د لاسرسۍ وړ لېنکونه

تازه خبر
پنجشنبه ۲ کب ۱۴۰۳ کابل ۰۷:۴۵

افغانستان

د ملګرو ملتونو سرمنشي یو ځل بیا د افغان ښځو پر وضعیت اندېښنه ښودلې

د ملګرو ملتونو سرمنشي انټونیو ګوټېریش
د ملګرو ملتونو سرمنشي انټونیو ګوټېریش

د ملګرو ملتونو سرمنشي یو ځل بیا په افغانستان کې د ښځو د وضعیت په اړه اندېښنه ښودلې او وايي، د افغانستان په ګډون په ځینو هېوادونو کې د ښځو حقونه د ورکېدو په حال کې دي.

انټونیو ګوټېریش بېګا د ښځو د وضعیت د څېړنې په هدف د ملګرو ملتونو په نوښت د سي ایس ډبلیو په نوم غونډې ته په وینا کې وویل په دې هېوادونو کې ښځې او نجونې عملاً له ټولنیز ژوند څخه حذف شوي.

هغه زیاته کړه، داسې مهال چې په نړۍ کې جنسیتي مساوات په پراخېدو دی، په دې هېوادونو کې له ښځو سره واټن نور هم زیات شوی.

د سرمنشي مرستیالې او د ملګرو ملتونو د ښځو د څانګې مشرې سیما باهوس د غونډې په پرانیستونو کې غونډه کې وویل چې طالبانو د هغو افغان مېرمنو د کورونو دروازې په نښه کړې دي چې د خپلو حقونو لپاره یې غږ اوچت کړی. د سي ایس ډبلیو غونډه پرون پیل شوه او د مارچ تر ۱۷مې نېټې پورې به دوام وکړي.

د ورځې تازه خبرونه دلته ولولئ

طالبان وايي، د روم په اساسنامه کې یې د افغانستان غړیتوب پای ته رسولی

د هالنډ په هاګ ښار کې د جرمونو د نړیوالې محکمې ودانۍ
د هالنډ په هاګ ښار کې د جرمونو د نړیوالې محکمې ودانۍ

د طالبانو سرپرست حکومت د پنجشنبې په ورځ (د فبروري ۲۰مه) په یوه اعلامیه کې وویل چې د روم په اساسنامه کې د افغانستان شاملیدل "قانوني اعتبار نه لري".

اعلامیه زیاتوي چې دا حکومت د نړیوالې جنایي محکمې (ICC) په وړاندې هیڅ قانوني مکلفیت نه لري.

دا په داسې حال کې ده، چې د نړیوالې جنايي محکمې څارنوال کریم خان په تېره جنورۍ میاشت کې د طالبانو د مشر او د طالبانو د حکومت د سترې محکمې د ريیس عبدالحکیم حقاني د نیولو د حکم غوښتنه اکړې وه.

د طالبانو سرپرست حکومت د ICC دا اقدام رد کړی او یاده پریکړه یې په "سیاسي انګېزه" بللې ده.

د جرمونو نړیواله محکمه په ۱۹۹۸ کال کې د روم د اساسنامې له مخې تاسیس شوه، او شاوخوا ۱۲۵ غړي هیوادونه لري. افغانستان په ۲۰۰۳ کال کې د روم له اساسنامې سره یوځای شو.

بینیټ به په افغانستان کې د بشري حقونو د وضعیت په اړه تازه راپور وړاندې کړي

د افغانستان لپاره د م.م. د بشري حقونو ځانګړی راپور ورکوونکی
د افغانستان لپاره د م.م. د بشري حقونو ځانګړی راپور ورکوونکی

په افغانستان کې د بشري حقونو په اړه د ملګرو ملتونو ځانګړی راپور ورکوونکی، ریچارډ بینټ به د جمعې په ورځ، د فبروري په ۲۸مه، د ملګرو ملتونو د بشري حقونو شورا په ۵۸مه غونډه کې، چې د دوحې تړون د لاسلیک له پنځمې کلیزې سره سمون خوري، په افغانستان کې د بشري حقونو د وضعیت په اړه خپل تازه راپور وړاندې کړي.

