د لاسرسۍ وړ لېنکونه

تازه خبر
سه شنبه ۲۸ وری ۱۴۰۳ کابل ۰۲:۰۷

نړۍ

سوریه کې د اسراییلو ډرون برید؛ د حزب الله ډلې ۳ غړي وژل شوي

د حزب الله ډلې یو شمېر جنګیالي
د حزب الله ډلې یو شمېر جنګیالي

د سوریې په جنوب لوېدیځ کې د ایران له ملاتړه د برخمنې حزب الله ډلې درې غړي، د اسراییل د بې پېلوټه الوتکې په حمله کې وژل شوي دي.

دمشق ته نږدې دوو سرچینو پرون شنبه د لبنان د دې افراطي ډلې د غړو د وژل کېدو خبر تایید کړی دی.

د سرچینو په وینا، په دې حمله کې د سوریې هغه یو وګړی هم وژل شوی چې له دغو کسانو سره ملګری و.

د اسراییل پوځ د سوریې په ٱلْقُنَيطْرَة سیمه کې چې د اسراییل له خوا اشغال شویو ګولان غونډیو ته څېرمه پرته ده، د شوې حملې په باب تبصره ونه وکړه.

اسراییل له کلونو راهیسې په سوریه کې پر هغو ځایونو چې دغه هېواد یې په ایران پورې تړلې اهداف ګڼي، حملې کوي.

له کله چې په ۲۰۱۱م کال کې په سوریه کې کورنۍ جګړه پیل شوې او ایران د ولسمشر بشالاراسد ملاتړ پیل کړی، په سوریه کې د تهران نفوذ زیات شوی دی.

د ورځې تازه خبرونه دلته ولولئ

سپینه ماڼۍ:غزې ته د بشري مرستو استول زیات شوي

غزه کې د بشري مرستو یوه څنډه - ارشیف
غزه کې د بشري مرستو یوه څنډه - ارشیف

سپینه ماڼۍ وایي، تېرو څو ورځو کې غزې ته د بشري مرستو اندازه د پام وړ زیاته شوې ده.

د سپینې ماڼۍ د ملي امنیت ویاند جان کربي نن دوشنبه ( د اپریل ۱۵مه) ویلي، متحده ایالتونه باید د دغو مرستو د دوام شاهد و اوسي.

رویټرز خبري اژانس له یوې امریکایي خبري شبکې ( MSNBC ) سره د جان کربي د مرکې په حواله ویلي، څه باندې دوه سوه لارۍ مرسته غزې ته رسیدلې او دې ډله کې یوازې سل لارۍ تېرو ۲۴ ساعتونو کې هلته تللي.

په غزه کې د حماس او اسراییلي پوځیانو څه باندې شپږ میاشتنۍ جګړې بشري ناورین رامنځته کړی دی.

حماس چې اروپایې ټولنه او امریکا یې د ترهګرو په توګه پیژني، ویلي چې دغې جګړه کې نژدې ۳۴ زره کسان وژل شوي، لسګونه زره ټپیان او ګڼ شمېر بې ځایه شوي دي.

د ایران ولسمشر راتلونکې اوونۍ پاکستان ته سفر کوي

د ایران ولسمشر ابراهیم رییسي
د ایران ولسمشر ابراهیم رییسي

ټاکل شوې د ایران ولسمشر ابراهیم رییسي راتلونکې اوونۍ پاکستان ته سفر وکړي.

په اسلام اباد کې د ایران سفارت یوې سرچینې نن دوشنبه د ازادې اروپا/ازادي راډیو مشال څانګې ته دا خبره کړې، خو سرچینې نور جزیات نه دي ورکړي.

دا به پر اسراییلو د ایران د تېرې شنبې شپې له بریدونو وروسته د ایران د ولسمشر لومړنی بهرنی سفر وي چې د اپریل میاشتې په ۲۲مه به ترسره شي.

