د لاسرسۍ وړ لېنکونه

تازه خبر
دوشنبه ۱۴ کب ۱۴۰۲ کابل ۰۹:۱۳

افغانستان

پاکستاني پوليسو کراچۍ ښار کې ۳۱ افغان کډوال نيولي دي

پاکستاني پوليسو کراچۍ ښار کې ۳۱ افغان کډوال نيولي دي
پاکستاني پوليسو کراچۍ ښار کې ۳۱ افغان کډوال نيولي دي

د راپورونو له‌مخې پاکستاني پولیسو دا افغانان د اسنادو د نه درلودلو او پاکستان ته د ناقانونه تګ په خاطر نیولي.

پاکستاني رسنیو د کراچۍ د کیماړي سیمې د پولیسو مشر فداحسین جانوري په حواله ویلي چې د ناقانونه کډوالو د نیولو لپاره یې هڅې روانې کړي.

له پاکستانه په خواله رسنیو یوه ویډیو هم شریکه شوې چې په‌کې لسګونه لاس تړلي کسان ښکاري.

د پښتون ژغورنې غورځنګ مشر منظور احمد پښتین هم د نیولو شویو کسانو د یوه عکس په خپرولو سره لیکلي چې، باید د افغانانو نیول او سپکاوی بند شي.

پښتین همدا راز زیاته کړې چې چمن، تورخم او انګور اډه کې هم هره ورځ لسګونه عام خلک له ستونزو سره مخ کېږي او ورسره زور زیاتی روان دی.

د طالبانو حکومت هم افغان کډوالو سره د پاکستاني پوليسو چلند غندلی دی.

د طالبانو د بهرنیو چارو وزارت ویلي چې د پاکستاني پولیسو له‌خوا د افغان کډوالو د ځورولو پېښه غندي او د دې کار د سمدستي درېدو غوښتنه لري.

د دغه وزارت مرستیال ویاند حافظ ضیا احمد تکل نن په یوه پيغام کې ویلي: "له څه مودې راهیسې د پاکستان په بېلابېلو ښارونو کې، له افغانستان سره د تګ راتګ په لارو په ځانګړې توګه په سیند ایالت کې افغانانو سره د پاکستاني پولیسو له لوري ناوړه چلند کېږي. د افغانستان د بهرنیو چارو وزارت د خپلو هېوادوالو ځورول او ورته ستونزې جوړول غندي او د پاکستاني حکومت څخه یې په کلکه د مخنیوي او بیا نه تکرار غوښتنه کوي."

تر دې مخکې هم افغان کډوالو سره د پاکستاني پوليسو له‌خوا د تاوتريخوالي راپورونه ورکول شوي دي.

د ورځې تازه خبرونه دلته ولولئ

خوست کې چاودنې ۲ ماشومان وژلي

د افغانستان په عمومي نقشه کې خوست ولایت
د افغانستان په عمومي نقشه کې خوست ولایت

په خوست کې د یوې سرګلولې په چاودنه کې دوه ماشومان وژل شوي او څلور نور ټپیان دي.

د طالبانو تر کنټرول لاندې باختر خبري اژانس پرون (د مارچ ۳مه) خبر ورکړ چې دوو ماشومانو یو ناچاوده سرګلوله خپل کور ته وړې وه او د لوبې پر مهال پرې چاودلې.

وژل شوي او ټپیان د یوې کورنۍ غړي دي.

په افغانستان کې له جګړو څخه پاتې ناچاوده سروکې، ماینونه او مهمات وخت په وخت ملکي وګړي قرباني کوي.

د افغانستان متحده جبهه: له مخکینیو امنیتي ځواکونو څخه د ملاتړ هڅې پیل شوې دي

د افغانستان د پرځیدلي جمهوري نظام یو شمېر ځواکونه - تصویر له ارشیفه
د افغانستان د پرځیدلي جمهوري نظام یو شمېر ځواکونه - تصویر له ارشیفه

د افغانستان متحده جبهه وایي په هېواد کې دننه او ځینو نورو هېوادونو کې د ایسارو پخوانیو ځواکونو د لاسنیوي او همکارۍ لپاره هڅې کوي.

