د افغانستان لپاره د امریکا ځانګړی استازی ټایم وېسټ وایي، له دوو افغان ښځینه فعالانو پلوشې حسن او ماري اکرمي سره یې د افغانستان د ښځو د وضعیت په تړاو خبرې کړي دي.
وېسټ تېره شپه د مارچ ۳مه په ټویټر کې ولیکل چې په دې غونډه کې د افغانستان له ښځو او نجونو سره د طالبانو پر توپيري چلند بحث وشو.
د ټام وېسټ په وینا، د پلوشې حسن او ماري اکرمي په څېر د افغان مېرمنو هڅې الهام بخښونکې دي، ځکه چې دوی له افغان مېرمنو سره د مرستې لپاره د نړۍ په هر ګوټ کې کار کوي.
ماري اکرمي د دې غونډې په اړه ازادي راډیو ته وویل چې دې د افغان ښځو د زغم خبره وکړه چې نور تحمل نه شي کولای.
اکرمي زیاته کړه: "له ښاغلي ټام وېسټ سره غونډه د افغانستان د مسئلې په تړاو وه. ما د افغان ښځو په استازیتوب وویل چې د ښځو شرایط، د افغانستان د مېرمنو په حقونو د سترګو پټېدل او د افغان ښځو د صبر او زغم امتحان په حقیقت کې ډېر اوږد شو."
مېرمن اکرمي زیاته کړه چې ټام وېسټ دې او پلوشې حسن ته وویل چې امریکا د افغان مېرمنو د حقونو ملاتړ کوي، خو نه شي کولای چې بیا افغانستان ته پوځیان واستوي او په جګړې کې ښکېل شي.
د ماري اکرمي په وینا، ټام وېسټ دا خبره هم ورته کړې چې له افغان مېرمنو سره به خپلو لیدنو کتنو ته د افغانستان د مېرمنو د وضعیت د ارزونې په خاطر ادامه ورکړي.
په داسې وخت کې د دې غونډې خبره کېږي چې د بخښنې نړیوال سازمان د جمعې په ورځ په یوه راپور کې وویل چې طالبانو د خپلې بیا ځلي واکمنۍ له پیله په سیستماتیک ډول د ښځو او نجونو حقونه نقض کړي دي.
دې سازمان د ملګرو ملتو د بشري حقونو له شورا غوښتې دي چې په افغانستان کې دې له نړیوالو قوانینو څخه د سرغړونې د شواهدو د راغونډولو لپاره یو ځانګړی میکانېزم رامنځته کړي.
طالبانو له شپږم ټولګي ورپورته د نجونو د زده کړو مخه نیولې ده، په موسسو کې یې د مېرمنو کارونه محدود کړي دي، پارکونو ته یې د ښځو پر تګ بندیز لګولی، د لوبو له میدانونو یې راګرځولي او حمامونو ته یې هم نه پرېږدي.
سره له دې چې نړیواله ټولنه له طالبانو بیا بیا غواړي چې ښځو او نجونو ته د دوی حقونه ورکړي، خو طالبان وایي چې دوی د اسلامي شریعت په چوکاټ کې حقونه ورکوي.
یو شمېر ښځینه فعالانې په افغانستان کې وایي چې د دوی مبارزه د دې سبب شوې ده چې تر اوسه هېڅ هېواد د طالبانو حکومت په رسمیت نه دی پېژندلی.