سرچینې وایي، د دې سفر اصلي اجنډا د ايران او پاکستان د ګازو د نل لیکې په اړه بحث دی او ایران غواړي دغه نل لیکه د امریکا له ممکنه بندیزونو خوندي وساتي.

د پاکستان حکومت په دې اړه څه نه دي ویلي.

د پاکستان په جنوب لویدیځ کې د ورښتونو له امله بېړنی حالت اعلان شوی

ارشیف
ارشیف

د پاکستان په جنوب لویدیځ کې له بارانونو وروسته بېړنی حالت اعلان شوی دی.

اسوشیتید پریس خبري اژانس وایي چې دغلته له تېرو درېیو ورځو راهیسې ورښتونو لږ تر لږه ۳۶ تنه وژلي چې اکثره یې بزګران دي.

د پنجاب ایالت د طبیعي پیښو د مدیریت ادارې ویاند عرفان کاتیا ویلي، ډېری تلفات هغه مهال رامنځته شول چې دغلته تلندې په ځمکه ولګېدې او د خلکو کورونه یې ونړول.

هغه وایي، دغې اوونۍ کې د نورو بارانونو وړاندوېنه هم شوې ده.

تر پنجاب وروسته بلوچستان او خیبر پښتونخوا کې د ورښتونو د قربانیانو کچه ډېره ده.

د ایران په تهران او نورو ښارونو کې هوایي ډګرونو خپل فعالیت بېرته پيل کړ

د ایران یو هوایي ډګر
د ایران یو هوایي ډګر

په تهران او د ایران په نورو ښارونو کې نن دوشنبه ( د اپریل ۱۵مه) د هوایي ډګرونو فعالیتونه له سره پیل شول.

لویدیځو اژانسونو د ایران د دولتي رسنیو په حواله دغه خبر ورکړی دی.

د ایران له هوایي ډګرونو څخه د الوتکو د الوتنې او ناستې فعالیتونه وروسته تر هغه وځنډول شول چې ایران د شنبې په شپه پر اسراییلو لومړنی مستقیم برید وکړ.

ایران د بې پیلوټه الوتکو او توغندیو دغه برید په دمشق کې د اسراییلو له خوا د دوی پر کونسلګرۍ د برید په غچ کې کړی دی.

د اپریل په لومړۍ نېټه د ایران پر کونسلګرۍ د اسراییلو برید د سپاه پاسداران انقلاب ۷ لوړپوړي غړي ووژل او د کونسلګرۍ ودانۍ یې یو مخ ویجاړه کړه.

پر ایران د اسراییلو د غچ اخیستونکو بریدونو له وېرې یوشمېر هوایي کرښو ایران ته الوتنې ځنډولي او یوشمېر نورو د ایران فضا تحریم کړې ده.

په اردون، عراق او لبنان کې هم د ایران له بریده وروسته د الوتکو فعالیتونه ځنډول شوي وو، خو اوس له سره پيل شوي دي.

اسراییلو پر غزې لسګونه هوایي بریدونه کړي

اسراییلو تېره شپه پر غزې تړانګه لسګونه هوایي ګوزارونه کړي دي.

حماس چې امریکا او اروپایي ټولنه یې ترهګر بولي، نن دوشنبه ( د اپریل ۱۵مه) د دغو بریدونو پخلی کړی دی، خو د مرګ ژوبلې په اړه یې څه نه دي ویلي.

فرانس پریس خبري اژانس د اسراییلو د پوځ په حواله ویلي، پر اسراییلو د ایران بې ساری برید به پر غزې د دوی د جګړې تمرکز بدل نه کړي.

د اسراییل د پوځ ویاند دانیل هګاري ویلي، دوی به غزه کې د خپلو یرغمل شویو کسانو د خلاصون لپاره یوه شیبه هم له خپل حساس ماموریت نه په شا نه شي.

