بهر تللي او د هېواد ډېری پوهنتونونه، د تدریس لپاره د مسلکي استادانو له کمښت سره مخ دي.
