د لاسرسۍ وړ لېنکونه

تازه خبر
جمعه ۱۰ کب ۱۴۰۳ کابل ۰۱:۳۹

نړۍ

د سوریې دولتي رسنۍ: دمشق کې د اسراییلو برید ۲ تنه وژلي

د پېښې سیمې ته منسوب تصویر
د پېښې سیمې ته منسوب تصویر

د سوریې دولتي رسنۍ وایي چې د دمشق په یوه هستوګنیزه سیمه کې د اسراییل هوایي بریدونو دوه تنه وژلي دي.

فرانس پریس خبري اژانس دا پیښه د غزې له جګړې سره همهاله په سیمه کې د لانجو د زیاتوالي تر ټولو وروستۍ بېلګه بللې ده.

فرانس پریس په سیمه کې د خپل یوه عکاس په حواله لیکلي چې هوایي برید په دمشق کې پر یوې نهه پوړیزۍ ودانۍ شوی دی.

له ۲۰۱۱ کال راهیسې چې د سوریې کورنۍ جګړه پيل شوې، اسراییل پر خپل دغه شمالي ګاونډي هېواد سلګونه هوایي بریدونه کړي دي.

فرانس پریس لیکلي چې دغه بریدونه د حزب الله په ګډون د ایران پلوه وسله والو ډلو او د سوریې د پوځ پر سنګرونو شوي دي.

اسراییل د دغه برید په اړه څه نه دي ویلي، خو وړاندې تر دې یې په ډاګه کړې چې په سوریه کې د ایران د نفوذ د مخنیوي هڅه کوي.

د ورځې تازه خبرونه دلته ولولئ

ولسمشر ټرمپ نن د اوکرایین له ولسمشر سره ګوري

ټرمپ او زیلنسکي - پخوانی انځور
ټرمپ او زیلنسکي - پخوانی انځور

ټاکل شوې چې د امریکا ولسمشر ډونالډ ټرمپ نن جمعه په سپینه ماڼۍ کې د اوکراین د ولسمشر ولودومیر زیلینسکي هرکلی وکړي.

تمه کیږي چې د بحث یوه مهمه موضوع به پرهغه تړون متمرکزه وي چې متحده ایالاتو ته په اوکراین کې د معدني زیرمو په شمول د ځمکې کمیابه عناصروته لاسرسی ورکوي.

پردې تړون له څو اونیو راهیسې خبرې شوې او ټرمپ ویلي چې زیلینسکي به په واشنګټن کې د دې سند لاسلیک کولو ته چمتو وي.

ولسمشر ټرمپ، چې څه باندې یوه میاشت وړاندې سپینې ماڼۍ ته بیرته ستون شوی له اوکراین سره د امریکا مرستې یې د دې هیواد د ځمکې نادرو زیرمو ته په لاسرسي پورې تړلې دي.

دغه زیرمې له اقتصادي پلوه ګټورې اوله ستراتیژیکې پلوه مهمې ګڼل کیږي.

د رویترز خبري آژانس د راپور له مخې ولسمشر ټرمپ چې د اوکراین د ولسمشرپه اړه یې مخکې ستوغې خبرې کړې وې او هغه یې ډیکټاټور یاد کړی و پرون پنجشنبې په واشنګټن کې د بریتانیا له صدراعظم کایر سټارمر سره له کتنې وروسته په یوه ګډه خبري غونډه کې وویل چې دی له زیلینسکي سره ډیرې ښې اړیکي لري.

اوکراین هیله من دی چې دا تړون به ټرمپ وهڅوي چې د روسیې لخوا د لاندې کړو سیمو د بیرته نیولو لپاره د کیف د هڅو ملاتړ وکړي.

دا تړون به همدارنګه وکولی شي په کانګرس کې د جمهوري غوښتونکو ملاتړ ترلاسه کړي چې له دې جګړه ځپلي هیواد سره نورې مرستې وکړي.

امریکا له اوکرایین سره د پوځي مرستو په بدل کې د دې هېواد طبیعي زیرمو ته د لاسرسي حق غواړي

د اوکرایین کابینې د امریکا هغه هوکړه لیک ته شین څراغ ښودلی چې پر بنسټ يې د امریکا د پوځي مرستو په بدل کې دا هېواد د اوکرایین له طبیعي زیرمو ګټه پورته کولی شي.

په دې اړه د امریکا او اوکرایین ولسمشرانو خبرې اترې کړي او ابتدايي طرحه يې اماده شوې خو لا تراوسه په رسمي ډول لاسلیک شوی نه ده.

د اوکرایین کابینې په هغه بیان کې چې د پنجشنبې په ورځ د (فبروۍ ۲۷مه) يې خپور کړی ویلي، د اقتصاد وزیر یولیا سویرینکو او د بهرنیو چارو وزیر اندري سیبیها ته يې اجازه ورکړې چې دا هوکړه لیک لاسلیک کړي.