اسراییلو وروسته تر هغه پر غزې بریدونه پیل کړل چې حماس د تېر کال د اکتوبر په ۷مه پر اسراییلو په غلچکي برید سره شاوخوا ۱۲۰۰ کسان ووژل او ۲۵۰ نور یې له ځان سره یرغمل کړل.

د غزې د عامې روغتیا وزارت چې د حماس تر واک لاندې دی ویلي چې د اسراییلو په ځوابي بریدونو کې تراوسه د غزې ۳۳ زره او ۷۲۹ اوسیدونکي چې ډېری یې ښځې او ماشومان دي، وژل شوي دي.

پر اسراییل د ایران له بریدونو وروسته ناندرۍ؛ ګوتریش ښکېلې خواوې زیات زغم ته وبلل

د ملګرو ملتونو سرمنشي انتونیو ګوتیریش
د ملګرو ملتونو سرمنشي انتونیو ګوتیریش

پر اسراییلو د ایران له برید وروسته او په سیمه کې د جګړې د پراخېدو له وېرې سره همهاله، د ملګرو ملتونو سرمنشي انتونیو ګوتیریش له ښکېلو خواوو د " زیات زغم" غوښتنه کړې ده.

ګوتیریش دغه څرګندونې نن دوشنبه د ملګرو ملتونو هغې بېړنۍ غونډې ته وکړې چې پر اسراییلو د ایران د برید په اړه بحث ته ځانګړې شوې وه.

بل لورته متحدو ایالتونو د اسراییل د امنیت لپاره د " اوسپنیزې ژمنې" ټټر وهلی، خو ویلي یې دي چې په هیڅ ډول غچ اخیستونکي اقدام کې به ونډه وانخلي.

د ملګرو ملتونو سرمنشي ویلي، منځنی ختیځ دا مهال د پاڼ په غاړه دی او ټینګار یې وکړ چې اوس د زغم او د تاوتریخوالي د کمولو وخت دی.

ایران د شنبې په شپه پر اسراییلو شاوخوا درې سوه توغندي او بې پيلوټه الوتکې وتوغولې چې د اسراییلو په وینا دغه برید یې ۹۹ په سلو کې شنډ کړی دی.

د ملګرو ملتونو په غونډه کې د اسراییلو سفیر ګیلاد اردان د ایران برید په کلکو ټکو وغانده، خو د ایران سفیر سعید ایرواني ادعا وکړه چې دا حمله " اړینه او متناسبه" وه او د ځان د دفاع لپاره یې ترسره کړه.

سنټکام: پر اسراییل د ایران څه باندې ۸۰ بریدونه موږ شنډ کړل

د امریکا مرکزي قومانداني یا سنټکام
د امریکا مرکزي قومانداني یا سنټکام

د امریکا مرکزي قومانداني یا سنټکام نن (دوشنبې) وویل چې امریکايي ځواکونو وړمه شپه د ایران تر ۸۰ ډېرې بې پېلوټه الوتکې او لږ تر لږه ۶ کروز توغندي چې له یمن او ایران څخه ویشتل شوي وو، په هوا کې له منځه یووړل.

سنټکام په یوه خبرپاڼه کې ویلي چې یو بالستیک توغندی او ۷ بې پېلوټه الوتکې یې په یمن کې د حوثیانو تر کنټرول لاندې سیمو کې ویجاړ کړي دي.

راپورونه وايي چې پر اسراییل د ایران په بریدونو کې له څه باندې ۳۰۰ توغندو او بې پېلوټه الوتکو څخه کار اخیستل شوی وو چې کابو د ټولو مخه ونیول شوه.

د سعودي عربستان د بهرنیو چارو وزیر پاکستان ته په سفر ځي

د سعودي عربستان د بهرنیو چارو وزیر شهزاده فیصل بن فرهان
د سعودي عربستان د بهرنیو چارو وزیر شهزاده فیصل بن فرهان

د سعودي عربستان د بهرنیو چارو وزیر شهزاده فیصل بن فرهان نن په یوه دوه ورځني سفر پاکستان ته رسیږي.

