ټاکل شوې چې د ملګرو ملتونو د غړو ۱۹۳ هېوادونو استازي نن او سبا د سپټمبر ۲۲مه او ۲۳مه د ملګرو ملتونو په ۷۹مه عمومي غونډه کې په ګډون سره د افغانستان او ځینو هېوادونو په اړه بحثونه وکړي.
په افغانستان کې د بشري حقونو په اړه د اندېښنو په زیاتېدو سره هممهاله، ټاکل شوې نن او سبا د سپټمبر ۲۲مه او۲۳مه ملګري ملتونه د افغانستان، فلسطین او اوکراین په ګډون د یو شمېر نورو هېوادونو د وضعیت په اړه ۷۹مه غونډه وکړي.
که څه هم د یادې غونډې په اړه ډېر جزییات نه دي ورکړل شوي، خو د ملګرو ملتونو د څار ادارې د ملګرو ملتونو د بشري حقونو د څار ادارې مشر لویز چاربونیو په حواله ویلي چې د نړۍ مشران باید د ملګرو ملتونو په غونډه کې په نړۍ کې د فقر، بېعدالتۍ، اقلیمي بدلون او ورنه د بشري حقونو د خونیتوب په برخه کې د لمس وړ وړاندیزونه تایید کړي.
د نوموړي په حواله دا هم ویل شوي چې دغه مشران باید وښيي چې د بشري حقونو نه ملاتړ ته لېواله دي.
په افغانستان کې د طالبانو حکومت بیا د ملګرو ملتونو دې ناستې ته د دوی د حکومت د استازو په نه بللو نیوکه کړې ده.
په قطر کې د طالبانو سیاسي دفتر مشر سهېل شاهین نن یکشنبه د سپټمبر۲۲مه له ازادي راډیو سره په خبرو کې وویل چې باید د دوی د حکومت استازو ته د ملګرو ملتوتو په دغه ناسته د دریځ د بیان لپاره د ګډون اجازه ورکړل شوې وای.
شاهین وویل: "کله چې د افغانستان د مسایلو اړوند خبري کېږي، هلته باید د اسلامي امارت استازي موجود وي څو لومړی د مسئلې په روښانه کولو او بیا یې د حل لپاره نظر وړاندې کړي. اوس اسلامي امارت په ټول هېواد مسلط دی او دا یو واقعیت دی. ملګري ملتونه دې د افغانستان مسئلې ته د ځمکنیو حقایقو په رڼا کې وګوري او چلند دې وکړي نه دا چې د ځینو خاصو سیاسي غوښتونو په خاطر."
په ورته وخت کې ښځو د حقونو یو شمېر فعالانې له ازادي راډیو سره په خبرو کې غوښتنه کوي چې په دا ډول غونډو کې باید د افغانستان واقعي استازو ته بلنه ورکړل شي.
مېرمن وحدت وايي: په دا ډول غونډو کې زموږ غوښتنه دا ده چې د افغانستان واقعي استازي، هغه کسان چې په افغانستان کې یې ژوند کړی د افغانستان په مسایلو یې سر خلاصېږي او پوهېږي چې اوس په افغانستان کې څه وضعیت روان دی او خلک دوی د خپلو استازو په توګه مني له دوی باید استفاده وشي.
له دې ډلې فوزې وحدت ازادي راډیو ته وویل: "په دا ډول غونډو کې زموږ غوښتنه دا ده چې د افغانستان واقعي استازي، هغه کسان چې په افغانستان کې یې ژوند کړی د افغانستان په مسایلو یې سر خلاصېږي او پوهېږي چې اوس په افغانستان کې څه وضعیت روان دی او خلک دوی د خپلو استازو په توګه مني له دوی باید استفاده وشي او فرصت ورکړل شي چې په دغو مهمو غونډو کې ګډون وکړي او د خلکو غږ اوچت کړي."
د افغانستان او د ځینو نورو هېوادونو په اړه د ملګرو ملتونو دغه غونډه په داسې مهال کېږي چې همدا تېره اوونۍ هم د ملګرو ملتونو امنیت شورا د افغانستان په اړه غونډه وکړه، خو د ښځو د حقونو فعالانې وايي، په افغانستان د بشري حقونو مخ پر زیاتېدونکې ناوړه وضعیت ته په کتو باید نړیواله ټولنه له ناسته وراخوا عملي اقدامات هم وکړي.