دا شورا به د دوشنبې په ورځ، د مارچ په ۳مه، د نړۍ له ګوټ ګوټ څخه د بشري حقونو راپورونه وڅیړي او د افغانستان، ایران، اوکراین، اشغال شویو فلسطیني سیمو، سوډان او بیلاروس په ګډون په یو شمیر هیوادونو تمرکز وکړي.

په جینیوا کې د فبرورۍ له ۲۴ څخه تر ۲۶ پورې د ملګرو ملتونو د بشري حقونو شورا د غونډې په لومړیو ورځو کې به مهم بحثونه وشي.

یاده غونډه به د دې سازمان په مرکزي دفتر کې د څه دپاسه سلو غړو هېوادونو د استازو په ګډون جوړه شي.

د سالنګ لویه لار د موټرو د تګ راتګ لپاره بیرته پرانیستل شوه

د سالنګ لویه لار د نسبتاً درنې واورې د اورېدو له کبله د موټرو د تګ راتګ لپاره بنده شوې وه، نن (کب دوهمه ) سهار یوولس بجې بېرته پرانیستل شوه.

د طالبانو د حکومت د ټولګټو وزارت ویندوی محمد اشرف حق شناس نن (پنجشنبې) په یوه خبرپاڼه کې ویلي و چې دا لار د تېرې شپې له یوولس بجو راهیسي بنده ده.

حق شناس همداراز ویلي و چې په سالنګ کې د واورې د اورېدو، شدیدو بادونو او لړې له کبله له موټر چلوونکو څخه غوښتل شوي و چې تر بلې خبرتیا پورې په دې لاره تګ راتګ ونه کړي.

خو د ټولګټو وزارت نن اعلان وکړ چې دا لاره بیرته پرانیستل شوې او لوی او کوچني موټر پرې رتګ راتګ کولی شي.

سالنک له شمالي ولایتونو سره د پلازمېنې کابل او جنوبي ولایتونو د تګ راتګ تر ټولو مهمه او اصلي لار ګڼل کېږي.

دا لار عموماً په ژمي د واورې د اورېدو له کبله په موقتي ډول بندیږي.

پرون د سالنګونو په شمول د افغانستان په یو شمېر ولایتونو کې واوره او باران واورېد.

د سالنګ لویه لاره له تېرې شپې راهیسې بنده شوې

د سالنګ لارې انځور، ارشیف
د سالنګ لارې انځور، ارشیف

د طالبانو د حکومت د فواید عامې وزارت وایي، د سالنګ لویه لاره د درنې واورې له کبله د ټولو وړو او باروړونکو موټرو په مخ بنده شوې ده.

د دغه وزارت ویاند محمد اشرف حق شناس نن پنجشنبه د کب دویمه پر خپله ایکس پاڼه/ پخواني ټویټر لیکلي، دغه لویه لاره له تېرې شپې ۱۱ بجو راهیسې تړل شوې.

ښاغلي حق شناس زیاته کړې چې د سالنګ لاره د لنډ وخت لپاره بنده شوې او د خلاصون هڅې یې روانې دي.

هغه له ټولو مسافرو او موټر چلونکو غوښتي چې تر راتلونکې اطلاع پورې دې پر دې لاره له تګ راتګه ډډه وکړي.


دا په داسې حال کې ده چې د ترانسپورت او هوایي چلند وزارت د هوا پيژندنې ریاست د افغانستان په شاوخوا ۲۷ ولایتونو کې د درنې واورې او باران اټکل کړی دی.

په تاشکند کې امریکايي او ازبک چارواکو د افغانستان د وضعیت په اړه خبرې کړي

د ازبکستان د بهرنیو چارو وزارت وايي، په تاشکند کې د امریکا سفیر جانیتن هینیک او د افغانستان لپاره د ازبکستان د ولسمشر ځانګړي استازي عصمت الله ایرګاشیف په یوه کتنه کې د افغانستان د اوسني وضعیت په اړه خبرې کړي دي.

په هغه اعلامیه کې چې د چهارشنبې په ورځ د (فبرورۍ۱۹مه) دې وزارت خپره کړې راغلي، په کتنه کې د نړیوالو هڅو په چوکاټ کې له افغانستان سره د اړیکو پر پراختیا خبرې شوي دي.

د اعلامیې په ټکو، دواړو خواوو ژمنه کړې چې د افغانستان د وضعیت د ښه والي لپاره به له نړیوالې ټولنې سره په ګډه خپلو هڅو ته دوام ورکوي.