د پاکستان د بهرنیو چارو وزارت په یوه بیان کې ویلي چې د سعودي د بهرنیو چارو وزیر شهزاده فیصل په مشرۍ د سعودي عربستان یو لوړ پوړی پلاوی به د اپرېل په ۱۵ او۱۶ د دواړو هېوادونو ترمنځ د اقتصادي همکاریو د زیاتولو د هڅو د یوې برخې په توګه پاکستان ته سفر وکړي.

د دې لیدنې هدف د دوه اړخیزو همکاریو د پراختیا او د دوه اړخیزو ګټورو اقتصادي همکاریو لپاره مثبت هڅونه بلل شوې.

د پاکستاني چارواکو په خبره، سعودي عربستان ژمنه کړې په راتلونکو پنځو کلونو کې به د پاکستان په بېلابېلو برخو کې ۲۵ میلیارده ډالره پانګونه وکړي.

اسراییلو ته د ایران د برید په اړه وار د مخه استخباراتي معلومات رسول شوي وو

پر اسراییل د ایران د بریدونو یوه څنډه
پر اسراییل د ایران د بریدونو یوه څنډه

یو جګپوړی امریکايي چارواکی وايي، ایران پر اسراییل تر برید مخکې د سویس له لارې له امریکا سره اړیکه نیولې وه.

دغه چارواکي چې د موضوع د حساسيت له امله يې د نوم د نه اخيستلو غوښتنه وکړه، پرون وويل چې امريکا او ايران د سويس په مټ څو ځلې مستقيمې اړيکې ساتلي. په تهران کې د سویس سفارت د امریکا د ګټو د ساتونکي په توګه یادیږي.

د ایران د بهرنیو چارو وزیر حسین امیر عبداللهیان ادعا کړې چې هېواد یې پر اسرائیلو له برید ۷۲ ساعته مخکې په دې اړه د سیمې هېوادونو ته خبر ورکړی و، خو امریکايي چارواکي ویلي چې دا خبره سمه نه ده.

د اسراييلو د دفاع وزارت وايي، ايران د لسو کروز توغنديو په ګډون له ۲۰۰ ډېرو بې پيلوټه الوتکو او راکټونو سره پر دغه هېواد بريدونه کړي دي.

د اسراییلو په وینا، د ایران ۹۹ سلنه بریدونه شنډ شوي دي.

ایراني چارواکي وايي، پر اسرائیلو بریدونه پای ته رسېدلي، خو خبرداری ورکوي چې که اسرائیل پر ایران د بل برید هڅه وکړي، سخت ځواب به ورکړي.

پر اسراییل د ایران له بریدونو وروسته د ترکیې خارجه وزیر خپل ایراني سیال سره خبرې کړي

د ایران او ترکیې بیرغونه
د ایران او ترکیې بیرغونه

د ترکیې د بهرنیو چارو وزیر هاکان فدان نن په ټیلفوني خبرو کې خپل ایراني سیال حسین امیر عبداللهیان ته وویل چې ترکیه نه غواړي چې په سیمه کې کړکېچ لا پراخ شي.

د ترکیې د ډيپلوماتیکو سرچینو په حواله عبداللهیان هغه ته ویلي چې د اسراییل په وړاندې د ایران غچ اخیستونکي عملیات پای ته رسېدلي، خو که بیا پرې برید وشي نو نوي عملیات به بیا ترسره کړي.

په عین حال کې د ایران د بهرنیو چارو وزارت د برېتانیا، فرانسې او جرمني سفیران د هغه څه په خاطر چې پراسراییل د تهران د بریدونو په وړاندې د دوی غیرمسولانه دریځ ښودل شوی، احضارکړي دي.

دا خبر د ایران نیمه رسمي خبري آژانس کارګر ورکړی دی.

دغو درېیو اروپایي هېوادونو د ایران دغه بریدونه غندلي دي.

نور راوښيه

XS
SM
MD
LG