د طالبانو ستره محکمه په کندهار او غزني ولایتونو کې پر شپږو کسانو د درې وهلو د تعزیري سزا د تطبیق خبر ورکوي.

دې محکمې پرون پنجشنبې په جلا بیانونو کې ویلي چې د کندهار په میوند ولسوالۍ کې پر لواطت تورنو پنځو کسانو د ۳۰ درو وهلو حکم تطبیق شو.

دې محکمې همدارنګه ویلي چې په غزني کې په غلا تورن پر یو کس د ۳۹ درو وهلو سزا تطبیق شوه.

په څه باندې یوه اوونۍ کې د طالبانو د محکمو له خوا پر شاوخوا ۳۰ کسانو دا ډول تعزیري سزاګانې عملي شوې دي.

د بشري حقونو فعالان او مدافعان د طالبانو پر قضایي نظام انتقاد کوي او وایي تورن کسان مدافع وکیل ته له لاسرسي پرته د طالبانو له‌خوا مجازات او زنداني کېږي.

د جرمني د نړیوالې همکارۍ ادارې یا "جي‌ای‌زیټ" GIZ ویلي نیت لري چې خپل ټول جرمني کارکوونکي له افغانستانه وباسي.

د جرمني د "آراین‌‌‌ډي" RND رسنۍ د راپور له مخې دې ادارې ویلي چې له ۲۰۲۵م کال وروسته به په افغانستان کې هېڅ کورنی کارکوونکی استخدام نه‌کړي.

دې ادارې په افغانستان کې د خپلو فعالیتونو د بندېدو د عواملو په اړه جزییات نه دي ورکړي، خو ویلي یې دي چې د ټولو ۱۶۰ افغان کارکوونکو قراردادونه به د روان ۲۰۲۴م کال ترپایه د اعتبار وړ وي.

د "جي‌آی‌زیټ" ادارې ویاند ویلي چې په افغانستان کې د دې ادارې راتلونکې پروژې به د غیردولتي سازمانونو له لارې پلې شي.

د جرمني د نړیوالې همکارۍ ادارې له ۲۰۰۲م کال راهیسې په افغانستان کې کار پیل کړی او د تعلیمي او روغتیایي خدماتو په ګډون یې په مختلفو برخو کې فعالیتونه سرته رسولي دي.

د پاکستان صدراعظم شهباز شریف له نړیوالې ټولنې وغوښتل چې په افغانستان کې د اقتصادي او پراختیایي اړتیاوو د تامین لپاره د طالبانو له سرپرست حکومت سره معنا لرونکی تعامل وکړي.

شریف دغه غوښتنه پرون پنجشنبې د قزاقستان په پلازمېنه استانه کې د شانګهای د همکارۍ د سازمان سرمشریزې ته په وینا کې وکړه.

شریف همدارنګه د طالبانو له حکومت څخه وغوښتل چې دا مسئله دې یقیني کړي چې د دې هېواد له خاورې پر نورو هېوادونو د بریدونو لپاره کار وانه‌خیستل شي او دې برخه کې دې کوټلي اقدامات وکړي.

د پاکستان صدراعظم وویل، هغه تروریستي بریدونه چې په دې وروستیو کلونو کې په پاکستان کې زیات شوي، د دوی ټولو لپاره د اندېښنې وړ دي.

د طالبانو حکومت تراوسه د پاکستان د صدراعظم د دغو نویو څرګندونو پر وړاندې غبرګون نه‌دی ښودلی، خو له دې مخکې یې ویلي وو چې هیچاته به اجازه ورنه‌کړي چې د افغانستان له خاورې نورو ته ګواښ متوجه کړي.

جاپان له افغان بزګرو سره د کوکنارو پرځای د بدیل معیشت په برخه کې د ملګرو ملتونو د جرمونو او مخدره موادو ضد ادارې سره د لس میلیون ډالرو مرسته کړې ده.