د دې جبهې یوه مسوول جنرال خوشال سعادت پرون د امریکا په پلازمېنه واشنګتن ډي سي کې د «افغان سرتېرو د درنښت» په نوم یوې غونډې ته دا خبره وکړه.

په دې غونډه کې د جنرال اکمل امیري، جنرال رازق او ځینو نورو پخوانیو افغان لوړپوړو پوځي قومندانانو عکسونه ځړول شوي وو چې له طالبانو سره په مخامخو جګړو یا د هغوی په بریدونو کې وژل شوي.

په دې غونډه کې د پخوانیو امنیتي او دفاعي ځواکونو ځینو مشرانو او ځینو نورو خلکو برخه اخیستې وه.

خوشال سعادت پر طالبانو نیوکه وکړه چې د افغانانو په وړاندې د ده په خبره بې دریغه زور زیاتی کوي.

د افغانستان متحده جبهه د پوځ د پخواني جنرال سمیع سادات له خوا جوړه شوې او اکثر هغه پخواني قومندانان او جنرالان پکې شامل دي چې کلونه یې د طالبانو پر وړاندې جګړه مخته وړله.

ایران: د طالبانو حکومت په چابهار بندر کې د دوی د اقتصادي نمایندګۍ د پرانیستلو غوښتنه کړې

له ارشیفه د چابهار بندر یو تصویر
له ارشیفه د چابهار بندر یو تصویر

ایران وايي، د طالبانو حکومت غواړي په چابهار بندر کې د اقتصادي نمایندګۍ دفتر پرانیزي.

د ایران مهر خبري اژانس پرون (د مارچ ۳مه) راپور ورکړ چې د طالبانو د اقتصاد وزارت پلاوي دغه هېواد ته د خپل سفر په ترڅ کې د دغه دفتر د پرانیستلو غوښتنه وکړه.

په خبرپاڼه کې ویل شوي چې د طالبانو تر کنټرول لاندې د اقتصاد وزارت د نړیوالو ترانزیتي چارو د رئیس محمدالله بختیار په مشرۍ د طالبانو پلاوي هم چابهار بندر ته تللی او هلته یې د ولسمشر له سلاکار حجت الله عبدالمالکي او د بهرنیو چارو له وزیر سره کتلي دي.

د ایران د سوداګریزو چارو عالي شورا د اعلامیې له مخې، دواړو لورو د دواړو هېوادونو ترمنځ د سوداګرۍ او ترانزیت پر پراختیا ټینګار کړی دی.

د راپور له مخې، د طالبانو پلاوي او ایراني چارواکو د چابهار بندر د پراختیا له پروژې خپل بشپړ ملاتړ څرګند کړی دی.

د طالبانو د سوداګرۍ وزیر د ښځینه وو په ګډون سوداګریز پلاوي سره ترکمنستان ته تللی

تصویر له ارشیفه - د طالبانو د سوداګرۍ وزیر په ترکمنستان کې د یوې غونډې پر مهال
تصویر له ارشیفه - د طالبانو د سوداګرۍ وزیر په ترکمنستان کې د یوې غونډې پر مهال

د طالبانو د حکومت د صنعت او سوداګرۍ وزیر په مشرۍ د خصوصي سکتور یو پلاوی چې ښځینه سوداګرې هم پکې شاملې دي، ترکمنستان ته تللی دی.

دغه پلاوي پرون (شنبې) د ترکمنستان د سوداګرو او پانګوالو د ټولنې له مشر نوکر قُلي اوف سره پر دوه اړخیزو سوداګري اړیکو او پانګونې خبرې وکړې.

د طالبانو د حکومت د صنعت او سوداګرۍ سرپرست وزیر نورالدین عزیزي عشق اباد ته تر روانېدو مخکې د کابل په هوايي ډګر کې خبریالانو ته وویل چې په دې سفر کې د ۱۵ ښځینه سوداګرو په ګډون ۲۵۰ افغان سوداګر ورسره مله دي.

