په ملګرو ملتونو کې د افغانستان دایمي استازولۍ او څو سفارتونو په پاکستاني چارواکو غږ کړی چې بندي افغان کډوال په تېره بیا ماشومان ژر تر ژره خوشې کړي.
د کراچۍ څو زندانونه په هغو افغان کډوالو په تېره بیا ښځو او ماشومانو ډک دي چې پاکستان ته د ناقانونه تګ او ځینو نورو مساییلو په خاطر بندیان شوي.
د افغانستان ډپلوماټیکو ماموریتونو چې د جمهوریت له دورې فعاله پاتې دي د شنبې په ورځ په یوه ګډه اعلامیه کې ویلي په دې اړه سخته اندېښنه لري چې پاکستاني چارواکو افغان کډوال او ماشومان بندیان کړي.
په اعلامیه کې ویل شوي چې د پاکستان حکومت باید ژر تر ژره دا افغان ماشومان او بندي کډوال بېرته خوشې او اسانتیاوې ورته برابرې شي.
افغان سفارتونو د ماشومانو بندیانول د هغوی د حقونو ښکاره سرغړونه بللې او هم یې ټینګار کړی چې د کډوالۍ د نړیوال کنوانسیون په اساس دولتونه د ناقانونه داخلېدو او ژوند په خاطر په کډوالو د جریمې د لګولو او د هغوی د بندیانولو حق نه لري.
د پاکستان د بشر د حقونو د ملي کمېسیون د یوه تازه راپور په اساس د کراچۍ په مرکزي زندان کې ۱۳۹ افغان ښځې او ۱۶۵ واړه افغان ماشومان بندیان دي.
همداراز د ښار د تنکیو ځوانانو په توقیف خونه کې چې له ۹ تر ۱۳ کلنو ماشومان ساتل کېږي ۲۲۲ تنه افغان ماشومان او تنکي ځوانان هم شامل دي.
د کراچۍ په زندانونو کې افغان نارینه کډوال هم بندیان دي او د ټول ټال ماشومانو، ښځو او نارینه و افغان بندي کډوالو شمېر شاوخوا ۱۴۰۰ ته رسېږي.
د دغو افغان بندي ښځو او ماشومانو د خوشې کولو لپاره په سیمه ییزه کچه د بشري حقونو ځينې فعالان او مدافع وکیلان هڅې کوي.
یوه له دوی منیزه کاکړ ده.
هغې د شنبې په ورځ ازادي راډیو ته وویل: "د دې افغانانو په هکله موږ افغان سفارت سره خبرې کړي. چې د پاکستان له دولت سره دا خبره راپورته کړي. او په افغانانو چې کومې چاپې روانې دي باید د دې حل لاره راوباسي. دلته له سیاسي مشرانو سره هم غږېدلې یمه."
د پاکستان د بشر د حقونو د ملي کمېسیون د یوه تازه راپور په اساس د کراچۍ په مرکزي زندان کې ۱۳۹ افغان ښځې او ۱۶۵ واړه افغان ماشومان بندیان دي.
اخوا د پاکستان د بشري حقونو یوه غیر دولتي سازمان اندېښنه ښودلې چې ځینې بشرپاله کسان او مدافع وکیلان د هغو هڅو لپاره ځورول شوي چې د افغان ماشومانو او ښځو د خوشې کولو لپاره یې کوي.
دا وروسته له هغه چې ځینو مدافع وکیلانو د کراچۍ په مرکزي زندان کې د وړو افغان ماشومانو او ښځو عکسونه خپاره او د خوشې کولو لپاره یې د عدالت غوښتنې غږ پورته کړ.
د طالبانو د بهرنیو چارو وزارت هم په یوه اعلامیه کې په پاکستاني چارواکو نیوکه کړې چې له ژمنو سره سره یې په پاکستان، په ځانګړې ډول سند ایالت کې د ښځو او ماشومانو په ګډون بندي افغانان نه دي خوشې کړي.
په اعلامیه کې د افغان مسافرو، ماشومانو، ښځو او ناروغانو بندیانول خورا دردونکې پېښه بلل شوې او ویل شوي چې دا کار به د دواړو هېوادونو د اړیکو لپاره ښه پایله نه لري.
پاکستان له څلورو لسیزو د میلیونونه افغان کډوالو کوربه دی.
دغه هېواد ته د کډوالۍ تازه څپه وروسته له هغه پيل شوه چې د ۲۰۲۱ کال په اګست کې طالبان واک ته ورسېدل.
اکثر دا کسان نورو هېوادونو ته د تلو او یا د کار او د ماشومانو د زده کړو لپاره پاکستان ته کډوال شول.
د دغو افغان بندي ښځو او ماشومانو د خوشې کولو لپاره په سیمه ییزه کچه د بشري حقونو ځينې فعالان او مدافع وکیلان هڅې کوي.
د ملګرو ملتونو د کډوالو عالي کمېشنرۍ د راپور نږدې ۱۱۸ زره افغانان د ۲۰۲۱ کال له اګسته پاکستان ته کډه شوي.
په قانوني تګ سربېره لسګونه زره نور خلک په ناقانونه توګه د ویزې او پاسپورټ له نشتوالي پرته پاکستان ته تللي چې هلته یې پر ضد د پاکستاني چارواکو له خوا کلک ګامونه اخیستل شوي.
اکثر یې زنداني شوي، بېرته افغانستان ته شړل شوي یا ضرب العجل ورکړل شوی چې له پاکستانه ووځي.