په کابل کې د جاپان سفارت پرون پنجشنبې په خپله ایکسپاڼه یا پخواني ټویټرکې لیکلي چې د دې مرستې هدف په هلمند، کندهاراو بدخشان ولایتونو کې د تر ټولو زیانګالو ټولنو لپاره د مخدره توکو د کارولو د مخنیوي، درملنې، رغونې او په ټولنه کې د مدغم کیدو د خدماتو وړاندې کول دي.

د جاپان سفارت همدارنګه ویلي چې له افغانانو سره به خپل ملاتړ ته دوام ورکړي.

جاپان دغه مرسته داسې مهال کوي چې د روانې اوونۍ په پیل کې په دوحه کې د ملګرو ملتونو په کوربه‌توب غونډه کې د طالبانو د حکومت پلاوي په نړیوالې ټولنې غږ وکړ چې د کوکنارو پرځای د بدیلو کښتونو او معیشت په برخو کې له افغان بزګرو سره مرسته وکړي.

د افغانستان د هوا پېژندنې ادارې سبا او بل سبا په یو شمېر سیمو کې د اوبو د کچې د لوړېدو او سېلابونو د راوتلو په اړه خبرداری ورکوي.

د طالبانو د حکومت د انرژۍ او اوبو وزارت نن پر خپله ایکس پاڼه لیکلي چې د شنبې او یکشنبې په ورځو (د چنګاښ - سرطان ۱۵ او ۱۷) د هېواد د سیندیزو حوزو په ځینو سیمو له هغې ډلې د کابل او هلمند په حوزو کې د تېزو بارانونو له کبله د سېلابونو د راوتلو اټکل کېږي.

په بیان کې په ځانګړي ډول د پنجشېر، غوربند، لوګر، غزني، کونړ، لغمان، پکتیا، پکتیکا، خوست او زابل د سیندونو په اوږدو کې د اوبو د کچې د لوړېدو وړاندوینه شوې.

په بیان کې د دې سیندونو پر غاړو د پرتو سیمو له خلکو غوښتنه شوې چې د سیندونو پر غاړو له تګ راتګ څخه ډډه وکړي.

له ایران او پاکستانه د افغان کډوالو د جبري ستنولو په لړ کې پرون چهارشنبه هم له دغو هېوادونو څخه ۳۸۵ کورنۍ افغانستان ته ستنې کړل شوې.

باختر اژانس چې د طالبانو تر واک لاندې دی لیکي چې دغو کورنیو ته وړیا سیمکارتونه ویشل شوي او ځینې یې خپلو سیمو ته لېږدول شوي دي.

خبر کې راغلي چې دغه شمېر کورنۍ د تورخم، سپین بولدک ، د نیمروز د ورېښمو د پله او د هرات د اسلام کلا بندر له لارې افغانستان ته رااړول شوي دي.

د راپورونو له مخې یوازې پاکستان تېرو څو میاشتو کې له پنځو لکو ډېر افغان کډوال چې هلته د اوسېدو اسناد نه لري افغانستان ته رااړولي دي.

ایران هم هلته پر کډوالو کړۍ تنګه کړې او نژدې هره ورځ لسګونه کورنۍ افغانستان ته ډيپورټوي.

اسټرالیا خپله یوه تجربه کاره ‌ډیپلوماته، امیندا مک‌ ګریګور د افغانستان لپاره د ځانګړې استازې په توګه وټاکله.

د اسټرالیا د بهرنیو چارو وزیرې پینسي ونګ پرون په یوه بیان کې دغه خبر ورکړ.

مک ګریګور به د افغانستان لپاره د اسټرالیا د پخواني استازي ګلین میلز په ځان دا دنده مخته وړي.

د اسټرالیا د بهرنیو چارو د وزارت په بیان کې راغلي چې اغلې مک ګریګور به له قطر څخه کار کوي او له هغو هېوادونو سره به په تماس کې وي چې پر طالبانو فشار راولي چې بشري حقونه رعایت کړي.

مک ګریګور پخوا د اسټرالیا د کاناډا او لبنان په سفارتونو کې د ډیپلوماتې په توګه کار کړی او د اسټرالیا د حکومت د صدراعظم او کابینې جګپوړې سلاکاره پاتې شوې ده، دا د اسټرالیا د دفاع په وزارت کې هم د کار تجربه لري.

