د طالبانو حکومت په هرات کې د ښځو ټولې کافې تړلي دي

د طالبانو سیمه‌ییزو چارواکو په تېرو دوو اوونيو کې په هرات کې ټولې هغه کافې تړلي چې، ښځو ته ځانګړې شوې وې.

د دغو کافو د یوشمېر خاوندانو د معلوماتو له‌‌مخې، په هرات کې شپږ کافې چې د ښځو لپاره یې ځانګړی فعالیت کاوه، د طالبانو د امر بالمعروف او نهي عن‌‌المنکر ریاست له‌‌‌خوا تړل شوي دي.

له‌دې وړاندې د امر بالمعروف محتسبینو د دې کافو مالکانو ته ګواښ کړی و چې، خپله دې خپلې کافې وتړي.

په هرات کې یوه ښځه چې کافه یې د طالبانو له‌‌خوا تړل شوې، د خپل نوم او غږ د نه خپرېدو په شرط یې ازادي راډيو ته وویل: "موږ تر وروستۍ شېبې پورې خپله کافه خلاصه پرېښوده، خو چې پنځمه کافه هم بنده شوه، موږ هم خپله کافه وتړله. موږ د قانوني لارو په لټه کې یو، خو تر اوسه هيڅ حل‌لاره نه‌‌‌ده موندل شوې. موږ غوښتنه کوو چې دې مسئلې ته دې پاملرنه وشي، ځکه هغه دلیلونه چې دوی زموږ د کافې بندېدو لپاره وړاندې کړي، زموږ له کافې سره هيڅ تړاو نه‌‌‌‌لري. زموږ کافه د کتاب مطالعې لپاره وه او هيڅ داسې څرک نه وو په‌کې."

دا کافې زیاتره هغه وخت جوړې شوې وې، کله چې د طالبانو حکومت پر ښځو د زده‌کړو او کار بندیز ولګاوه، څو ښځې وکولی شي له‌دې ځایه د یوې خوندي فضا او تفریحي ځای په توګه استفاده وکړي.

هغه نجلۍ چې د طب محصله وه، اوس یې په هرات کې قهوه خانه جوړه کړې

د دې کافو د خاوندانو په وینا، د طالبانو د امر بالمعروف او نهي عن‌‌‌المنکر ریاست دا کافې د موسیقۍ د غږولو، د دخانیاتو د پلورلو او د دوی په خبره د ښځو لپاره د فساد د زمینې برابرولو په تور بندې کړي دي.

خو د دې کافو مالکانو دا تورونه بې‌بنسټه بللي دي.

د دغو کافو یو بل مالک، چې ده هم د موضوع د حساسیت له کبله غوښتنه کړې چې نوم او غږ یې خپور نه‌شي وویل چې، طالبانو یوازې د دغو کافو ښځینه برخه ورتړلې ده.

هغه وايي: "یوه دلیل چې کافې وتړل شوې دا و چې ویل یې ښځو ته د اخلاقي فساد زمینه برابره شوې او د دوی وخت دلته ضایع کېږي. اوس چې کافه بنده شوه، موږ اړ شو چې خپل کارکوونکي رخصت کړو، ځکه نور اړتیا نه وه. د خرڅلاو نیمایي برخه مو له لاسه ورکړې او که همدا وضعیت دوام وکړي، ښایي د نارینه‌‌و برخه هم په څو اوونیو کې بنده شي."

د ښځو د کافو د مسوولينو په وینا، طالبانو د دوی د کافې د تړلو لپاره هيڅ رسمي سند نه‌دی وړاندې کړی.

دا په‌‌‌داسې حال کې ده چې د طالبانو حکومت تل ادعا کړې چې له ښځينه متشبثینو ملاتړ کوي.

رویا حافظي چې د افغانستان د ښځو د سوداګرۍ د خونې پخوانۍ مسووله ده، د دغو کافو تړل اندېښمنوونکي بولي.

هغې ازادی راډيو ته وویل: "د کافو تړل د هغو محدودیتونو دوام دی چې پر ښځو لګول شوي دي. مخکې په ډېرو ولایتونو کې د ښځو د سینګار ځایونه هم تړل شوي وو. د اسلامي امارت حکومت تل شعار ورکوي چې موږ د ښځو د سوداګرۍ ملاتړ کوو، خو بدبختانه دا خبرې تل ضد او نقیض وې. تر اوسه مو هيڅ ملاتړ نه‌دی لیدلی. د کافو تړل د ښځو د سوداګرۍ راتلونکی ګواښي او د هغوی اقتصاد ته زیان رسوي."

تر دې وړاندې د طالبانو حکومت په ډېرو ولایتونو کې د ښځو سینګارتونونه هم تړلي وو.

په همدې حال کې ښځینه متشبثینو تل له ازادی راډيو سره په خبرو کې د طالبانو د واکمنۍ پر مهال د خپلو فعالیتونو پر وړاندې له شته ستونزو شکایت کړی دی.

خو د طالبانو حکومت تر دې وړاندې په ورته فرمانونو کې ښځې له رستورانتونو، تفریحي پارکونو او ورزشي لوبغالو منع کړې دي.

که څه هم طالبان ادعا کوي چې، د افغان ښځو حقونه د اسلامي شریعت په چوکات کې خوندي دي، خو د دوی د امر بالمعروف په نوي قانون کې، چې د روان میلادي کال د اګست په ۲۱مه تصویب شوی، په ۱۳مه ماده کې یې د ښځو د مخ پر بشپړ پوښښ ټینګار شوی او ان د دوی غږ هم "عورت" بللى شوی، هغه څه چې د نړیوالې ټولنې سخت غبرګونونه يې راپارولي.