دا کتنه په داسې حال کې ده، چې په ازبکستان کې د ملګرو ملتونو د کډوالو لوی کمېشنرۍ، په ترمز ښار کې د کارګو او نړیوال اکمالاتي مرکز د پرانستو خبر ورکړی دی.

دغه مرکز چې په ۲۰۲۲ کال کې جوړ شوی موخه یې افغانستان ته د نړیوالو بشري مرستو رسول دي.

د سږکال د بشري حقونو نړیواله جایزه دوو افغانو ښځو ته ورکړل شوې ده

مسعوده جلال او حسنا جلال
مسعوده جلال او حسنا جلال

د بشري حقونو د څه باندې ۳۰ بنسټونو ایتلاف ویلي، د سږکال د جېنوا د سرمشریزې د ښځو نړیواله جایزه په افغانستان کې د ښځو چارو پخوانۍ وزیرې مسعودې جلال او د هغې لور حسنا جلال ته ورکړل شوې ده.

د جېنوا سرمشریزې د سه شنبې په ورځ په یوې خبرپاڼه کې ویلي، دا جایزه د ټولو هغو افغان ښځو په استازیتوب چې د بشري حقونو لپاره یې هڅه کړې، مسعودې جلال او حسنا جلال ته ډالۍ شوې ده.

په خبرپاڼې کې وړاندې راغلي، مسعوده جلال لومړنۍ ښځه وه چې د افغانستان ولسمشریزو ټاکنو لپاره یې ځان نوماند کړی و.

د خبرپاڼې په ټکو، حسنا جلال هم د افغان ښځو غورځنګ جوړ کړی چې په نړیواله کچه د ښځو غږ پورته کوي.

دا جایزه د جینوا د بشري حقونو او ډیموکراسۍ په ۱۷مه کلنۍ غونډه کې د ټولو هغو افغان ښځو په استازیتوب ډالۍ شوې چې د انساني کرامت او برابرۍ لپاره یې مبارزې کړې دي.

د یوناما مشره: د فرهنګي ارزښتونو او میراثونو د ساتنې په اړه دې خلکو ته پوهاوی ورکړل شي

په افغانستان کې د ملګروملتونو د مرستندویه ماموریت یا یوناما مشرې روزا اوتانبایوا د طالبانو د حکومت د اطلاعاتو او کلتور وزیر خیرالله خیرخواه سره کتلي.

د طالبانو تر واک لاندې باختر خبري اژانس د چهارشنبې په ورځ د (فبرورۍ۱۹مه) پر خپلې ایکس پاڼې/پخواني ټویټر د دې کتنې خبر ورکړی او ویلي دي، دواړو خواوو په افغانستان کې د فرهنګي ارزښتونو او میراثونو د ساتنې په اړه خبرې کړي.

د یوناما د مشرې په ټکو، له فرهنګي ارزښتونو د خلکو خبرتیا او پوهای کولی شي، د دې ارزښتونو په ساتنه کې مرسته وکړي.

بل پل، باختر خبري اژانس بیا د خیرخواه په حواله ویلي، د اطلاعاتو او کلتور وزارت له نورو هېوادونو سره د اړیکو او تعامل په رامنځته کولو کې مهم رول لري.

د خیرخواه په ټکو، طالبانو غواړي له نړۍ سره مثبت تعامل او راکړه ورکړه وکړي.

نژدې څلور کاله کیږي چې طالبان بیا پر افغانستان واکمن شوي، خو تراوسه هیڅ هېواد د دوی حکومت په رسمیت نه دی پیژندلی.

طالبانو د عدلیې وزیر عبدالحکیم شرعي د استعفا راپورونه رد کړل

د طالبانو د حکومت د عدلیې وزارت وايي، د دغې وزارت له سرپرستۍ د عبدالحکیم شرعي د استعفا په اړه راپورونه ناسم دي.

د دې وزارت ویاند برکت الله رسولي چهارشنبې ناوخته په یوې خبرپاڼې ویلي، "د عدلیې وزیر د اسلامي امارت د مشر د حکم پر بنسټ د درملنې په موخه د دویم ځل لپاره متحده عربي اماراتو ته تللی دی ".