د طالبانو د صنعت او سوداګرۍ د وزارت سرپرست د ازبکستان د صدراعظم له مرستیال سره تر لیدو وروسته د دواړو هېوادونو د ګډې سوداګریزې خونې پر جوړېدو سلا وکړه.

د باختر اژانس د راپور له مخې نورالدین عزیزي د ازبکستان د صدراعظم له مرستیال جمشید خواجه یف سره د تجارتي، ټرانزیټي، د افغانستان د رېل پټلۍ او د ازبکستان له سرخان سیمې تر پلخمري پورې د برښنا د لېږد په تړاو خبرې وکړې.

عزیزي او ورسره پلاوی د سې شنبې په ورځ تاشکند ته ولاړ.

له نژدې درې کلونو راهیسې چې طالبانو کابل نیولی، د ازبکستان له اوسنیو چارواکو سره یې اړیکې ښه دي، خو د ازبکستان په ګډون هېڅ هېواد تر اوسه د طالبانو حکومت په رسمیت نه دی پېژندلی.

د پاکستان او تاجکستان مشرانو په خپل ننني ملاقات کې پر دوه اړخیزو اړیکو سربېره پر افغانستان خبرې کړي او سوله‌ییز او سوکاله افغانستان یې د سیمې د خوندیتوب لپاره اړین بللی دی.

د پاکستان صدر اعظم شهباز شریف نن چهارشنبه په دوشنبې کې د تاجکستان له ولسمشر امام علي رحمان سره وکتل او تر خپل منځه یې د ستراتیژیکو همکاریو موافقه هم لاسلیک کړې ده.

د پاکستان بهرنیو چارو وزارت په یوه اعلامیه کې ویلي چې دواړو مشرانو په افغانستان کې د ثبات لپاره یو ټولشموله حکومت مهم بللی دی.

د اعلامیې له مخې شريف ویلي، دا مهال یې هېواد د کراچۍ بندر په وسیله د افغانستان له لارې تاجکستان ته مالونه لېږدوي، خو په خبره یې غواړي د سړک او رېللارې په وسیله تاجکستان سره وصل شي.

پاکستان او تاجکستان تر دې وړاندې ویلي چې دوی ته د افغانستان له خاورې امنیتي ګواښونه متوجه دي، خو طالبانو بیا دا اندیښنې بې ځایه بللي او ډاډ یې ورکړی چې هیچا ته به افغانستان له خاورې زیان نه رسېږي.

د اسټرالیا د کرکټ ادارې یوځل بیا ویلي چې په افغانستان کې د ښځو د حقونو تر تامینېدو پورې له دغه هېواد سره دوه اړخیزې لوبې نه کوي.

کریک انفو ویبپاڼې نن چهارشنبه د اسټرالیا د کرکټ د اجرایوي مشر نیک هاکلي په حواله ویلي چې دوی د افغانستان له کرکټ بورد سره وخت نا وخت پر دې مسئله غږېږي او هیله کوي چې راتلونکې کې بېرته لوبې پيل کړي.

اسټرالیا له ۲۰۲۲م کال راهیسې درې ځله په همدې دلایلو له افغانستان سره د کرکټ پلان شوې دوه اړخیزې لوبې لغوه کړي، خو لوبډله یې بیا په پنځوس اوریز او شل اوریز نړیوال جام کې له افغانستان سره مخامخ شوې ده.

افغان لوبډلې په شل اوریز نړیوال جام کې چې تازه پای ته ورسېد، اسټرالیا ته ماتې ورکړه.

د اسټرالیا کرکټ بورد داسې مهال افغانستان کې د ښځو د حقونو پر تامین ټینګار کوي چې تازه په اسټرالیا کې د افغانستان د کرکټ یو شمېر ښځینه لوبغاړو د کرکټ له نړیوالې شورا غوښتي چې دوی ته په کډوالۍ کې د لوبډلې د جوړېدو اجازه ورکړي.

د کرکټ نړیوالې شورا تراوسه د افغان کرکټرانو دغه لیک ته ځواب نه دی ورکړی.