د کار او روغتیا نړیوال سازمانونه په افغانستان کې د ښځو وضعیت د اندېښنې وړ بولي.
د کار نړیوال سازمان په افغانستان کې د ښځو د کاري بوختیاوو کچه د اندېښنې وړ بولي او وایي، تېر یوه نیم کال کې دا بوختیاوې د پام وړ کمې شوي دي.
په دغه سازمان کې د افغانستان د څانګې همغږي کوونکي رامین بهزاد د چهارشنبې په ورځ د مارچ په اتمه ازادي راډیو ته وویل، د ښځو د کاري فرصتونو په کمولو کې سیاسي بدلونونو ډېر رول لوبولی دی.
بهزاد وايي: "لکه څنګه چې لیدل کېږي، په خواشینۍ سره چې په افغانستان کې ښځې او کار لرونکې مېرمنې تر ډېره دغو تحولاتو او بدلونونو اغېزمنې کړي دي، د دوی د بوختیاوو کچه ډېره کمه شوې."
تر دې یوه ورځ مخکې د کار نړیوال سازمان په افغانستان کې د کاري بوختیاوو په اړه یو راپور خپور کړ چې په کې ویل شوي د ښځو کاري چارې ۲۵ په سلو کې او د نرینه و ۷ په سلو کې کمې شوي دي.
دغې سروې کې د ۲۰۲۱ کال دویمه ربعه یا د پخواني نظام وروستۍ میاشتې د ۲۰۲۲ کال له دویمې ربعې سره پرتله شوي دي.
د کار نړیوال سازمان په وینا، د هغو کسانو شمېر چې تېر یوه نیم کال کې بې کاره شوي دي، څه باندې نهو لکو ته رسېږي.
دا د هغې وړاندوینې یو نیم برابر زیاتې شمېرې دي چې تېر کال ملګرو ملتونو کړې وه.
د ښځو د کاري بوختیاوو د کموالي په اړه اندېښنې داسې مهال ښودل کېږي چې طالبانو په تېره ډسمبر میاشت کې په نادولتي کورنیو او نړیوالو موسسو کې د ښځو پر کار کولو بندیز ولګاوه.
له دې سره همهاله د روغتیا نړیوال سازمان ویلي په افغانستان کې د روغتیا څانګې ښځینه کارکوونکې له پراخو ننګونو سره مخامخ دي.
په افغانستان کې د دغه سازمان استازي ډاکتر لو ډیپانګ پرون د ښځو د نړیوالې ورځې په مناسبت یوه پيغام کې ویلي، دوی په ټول افغانستان کې اړمنو ښځو ته د رسېدو لپاره هڅې جارې ساتي.
ډیپانګ وویل: "تاسو ته ډاډ درکوم چې د روغتیا نړیوال سازمان روغتیایي او تعلیمي خدمتونو ته د لاسرسي په ګډون د ښځو د پیاوړي کولو د دفاع چارو ته دوام ورکوي."
د روغتیا نړیوال سازمان وایي، دا مهال په افغانستان کې ۱۷ میلیونه کسان روغتیایي خدمتونو ته اړتیا لري.
د نړیوال بانک د شمېرو له مخې چې تېره فبروري میاشت کې یې خپرې کړې، ۲۰۲۰ کال کې ښځې د افغانستان د کاري ځواک ۲۲ فیصده برخه جوړوله، خو اوس اټکل کېږي چې دا کچه ۱۶ فیصدو ته راټیټه شوې ده.
