راپورونه وايي چې اسراییلو پرون د لبنان په ختیځ کې د بعلبک ښار په شاوخوا کې پر دوو اهدافو هممهاله هوايي حملې وکړې.
دوو امنیتي سرچینو له رویټرز خبري آژانس سره په خبرو کې دا خبر ورکړی دی.
د راپورونو له مخې، د دې حملو هدف د حزب الله اړونده یوه دوه پوړیزه ودانۍ او د دې ډلې یو وسله تون وو چې په ترڅ کې یې لږترلږه د حزب الله دوه غړي وژل شوي دي.
د غزې په تړانګه کې د جګړې له پیل وروسته په تېرو څلور میاشتو کې دا لومړی ځل دی چې اسراییل په لبنان کې دننه اهداف په نښه کوي.
د رویټرز د راپور له مخې، د اسراییلو پوځ ویلي دي چې دا حمله په دې سیمه کې د اسراییلو د یوې بې پیلوټه الوتکې د نسکورېدو په غبرګون کې د حزب الله پر دافع هوا ځواک وشوه.
حزب الله له دې حملې څو ساعته مخکې په یوه بیان کې وویل چې د دې ډلې دافع هوا ځواک د اسراییلو یوه بې پیلوټه الوتکه د لبنان په جنوب کې له ځمکې څخه د هوا ته توغندي په وسیله وویشته او نسکوره یې کړه.
بعلبک ښار چې سوریې ته نژدې په بقاع دره کې پروت دی، د حزب الله د نفوذ له مهمو مرکزونو څخه دی. سوریه هم له ایران او حزب الله سره په یوه اتحاد کې شامله ده.
پر بعلبک ښار د اسراییلو له هوايي حملې څو ساعته وروسته حزب الله اعلان وکړ چې د دې حملې په غبرګون کې یې په جولان سیمه کې د اسراییل پر یوه پوځي مرکز شپېته کاتیوشا ډوله توغندي ویشتلي دي.
د اسراییلو پوځ تایید کړې ده چې سلګونه توغندي د لبنان له خاورې د جولان د لوړو پر لور توغول شوي دي چې ځینې یې د وسپنیز ګنبد په نوم د توغندیو د دفاعي سیسټم په وسیله وویشتل شول.
د دې برید پرمهال د اسراییلو په درېیو ښارونو او ښارګوټو کې د خطر زنګونه ووهل شول.
په همدې حال کې د حماس د سختدریځې ډلې له منګولو د اسراییلي برمته وو د خلاصون او په غزه کې د اوربند یوې موافقې ته د رسېدو لپاره خبرې روانې دي.
متحدایالات او اروپايي ټولنه حماس د یوې تروریستي ډلې په توګه پېژني.
د غزې په تړانګه کې جګړه وروسته له هغه پیل شوه چې حماس ډلې د اکتوبر په اوومه د اسراییلو پر جنوب برید وکړ، ۱۲۰۰ اسراییلي وګړي یې ووژل او له ۲۴۰ زیات نور یې برمته کړل.
پر غزې د اسراییلي ځواکونو په ځوابي بریدونو کې د فلسطیني چارواکو په وینا نژدې دېرش زره کسان وژل شوي دي.
د دې جګړې پرمهال د اسراییل او لبنان ترمنځ سرحد کې هم تقریبا هره ورځ د حزب الله او اسراییلو ترمنځ نښتې شوي.
حزب الله هم چې د حماس په څېر ایران یې ملاتړ کوي، د متحدوایالتونو او نورو لویدیځو هېوادونو له خوا د تروریستي ډلو په فهرست کې شامل شوی دی.
