د لاسرسۍ وړ لېنکونه

تازه خبر
پنجشنبه ۱۷ لیندۍ ۱۴۰۱ کابل ۰۱:۴۳

فعالانو د افغان ښځو او نجونو اوسنی وضعیت د اندېښنې وړ وباله


په کابل کې د معترضو ښځو د لاریون یو انځور - May 26 2022

په افغانستان کې د بشري حقونو یو شمېر فعالان له طالب چارواکو سره د افغانستان د بشري حقونو په چارو کې د ملګرو ملتونو د ځانګړي راپـور ورکونکي ریچارډ بنیټ وروستۍ ليدنو، کتنو ته په اشارې سره د بشري حقونو په تېره بیا د ښځو او نجونو د حقونو اوسنی وضعیت د اندېښنې وړ بللی دی.

وروسته له هغې چې افغانستان لپاره د ملګرو ملتونو ځانګړي راپور ورکونکي ریچارډ بنیټ په افغانستان کې د بشري حقونو د بېلابېلو مسایلو په اړه له طالب چارواکو سره وکتل، اوس په افغانستان کې د بشري حقونو یو شمېر فعالان په ځانګړې ډول د ښځو د حقونو فعالان وايي چې دا ډول هڅې باید ونه درول شي.

د ملګرو ملتونو ځانګړی راپـور ورکونکی ریچارډ بنیټ
د ملګرو ملتونو ځانګړی راپـور ورکونکی ریچارډ بنیټ

دوی له ازادي راډیو سره په خبرو کې وویل چې په تېر يو کال کې د بشري حقونو وضعیت په ځانګړې ډول د ښځو او نجونو د حقونو وضعیت خراب شوی او ستونزې ورځ تر بلې زیاتېږي.

په افغانستان کې د ښځو د حقونو یوې فعالې قمر نیازۍ ازادي راډيو ته وویل: "زما په فکر دا ډول هڅې باید دوام ومومي، غونډې او خبرې اترې باید زیاتې شي، په ځانګړې ډول په افغانستان کې د ښځو د حقونه په هکله دې جدي بحث وشي. په دې برخه کې یوه یا دوه غونډې کافي نه دي. که چېرې ملګري ملتونه دا ډول هڅې زیاتې کړي، ښایي طالبانو ته قناعت ورکړي چې دوی د ښځو حقونو ته درناوی وکړي."

بل خوا په افغانستان کې د بشري حقونو یو شمېر فعالان له ملګرو ملتونو غواړي چې په افغانستان کې د بشري حقونو په ځانګړې ډول د نجونو او ښځو حقونو ته زیاته پاملرنه وکړي.

په افغانستان کې د بشري حقونو پخوانی فعاله سایمه خوګیاڼۍ وايي: "له هغې ورځې چې طالبان په افغانستان کې واکمن شوي، بشري حقونه په بشپړه توګه تر پښو لاندې شوي، د بېلګې په توګه ښځې د کار حق نه لري او له شپږم ټولګي څخه پورته نجونې ښوونځيو ته له تلو منع شوې دي. موږ له ملګرو ملتونو څخه غوښتنه کوو چې په افغانستان کې د بشري حقونو په ځانګړې ډول د ښځو له حقونو څخه جدي ملاتړوکړي."

د طالبانو له لوري فراه کې تړل شوی د نجونو یو ښوونځی
د طالبانو له لوري فراه کې تړل شوی د نجونو یو ښوونځی

دا په داسې حال کې ده چې د طالبانو حکومت په افغانستان کې د بشري حقونو په چارو کې د ملګرو ملتونو د ځانګړي راپور ورکونکي ریچارډ بنیټ او ځینو طالب چارواکو د لیدنې خبر ورکړی دی.

د طالبانو حکومت په يوې اعلاميه کې ويل شوي، چې د طالبانو د رییس الوزرا دويم مرستيال مولوي عبدالسلام حنفي سره ښاغلي بنیټ په ليدنه کې د هندوانو او افغان سېکانو پر ملاتړ د ټينګار تر څنګ، د نجونو د زده کړو، د ښځو د حقونو، بشري حقونو او د رسنیو پر فعالیتونو هم بحث وشو.

دا افغانستان ته د بشري حقونو په چارو کې د ملګرو ملتونو د ځانګړي راپور ورکونکي دویم سفر دی.

ښاغلی بنیټ چې په دې وروستیو کې یې ماموریت د یو بل کال لپاره وغځول شو، څلور میاشتې وړاندې یې هم افغانستان ته سفر درلود.

نوموړي هغه مهال په خپل راپور کې ویلي و چې په افغانستان کې د طالبانو حکومت په تېر یوه کال کې له بشري حقونو څخه ډېرې سرغړونه کړې دي.

هغه دا هم ويلي و چې په افغانستان کې د بشري حقونو وضعیت خراب شوی، افغانان د بشري حقونو په داسې بحران کې ایسار دي چې نړۍ یې د حل توان نه لري.

هغه مهال طالبانو د ښاغلي بنیټ راپور له حقیقته لرې بللی و.

په تېر دوبي کې واک ته د طالبانو په بياځلي رسېدو سره له شپږم ټولګي څخه پورته د نجونو لپاره ښوونځي وتړل شول او د دولتي ادارو ډېرې ښځینه کارکوونکې له دندو لرې شوې.

اړوند مطالب

XS
SM
MD
LG