یو شمېر ښځینه ښوونکې ادعا کوي چې د طالبانو حکومت سره له دې چې د دوی معاشونه کم کړي، ځنډولي يې هم دي.
د پلازمېنې کابل د يو شمېر ښوونځيو ښځینه ښوونکې ادعا کوي چې د طالبانو حکومت د پوهنې وزارت د دوى معاشونه ځنډولي دي.
دوی ازادی راډیو ته وویل چې د طالبانو د حکومت د پوهنې وزارت سره له دې چې د دوی معاشونه ۵۰۰۰ افغانیو ته راټيټ کړي، د دوی میاشتني معاشونه يې هم ځنډولي دي.
د کابل د یوه ښوونځي سرمعلمه وايي: ټولې اندېښمنې يوو، ښوونځي ته ښوونکې له ډېرو لرې ځايونو راځي، ځينې کونډې دي، د نور ټول لګښتونه ورلغاړې دي.
د کابل د یوه دولتي ښوونځي یوې سر معلمې یا سر ښوونکې، چې د موضوع د حساسيت له امله يې نه غوښتل نوم يې په راپور کې ياد شي، ازادي راډيو ته يې وويل: "اوس زموږ معاشونه ۵۰۰۰ افغانۍ شوي او دې مياشت کې يې هغه هم رانه کړې، وايي چې د اسد مياشت کې ټولې يوځای راکوي، وايي چې معاشونه مو ځنډېدلي دي، ټولې اندېښمنې يوو، ښوونځي ته ښوونکې له ډېرو لرې ځايونو راځي، ځينې کونډې دي، د نور ټول لګښتونه ورلغاړې دي."
د کابل ښار د يوه بل ښوونځي يوې ښوونکې، چې نه يې غوښتل نوم يې په راپور کې واخیستل شي هم د ورته ستونزې يادونه کوي.
نوموړې ازادي راډيو ته وویل: "زه کابل ښار يو ښوونځي کې ښوونکې یم. موږ ته خبر راکړل شو چې د دې میاشتې معاش نه راکوي، اقتصادي ستونزې لرو، د کور کرایه لرو، حيران يو څه وکړو؟"
دوی د طالبانو له حکومته غواړي چې د دوی معاشونه پر وخت ورکړي.
په همدې حال کې ځینو سیمهییزو رسنیو د طالبانو د حکومت د پوهنې وزارت ته اړوند یو لیک خپور کړی چې له مخې یې د دغه وزارت د ښځینه کارکوونکو معاشونه ځنډېدلي دي.
په دغه ليک کې چې د طالبانو د حکومت د پوهنې وزارت تر اوسه نه رد او نه منلى، ليکل شوي چې د طالبانو د مشر د فرمان له مخې چې د دولتي ادارو د ښځینه کارکوونکو معاشونه يې ۵زره افغانۍ ټاکلى، ورسره د دې وزارت د ښځینه کارکوونکو د معاشونو د ورکړې د سیستم جوړول يو څه وخت ته اړتيا لري.
په دغه لیک کې راغلي چې د طالبانو د حکومت د پوهنې سرپرست وزیر حبیبالله اغا د بودیجې د کمېټې د وړاندیز پر بنسټ د دغه وزارت د ښځینه کارکوونکو معاشونه ځنډولي دي.
د دې ستونزې او د دې ليک د جزیياتو په اړه د طالبانو حکومت د پوهنې وزارت وياند منصور احمد حمزه وپوښتل شو، خو نوموړي د راپور تر خپرېدو پورې پوښتنو ته ځواب ورنه کړ.
دا اندېښنې وروسته له هغې چې د طالبانو مشر ملا هبتالله اخندزاده د يو فرمان په صادرولو سره د دولتي ادارو د ښځینه کارکوونکو معاش چې په تېر حکومت کې یې کار کاوه، ۵زره افغانۍ وټاکه، راپورته شوي دي.
دغه فرمان نړیوالې نیوکې هم له ځان سره درلودې او سربېره د کابل د یو شمېر روغتونونو په ګډون د دولتي ادارو د ځینو ښځینه کارکوونکو له اعتراضونو او اعتصابونو سره هم مخ شو.
د طالبانو حکومت چې ادعا کوي د اسلامي شریعت په چوکاټ کې د ښځو او نجونو ټول حقونه خوندي کړي، خو په افغانستان کې يې د ښځو او نجونو پر تعلیم، تحصیل، کار او نورو ټولنیزو، سیاسي او کلتوري فعالیتونو سخت بندیزونه او محدودیتونه وضع کړي دي.