تمه ده نن جمعه د اوکرایین ولسمشر ولادیمیر زلنیسکي پر دې هوکړه لیک د نظارت او د امریکا له ولسمشر ډونالډ ټرمپ سره د لیدو په موخه واشنګټن ته لاړ شي.

اتکل کیږي چې زلنیسکي به په دې لیدنه کې هڅه وکړي په سیاسي او پوځي برخه کې د اوکرایین لپاره د امریکا ملاتړ ترلاسه کړي.

د اوکرایین ولسمشر فرانس پرس خبري اژانس ته ویلي، دا هوکړه لیک هغه سند دی چې د امریکا او اوکرایین ترمنځ به په راتلونکې کې نورو همکارو ته لار خلاصه کړي.

د هغه په ټکو، د دغه هوکړه لیک په اړه د اوکراییني او امریکايي چارواکو ترمنځ خبرې روانې دي.

د اتلانو جام، نن کوربه پاکستان او بنګله دیش لوبه کوي

د اتلانو جام
د اتلانو جام

د چمپینز ترافۍ یا اتلانو جام د لوبو په ترڅ کې نن په اې ګروپ کې کوربه پاکستان له بنګله دیش سره لوبه کوي.
دغه لوبه د افغانستان په وخت د ماسپښین په یوه نیمه بجه د راولپنډۍ په کریکټ لوبغالي کې پيلیږي.

پاکستان او بنګله دیش دواړو خپلې دوه لومړنۍ لوبې بایللي دي.

بل لورته افغانستان سبا جمعه په دغه جام کې خپله دریمه لوبه له استرالیا سره کوي.

افغانستان پرون په خپله دویمه لوبه کې انګلستان ته په یوه هیجاني لوبه کې ماته ورکړه.

د روسیې او اوکراین جګړه، شمالي کوریا د روسیې ملاتړ ته تازه دمه سرتیري لیږلي

د شمالي‌ کوریا پوځیان، ارشیف
د شمالي‌ کوریا پوځیان، ارشیف

د جنوبي کوریا استخباراتي ادارې وایي، شمالي کوریا روسیې ته نور پوځي سرتیري هم استولي دي.

دوی د پنجشنبې په ورځ ( د کب نهمه) وویل چې د دغو پوځیانو یوشمېر یې له اوکراین سره پر پوله کورسک سیمه کې ځای پر ځای شوي دي.

د جنوبي کوریا YTN تلویزیون د خپل هېواد د استخباراتي ادارو په حواله راپور ورکړی چې روسیې ته د تازه دمه استول شویو کوریایي پوځیانو شمېر معلوم نه دی.

تر دې وړاندې جنوبي کوریا او لویدیځو هېوادونو ویلي وو چې شمالي کوریا تېر کال شاوخوا ۱۱ زره سرتیري روسیې ته لیږلي وو چې د اوکراین په ضد جګړه کې ورسره مرسته وکړي.

په اوکراین کې د روسیې جګړه روانه اونۍ ( د فبرورۍ په ۲۴مه) څلورم کال ته واوښته.

د اتومي انرژۍ اداره وايي، ایران د اتومي وسلې جوړولو ته نژدې شوی

د اتومي انرژۍ د نړیوالې ادارې تازه راپور ښیي چې د ایران د هغو غني شویو یورانیمو زېرمه، چې خالص والی یې د اتومي وسلې جوړولو ته نژدې دی، په چټکۍ سره زیاته شوې او لا هم د اختلافاتو په حل کې پرمختګ نه دی شوی.

دا اداره وایي، له کله چې ډونالډ ټرمپ د امریکا په انتخاباتو کې بریالی شوی، ایران د یورانیمو د غني کولو بهیر ګړندی کړی، او هغه حد ته یې نژدې کړی چې د اتومي وسلو د جوړولو لپاره کارول کېدای شي.

د دې محرم راپور له مخې، چې کاپي یې اسوشیېټډ پریس خبري اژانس د چهارشنبې (د کب/حوت ۸مه) په ورځ ترلاسه کړې، د ایران د ۶۰ سلنه غني شویو یورانیمو زېرمه د فبرورۍ تر ۸مې پورې نژدې ۲۷۵ کیلو ګرامه ته رسېدلې، چې دا د ۲۰۲۴ کال د نوومبر له میاشتې څخه ۹۲.۵ کیلو ګرامه زیاته ده.