د رسولي په ټکو، شرعي به ډیر ژر بیرته افغانستان ته راستون شي.

د طالبانو له خوا د شرعي د استعفا د رد خبرونه وروسته له خپریږې چې په کابل کې یوې سرچینې د چهارشنبې په ورځ ازادي راډیو ته تایید کړې وه چې د طالبانو د مشر د پریکړو، په تیره بیا د نجونو د زده کړو د مخنیوي په اړه د دریځ له کبله د کابینې ډیر شمیر وزیران خوابدي شوي او استعفاوي یې کړي.

دې سرچینې دا هم تایید کړې وه، چې د شرعي په ګډون د ورکړو شویو وزیرانونو استعفاوې نه دي منل شوي.

دطالبانو د عدلیې وزارت په خبرپاڼه کې د شرعي استعفا رسنیزې ګنګونسې او شایعات بللي شوي.

چمپینز ترافي، نیوزلنډ پاکستان ته ۳۲۱ منډې هدف ورکړ

د پاکستان او نیوزلنډ لوبډله
د پاکستان او نیوزلنډ لوبډله

د چمپینز ټرافي لوبلړۍ په لومړۍ لوبه کې نن نیوزلنډ او پاکستان لوبه لري.

نیوزلنډ په ټولو پنځوسو اورونو کې د پنځو لوبغاړو په سوځیدو د پاکستان لوبډلې ته ۳۲۱ منډې هدف ورکړ.

پاکستان چې د نننۍ لوبې پچه یې ګټلې وه، لږ وروسته خپل بیټینګ پيلوي.

افغانستان په دې لړۍ کې د لومړي ځل لپاره برخه اخلي او د جنوبي افریقا، انګلستان او آسټرالیا له ځواکمنو لوبدلو سره په B ګروپ کې لوبېږي.

د افغان لوبډلې لومړۍ لوبه د جمعې په ورځ د فبروري په ۲۱مه له جنوبي افریقا سره پلان شوې، دوهمه لوبه به یې د فبروري په ۲۶مه له انګلستان او دریمه به یې د فبروري په ۲۸مه له اسټرالیا سره وي.

د چمپینز ټرافي لوبې دا ځل په دوو هېوادونو، پاکستان او متحده عربي اماراتو کې ترسره کېږي ځکه د هند لوبغاړو نه غوښتل پاکستان ته ولاړ شي.

پاکستاني چارواکي: د افغانستان واکمنان دې د کډوالو منلو او ادغام ته زمینه برابره کړي

پاکستان کې افغان کډوال
پاکستان کې افغان کډوال

د پاکستان د بهرنیو چارو وزارت وایي، د طالبانو حکومت باید په افغانستان کې داسې شرایط رامنځته کړي چې ورستانه شوي کډوال په کې بشپړ مدغم شي.

د دغه وزارت د ویاند دفتر په اسلام اباد کې د طالبانو د شارژدافیر د خبرو په غبرګون کې یوه اعلامیه ورکړې او په کې یې ویلي، هلته له افغان کډوالو سره د ناوړه چلند خبره واقعیت نه لري.

په دغې خبرپاڼه کې چې نن چهارشنبه ( د کب په لومړۍ نیټه) خپره شوې راغلي چې پاکستان لسیزې د میلیونونه افغانانو کوربه توب کړی خو زیاته شوې چې اوس دوی له افغان واکمنانو سره په ګډه کار کوي چې د هغوی ستنیدو ته هوسا شرایط برابر کړي.

دغه څرګندونې وروسته تر هغه کیږي چې په اسلام اباد کې د طالبانو شارژدافیر وویل، اسلام اباد او راولپنډۍ کې افغان اتباع د پولیسو له لوري نیول او پلټل کیږي.

سردار احمد شکیب ویلي دغه پروسه په نا اعلان شوي شکل پیل شوې او په اسلام آباد کې د افغانستان سفارت ته هم په دې اړه کومه رسمي مکتوبي اطلاع نه ده ورکول شوې.

هغه زیاته کړې چې له اسلام اباد او راولپنډۍ څخه د افغانانو اخراج پیل شوی او نژدې راتلونکې کې به د پاکستان نورو سیمو ته هم وغځیږي.

نور راوښيه

XS
SM
MD
LG