د طالبانو حکومت: وروستیو ورښتونو ۳۴ تنو ته مرګ ژوبله اړولې

تصویر له ارشیفه
تصویر له ارشیفه

د طالبانو د حکومت له پېښو سره د مبارزې وزارت وايي چې د تېرو دوو اوونیو د ورښتونو په نتیجه کې لږ ترلږه ۲۰ تنه مړه شوي او ۱۴ نور ژوبل شوي دي.

د دغه وزارت ویندوی ملاجانان سایق پرون ناوخته رسنیو ته په استولي ویډیويي پیغام کې ویلي چې د حوت له لومړۍ څخه تر دوولسمې پورې په ۱۴ ولایتونو کې د بارانونو او واورو له امله د کورونو د نړېدو او سېلونو د جاري کېدو په پېښو کې ۳۴ تنو ته مرګ ژوبله اوښتې ده.

ده همداراز ویلي چې په یاده موده کې ۴۵۲ کورونه نړېدلي او لږترلږه ۵ زره ۲۵۳ څاروي مړه شوي دي.

د افغانستان د اتلتیک د ملي لوبډلې لوی روزونکی سخي زاده ایران کې ومړ

احمد فیروز سخي زاده
احمد فیروز سخي زاده

د افغانستان د اتلتیک د ملي لوبډلې لوی روزونکی احمدفیروز سخي زاده پرون په ایران کې په حق ورسېد.

د هېواد د اتلتیک د دې مخکښ روزونکي د کورنۍ غړو ازادي راډیو ته وویل، سخي زاده چې په ورځ کې به یې د اعصابو د آرامولو څو ټابلیټونه خوړل، د شنبې په ورځ د زړه د درېدو له کبله سا ورکړه.

نوموړي چې له شاوخوا پنځو میاشتو راهیسې په ایران کې اوسېده، وروستی ځل تېره اونۍ د افغانستان د اتلتیک له ملي لوبډلې سره په تهران کې د آسیا د اتلتیک په لوبو کې د لوی روزونکي په توګه ګډون وکړ.

د لوګر د مس عینک کان له سیمې سلګونه تاریخي آثار کابل ته لېږدول شوي

د لوګر د مس عینک کان سیمه
د لوګر د مس عینک کان سیمه

د طالبانو حکومت وايي د مس عینک کان له سیمې څخه یې سلګونه تاریخي آثار کابل ته استولي دي.

باختر خبري آژانس چې طالبان یې اداره کوي، پرون د طالبانو د حکومت د لرغون پوهنې د رییس ذبیح الله سادات له قوله خبر ورکړ چې نوموړی وايي، د کوشاني دورې اړوند ۴۰۰ لرغونی آثار چې په وروستیو کې د لوګر په مس عینک کان کې موندل شوي وو، د کابل موزیم ته استول شوي دي.

د مس عینک د استخراج چارې له څو کلونو راهیسې د دې کان په سیمه کې د بودایي دورې د یو لرغوني ښار د اړوندو راپورونو له کبله ځنډېدلې وې.

پرځېدلي جمهوري نظام د دې کان د استخراج د چارو قرارداد له یوه چینايي شرکت سره کړی و، خو په دې کان کې عملي کار څوکاله وځنډېد.

طالبانو د ۲۰۲۱ کال په اګست کې پر افغانستان له بیاواکمنېدو وروسته یوځل بیا د مس عینک کان پر پروژې کار پیل کړ او غواړي چې د دې پروژې په وسیله له چین سره ځان نژدې کړي.

یو هندي وګړی افغانستان ته له داعش ډلې سره د یو ځای کېدو د تلو د هڅې په تور نیول شوی

له ارشیفه د داعش ‌ډلې بیرغ
له ارشیفه د داعش ‌ډلې بیرغ

د هندي رسنیو د راپورونو له مخې، د هند د کیرالا ایالت یو اوسېدونکی د اسلامي دولت ډلې یا داعش له لیکو سره د یوځای کېدو د هڅې په ترڅ کې په افغانستان کې نیول شوی دی.