د اتومي انرژۍ د نړیوالې ادارې د راپور له مخې، نژدې ۴۲ کیلو ګرامه ۶۰ سلنه غني شوی یورانیم که ۹۰ سلنې ته لوړ شي، د یوه اتومي بم د جوړولو لپاره کافي مواد برابرولی شي. په دې توګه، که دا پروسه دوام ومومي، ایران به د راتلونکي کال د دلوې/ سلواغې تر ۲۰مې پورې د شپږو اتومي بمونو د جوړولو لپاره کافي مواد ولري.

ایران پر دوی د امریکا نوي بندیزونه وغندل

د امریکا او ایران بیرغ
د امریکا او ایران بیرغ

د ایران د بهرنیو چارو وزارت ویاند اسماعیل بقایي پر دغه هېواد د امریکا نوي بندیزونه غندلي دي.

د چهارشنبې په ورځ، د فیبرورۍ ۲۶مه، د ایران د بهرنیو چارو وزارت په ایکس/ پخواني ټویټر کې، د بقایي په حواله ولیکل چې د هېوادونو ترمنځ د اقتصادي او سوداګریزو تعاملاتو په اړه پرېکړې کول د ملتونو د قانوني حق یوه برخه ده، چې هېڅ اړخ حق نه لري چې په سیاسي پلمو یې ګډوډ کړي.

د متحده ایالاتو د بهرنیو چارو وزارت او د خزانې وزارت د دوشنبې په ورځ، د فیبرورۍ ۲۴مه، د ایران د نفتي محصولاتو د لېږد او پلور سره تړلي یو شمېر اشخاص، شرکتونه او د تېلو لېږدونکي د نویو بندیزونو په لیست کې شامل کړل.

د امریکا د بهرنیو چارو وزارت ټینګار کړی چې ایران د خپل اټومي ګواښ، د بالستیک توغندیو پروګرام او د ترهګرو ډلو ملاتړ سره د نړیوال امنیت بې ثباته کولو ته دوام ورکوي.

د امریکا د نویو بندیزونو له مخې، د امریکایي اشخاصو یا شرکتونو لخوا د بندیزونو لاندې اشخاصو او ادارو سره هر ډول سوداګریزې معاملې منع دي، او په متحده ایالاتو کې د دوی هر ډول شتمنۍ کنګل کېږي.

سوډان کې پوځي الوتکه لویدلې، ۴۶ تنه په کې مړه شوي دي

د سوډان جنوب کې د الوتکې د لوېدو یوه پخوانۍ پیښه، آرشیف
د سوډان جنوب کې د الوتکې د لوېدو یوه پخوانۍ پیښه، آرشیف

چارواکي وایي چې په سوډان کې د یوې پوځي الوتکې د لوېدو په پیښه کې د مړو شمېر لږ ترلږه ۴۶ ته لوړ شوی دی.

پیښه پرون سه شنبه په اومدورمان ښار کې چې د پلازمېنې خرطوم اړوند دی، شوې ده.

د خرطوم مطبوعاتي دفتر ویلي چې پيښه کې لس تنه نور ټپيان شوي هم دي.

تر دې وړاندې رویټرز د سوډان د پوځ په حواله ویلي و چې دغه انتونوف پوځي الوتکه له وادي سیدنا هوایي اډې څخه تر الوتنې وروسته د امدورمان په شمال کې ولوېده.

خبر کې راغلي چې مرګ ژوبله پوځي او ملکي کسانو ته اوښتې ده.

تراوسه د پیښې لامل روښانه شوی نه دی.

په سوډان کې د ۲۰۲۳ کال له اپریل راهیسې د پوځ او د ( چټک ملاتړ ځواکونو) په نوم ملیشو ترمنځ جګړه پيل شوې ده.

د دغې جګړې له کبله لسګونه زره کسان وژل شوي او د ملګرو ملتونو د شمېرو له مخې څه باندې ۱۲ میلیونه له خپلو سیمو بې ځایه شوي دي.

جګړې په سوډان کې بشري ناورین رامنځته کړی دی.

حماس او اسراییلو د یرغملو او بندیانو د خوشې کولو پر دوام موافقه وکړه

رام الله، د فبروري لومړۍ نېټه- د اسراییلو له زندانه خوشې شوی فلسطینی
رام الله، د فبروري لومړۍ نېټه- د اسراییلو له زندانه خوشې شوی فلسطینی

د اسراییلو او حماس چارواکي وايي، د فلسطیني بندیانو د خوشې کېدو په بدل کې د اسراییلي یرغملو د مړو د سپارلو په برخه کې موافقه شوې ده.

اسراییلو له شنبې ورځې راهیسې د ۶۰۰ فلسطیني بندیانو د خوشې کولو بهیر، د یرغملو د خوشې کولو پرمهال د حماس د وسله والو د ناوړه چلند په غبرګون کې وځنډاوه. حماس چې امریکا او اروپايي ټولنه یې تروریستي ډله بولي، ویلي و، چې د اسراییل له زندانونو د دې بندیانو په خوشې کولو کې ځنډ له اوربند څخه جدي سرغړونه ده او د خبرو دوهم پړاو به د دې بندیانو تر خوشې کېدو پورې پیل نه شي.

