په افغانستان کې د خوړو نړیوال پروګرام یا 'ډبلیو ایف پي' وايي، د لرو پرتو سیمو لپاره د خوراکي توکو د زېرمه کولو په خاطر ۱۱۰ میلیونه ډالرو ته اړتیا لري.
په افغانستان کې د خوړو نړيوال پروګرام وايي، په بېړنۍ توګه يو سل او لس ميليونه ډالرو مرستو ته اړتيا لري، څو په راتلونکي ژمي کې د افغانستان په لرو پرتو سيمو کې له خلکو سره اړینې مرستې وکړي.
د یاد سازمان ویاند وحیدالله اماني د یکشنبې په ورځ ازادي راډيو ته وویل چې اټکل کېږي په دغو سیمو کې شاوخوا درې میلیونه کسان مرستو ته اړتیا لري.
هغه زیاته کړه: "د ژمي تر رارسېدو مخکې او له دې وړاندې چې د ځينو لرو پرتو سیمو لارې د واورې په اورښت سره وتړل شي له درېیو میلیونو کسانو سره د خوراکي توکو د مرستې په هدف ۱۱۰ میلیونه ډالرو ته عاجله اړتیا ده."
اماني دا هم وايي چې په افغانستان کې د خوړو نړیوال پروګرام د جولای په میاشت کې توانېدلی چې د افغانستان په پنځو ولایتونو کې له پنځه نیم میلیونو خلکو سره، چې عام خلک او سېلاب ځپلي دي، مرستې ورسوي.
په همدې حال کې د خوړو نړیوال پروګرام پرون په خپل ایکس پاڼه چې پخوا ټوېټر نومېده اعلان کړی چې د ۲۰۲۳ کال په لومړیو شپږو میاشتو کې یې له ۱۶ میلیونو افغانانو سره د خوراکي توکو مرستې کړې دي.
د ملګرو ملتونو د شمېرو له مخې په افغانستان کې د اړمنو کسانو شمېر له ۲۹ میلیون او دوه لکو کسانو اوړي.
د 'ډبلیو ایف پي' ویاند وحیدالله اماني ازادي راډیو ته د خپلو خبرو په دوام وویل چې دوی په دې موده کې په افغانستان کې د 'ډبلیو ایف پي' د پروګرامونو د پرمخ بیولو لپاره د نړیوالې ټولنې لږ تر لږه یو میلیارد ډالرو مالي مرستو ته اړتیا لري.
په همدې اساس 'ډبلیو ایف پي' له نړیوالې ټولنې او خپلو نړیوالو شریکانو څخه غواړي چې دوی ته ژر تر ژره مالي سرچینې برابرې کړي ترڅو د ژمي له رارسېدو مخکې په ټول افغانستان کې اړمنو خلکو ته مرستې ورسوي.
په افغانستان کې د مرستو رسولو بهیر له هغه وروسته کم شو، چې د تېر کال په ډسمبر او بیا د روان کال په اپرېل میاشت کې د طالبانو سرپرست حکومت د ملګرو ملتونو د دفترونو په ګډون د ټولو نادولتي موسسو ښځینه کارکوونکو ته امر وکړ چې په کور کې پاتې شي.
د خوړو نړیوال پروګرام په ګډون دغو سازمانونو ویلي چې د ښځینه کارکوونکو پرته به د دوی لپاره په افغانستان کې د اړو کسانو خدمت کول ګران کار وي.