هندو پوست ورځپاڼې دا مشکوک تروریست د ثناالاسلام په نوم یاد کړی او ویلي یې دي، نوموړی له نیول کېدو او له ده څخه د طالبانو د حکومت د استخباراتو له تحقیقاتو وروسته اوس په کندهار کې په توقیف کې دی.

د هندو پوست د راپور له مخې، ثناالاسلام د تاجکستان له لارې افغانستان ته تللی و، او غوښتل یې په افغانستان کې له داعش ډلې سره یوځای شي.

په راپور کې دا نه دي ویل شوي چې نوموړی څه وخت او د افغانستان په کومه سیمه کې نیول شوی، خو دا یادونه شوې ده چې د طالبانو د حکومت چارواکو د دې موضوع په اړه هند ته خبر ورکړی دی او د راتلونکو اقداماتو په اړه د دواړو خواوو ترمنځ خبرې روانې دي.

رواداري سازمان: افغانستان کې سلګونه تنه په قصدي ډول وژل شوي

د رواداري سازمان په راپور کې طالبان هم په قصدي وژنو کې په لاس لرلو تورن شوي
د رواداري سازمان په راپور کې طالبان هم په قصدي وژنو کې په لاس لرلو تورن شوي

د رواداري په نوم د بشري حقونو مدافع ډله ادعا کوي چې طالبانو او ناپېژاندو وسله والو په ۲۰۲۳ کال کې په افغانستان کې په هدفي او غیرقانوني وژنو کې لاس درلود.

دې ډلې چې له هېواده بهر فعالیت کوي، پرون (د مارچ په دوهمه) د افغانستان د بشري حقونو د وضعیت په اړه د یوه ۳۰ مخیز راپور په خپرولو سره همداراز ویلي دي چې د تېر ۲۰۲۳ کال په ترڅ کې په ټول افغانستان کې له بشري حقونو د سرغړونو په ترڅ کې لږترلږه د ۵۰۶ کسانو د وژل کېدو او د ۲۶۶ نورو د ټپي کېدو موارد مستند شوي دي.

د طالبانو حکومت تراوسه د دې راپور په اړه څه نه دي ویلي، خو له دې مخکې یې د بشري حقونو په سرغړونو کې لاس لرل رد کړي دي.

د افغانستان د خبریالانو مرکز: په دایکندي کې د نسیم راډیو نشرات بېرته پیل شول

ارشیف
ارشیف

د افغانستان د خبریالانو مرکز وايي، طالبانو په دایکندي ولایت کې د نسیم خصوصي راډیو ته اجازه ورکړې چې خپل نشرات بېرته پیل کړي، خو د دې راډيو مدیر مسوول سلطان علي جوادي لا هم د طالبانو په بند کې دی.

دې مرکز نن شنبې د مارچ دویمه د یوې خبرپاڼې په خپرولو سره ویلي، د طالبانو د استخباراتو ادارې دا راډيو پنځه میاشتې وړاندې تړلې وه.

د افغانستان د خبریالانو مرکز د نسیم راډیو د خاوند د مدافع وکیلې نحیبې واحدي په حواله ویلي، نن دې راډیو بېرته خپل نشرات پیل کړل.

د دې مرکز په خبرپاڼه کې راغلي، جوادي د لیندۍ په شلمه د دایکندي په مرکز نیلي کې د طالبانو د ابتدائیه محکمې له لوري (د طالبانو د حکومت پر ضد د تبلغاتو او بهرنیو هېوادونو ته د جاسوسۍ) په تور په یو کال زندان محکوم شوی و.

واک ته د طالبانو له ستنېدو وروسته ډېر شمېر خبریالان او د رسنیو کارکوونکي د طالبانو له‌خوا نیول شوي او زنداني شوي دي.

نور راوښيه

XS
SM
MD
LG