دې لانجې دا ویره رامنځ ته کړې وه چې د غزې اوربند مات نه شي. د دې اوربند د لومړي پړاو شپږ میاشتې د بلې اونۍ له پیل سره سم پای ته رسېږي. خو حماس بېګا اعلان وکړ چې د دې ډلې د مخکښ چارواکي خلیل الحیا په مشرۍ پلاوی په قاهره کې د خبرو پرمهال له اسراییلو سره په دې اړه موافقې ته رسېدلی دی.

حماس په یو بیان کې ویلي چې دا موافقه به د څلورو نورو مْړو اسراییلي یرغملو د جسدونو سپارلو او د سلګونه فلسطیني بندیانو خوشې کېدو ته لاره اواره کړي. یوه اسراییلي چارواکي چې نه یې غوښتل نوم یې خپور شي ځکه د خبرو اجازه نه لري، هغه موافقه تایید کړه چې له مخې یې د اسراییلي یرغملو مړي دې هېواد ته سپارل کېږي خو اسراییلي رسنیو ویلي چې دا تبادله نن کېدونکې ده.

چارواکي وايي، کییف او واشنګټن د اوکراین طبیعي زېرمو ته د امریکا د لاسرسي پر سند موافقه کړې

ښکاري چې ټرمپ او زیلینسکي د اوکراین طبیعي زېرمو ته د امریکا د لاسرسي پر سند موافقه کړې ده.
ښکاري چې ټرمپ او زیلینسکي د اوکراین طبیعي زېرمو ته د امریکا د لاسرسي پر سند موافقه کړې ده.

رویټرز خبري آژانس د باخبره سرچینو په حواله راپور ورکوي چې متحدوایالتونو او اوکراین د هغه سند د مسودې په اړه موافقه کړې چې له کییف څخه د ملاتړ په بدل کې د اوکراین طبیعي زېرمو ته د امریکا لاسرسي ته لاره اواروي.

دا په داسې حال کې ده چې د امریکا ولسمشر ډونالډټرمپ هڅه کوي د روسیې او اوکراین ترمنځ جګړه ژرترژره پای ته ورسوي. د دې سند له مسودې څخه یوې باخبره سرچینې ویلي دي چې په دې موافقه کې د امریکا له خوا اوکراین ته د هېڅ راز امنیتي تضمین یا د وسلو د دوامداره مرستې یادونه نه ده شوې. یوې بلې سرچینې ویلي دي چې په راتلونکي کې اوکراین ته د وسلو د مرستو د مسئلې په اړه لاهم د واشنګټن او کییف ترمنځ بحثونه روان دي.

واشنګټن په دې اړه توافق تراوسه رسما نه دی تایید کړی خو ټرمپ خبریالانو ته وویل چې د اوکراین ولسمشر ولودیمیر زیلینسکي د جمعې په ورځ واشنګټن ته رسېږي او یوه ډېره لویه معامله به لاسلیک کړي.

له دې مخکې بلومبرګ راپور ورکړ چې تمه ده د اوکراین کابینه به نن چارشنبې (د فبروري ۲۶مه) د دې موافقې د لاسلیک سپارښتنه وکړي. فرانسپرس خبري آژانس د اوکراین د یوه جګپوړي چارواکي له قوله خبر ورکړی چې د دې هېواد حکومت د دې موافقې پر جزییاتو کار کوي.

د روسیې د بهرنیوچارو وزیر تهران ته ورسېد

د روسیې د بهرنیوچارو وزیر سیرګي لاوروف
د روسیې د بهرنیوچارو وزیر سیرګي لاوروف

د ایراني رسنیو د راپورونو له مخې د روسیې د بهرنیوچارو وزیر سیرګي لاوروف له ایراني چارواکو سره د خبرو لپاره نن (د کب ۷مه) تهران ته ورسېد.

د ایران د دولتي ټلویزیون د راپور له مخې لاوروف له خپل ایراني سیال عباس عراقچي سره ګوري. د ایران د بهرنیوچارو وزارت ویلي دي چې د لاوروف سفر یوورځنی دی.

د روسیې د بهرنیو چارو وزارت په یوه بیان کې ویلي دي چې لاوروف د عراقچي په بلنه تهران ته تللی دی. دې وزارت همداراز څرګنده کړې ده چې د روسیې جګپوړی ډیپلومات به د تهران او مسکو د اړیکو او د ځینو نړیوالو مسایلو په اړه خبرې وکړي.

نور راوښيه

XS
SM
MD
LG