د لاسرسۍ وړ لېنکونه

تازه خبر
یکشنبه ۳۱ چنګاښ ۱۴۰۳ کابل ۰۹:۰۷

پاکستان ته د طالب پلاوي سفر؛ د بحث مهم ټکي یې کوم دي؟


له ارشیفه د پاکستان د بهرنیو چارو وزارت تصویر
له ارشیفه د پاکستان د بهرنیو چارو وزارت تصویر

تمه ده چې د کندهار لپاره د طالبانو د والي ملا شیرین اخوند په مشرۍ اسلام اباد ته رسېدلی پلاوی به نن له بېلابېلو پاکستاني چارواکو سره وګوري.

ویل کیږي چې د تحریک طالبان پاکستان "ټي ټي پي" د کابل او اسلام اباد ترمنځ په رامنځته شویو ستونزو او د دواړو هېوادونو ترمنځ د مدیریت او امنیت په ګډون به دوه اړخیزو موضوعات دې لیدنو کتنو او خبرو مهم ټکي وي.

په اسلام اباد کې د ازادي راډيو د مشال څانګې خبریال طاهر خان وايي، په دې پلاوي کې د طالبانو د حکومت د بېلابېلو ادارو استازي شته او دا پلاوی به د افغانستان لپاره د پاکستان له ځانګړي استازي اصف دراني سره هم وګوري.

خان زیاتوي:

" په دې پلاوي کې د طالبانو د استخباراتو، دفاع او بهرنیو چارو وزارتونو استازي هم شته، مهمه موضوع به د خبرو د پاکستان د امنیت په اړه وي، ځکه اوس په پاکستان کې امنیتي حالات خراب شوي دي. د حملو زیاتوالي د طالبانو د حکومت او پاکستان ترمنځ اړیکې خرابې کړي او حالت ترینګلی شوی دی."

طاهر خان: د پاکستان پر امنیت به د طالب پلاوي د سفر د خبرو تر ټولو مهم بحث وي.
طاهر خان: د پاکستان پر امنیت به د طالب پلاوي د سفر د خبرو تر ټولو مهم بحث وي.

تېره ورځ پاکستاني رسنیو له دې ډلې جیو نیوز تلویزیون او ایکسپریس ټریبون ورځپاڼې اسلام اباد ته د دغه پلاوي د سفر خبر خپور کړ.

ایکسپریس ټریبیون لیکي، په دې سفر کې به د طالبانو پلاوی له پاکستاني چارواکو سره په ډیورنډ کرښه د اغزن تار لګولو، په چمن دروازې له ویزې پرته د ټرانزیټ، پاکستاني حکومت ته د تحریک طالبان پاکستان د غړو سپارلو یا هم له سرحدي سیمو د هغوی د انتقال او تر ټولو مهم؛ د ټي‌ټي‌پي او پاکستاني حکومت ترمنځ د خبرو په بیا پیل بحثونه وشي.

له دې وړاندې د روانې اونۍ د یکشنبې په ورځ ډاڼ پاکستاني ورځپاڼۍ هم په یو وراپور کې ویلي وو چې اسلام اباد ته د ملا شیرین په مشرۍ د دغه طالب پلاوی سفر د ټي ټي پي په سر د کابل او اسلام اباد ترمنځ د خرابو شویو اړیکو د رغولو هڅه ده.

د ډان ورځپاڼې په راپور کې راغلي وو چې دغه پلاوی به د پاکستان د بهرنیو چارو وزارت او استخباراتو له استازو سره هم لیدنې، کتنې وکړي.

ورځپاڼې لیکلي وو چې ملاشیرین د پاکستان سره په اړوند مسایلو کې بوخت پاتې شوی او دغه شان د طالبانو د حکومت له خوا د تحریک طالبان پاکستان سره په اړیکه کې دی.

د کندهار ولایت نقشه؛ ملا شیرین ډیورنډ کرښې ته د نیږدې دغه ولایت والي دی
د کندهار ولایت نقشه؛ ملا شیرین ډیورنډ کرښې ته د نیږدې دغه ولایت والي دی

د دغه پلاوي د سفر په اړه په کندهار کې د طالبانو د حکومت ویاند زموږ پوښتنې ځواب نه کړې، خو د طالبانو ویاند ذبیح الله مجاهد یو شمېر کورنیو رسنیو ته د دغه پلاوی سفر نه تایید کړی او نه هم رد کړی.

مجاهد ویلي چې ملاشیرین پاکستان سره د تحریک طالبان پاکستان په اړه خبرې نه کوي.

د ملا شیرین په مشرۍ دغه طالب پلاوی داسې مهال پاکستان ته سفر کوي چې په وروستیو کې د کابل او اسلام اباد ترمنځ اړیکي ظاهرا ترینګلې ښکاري.

پاکستان په افغانستان کې د طالبانو حکومت د ټي ټي پي په ملاتړ تورنوي او د طالبانو حکومت بیا پاکستاني وګړي د افغانستان په نا امنیو کې ښکېل ګڼي.

څو ورځې وړاندې د طالبانو د دفاع سرپرست وزیر یعقوب مجاهد په کابل کې یوې غونډې ته وویل چې د طالبانو له بیا واک ته رسېدو سره، په افغانستان کې په شویو بریدونو کې له تاجکستاني وګړو وروسته په دویم ګام کې زیات پاکستاني وګړي ښکېل وو.

اړوند مطالب

XS
SM
MD
LG