د پښتون ژغورنې غورځنګ په اسلام آباد کې د تېرې جمعې ورځې له ترسره شوي لاریون وروسته د خپلو لسګونو غړیو د نیول کېدو خبر ورکوي چې په کې څو مشهورې څېرې هم شاملې دي.
په نیول شویو کسانو کې د بشري حقونو یوه مخکښه فعاله ایمان زینب مزاري او مخکښ سیاستوال او د قامي اسامبلې پخوانی غړی علي وزیر شامل دي.
دوی پرون یکشنبې وروسته له هغې ونیول شول چې د تېرې جمعې په ورځ یې په اسلام آباد کې په یوه لاریون کې ګډون او ویناوې وکړې.
ایمان زینب مزارۍ د عمران خان په مشرۍ د تحریک انصاف د ګوند د غړې او د بشري حقونو د پخوانۍ وزیري شیرین مزاري لور ده.
د زینب جنجوا په نوم یوې مدافع وکیلې فرانس پرېس خبري آژانس ته وویل چې دواړه فعالان پرون یکشنبې د اسلام آباد په یوه محکمه کې راڅرګند شول او د تروریزم ضد قانون لاندې یوه دوسیه کې په توقیف کې پاتې شول.
د محکمې په یوه سند کې چې یوه کاپي یې دې آژانس لیدلې، د پاکستان پولیسو ویلي چې دوی له جدي تورونو سره مخامخ دي، خو په دې اړه نور جزییات نه دي ورکړل شوي.
د پښتون ژغورنې غورځنګ ویلي چې د تېرې جمعې ورځې له ترسره شوي لاریون وروسته یې په لسګونو غړي نیول شوي دي.
په دغه لاریون کې چې د راپورونو له مخې تر درې زره پورې کسانو ګډون کړی وو، مېرمن مزاري او علي وزیر دواړو په خپلو ویناوو کې د پښتنو ځورونه وغندله او خپلو کورونو ته یې د نیول شویو کسانو د بېرته ستنولو غوښتنه وکړه.
د پاکستان د بشري حقونو کمېسیون پرون یکشنبې د یوې اعلامیې په خپرولو سره دغه نیونې د نه منلو وړ بللي او ویلې یې دي چې دا د بیان او د غونډو جوړولو لپاره د خلکو د حق پر وړاندې د دولتي تاوتریخوالي یوه ښکاره بېلګه ده او پر دغې تګلارې یې اندېښنه څرګنده کړې ده.
د بشري حقونو پخوانۍ وزیرې شرین مزاري ویلي چې پولیسو یې لور د خوب په جامو کې بوتله او زیاته یې کړه چې پولیسو د هغې د نیولو لپاره نه امر ورښکاره کړ او نه یې هم لور ته اجازه ورکړه چې خپلې جامې بدلې کړي.
علي وزیر، چې د پښتون ژغورنې د غورځنګ یو مخکښ غړی او د پاکستان د پوځ سخت منتقد او افغانستان پولې ته څېرمه قبایلي سیمو کې یې د پوځ د ترهګرۍ ضد عملیاتو باندې سخت انتقاد کړی، له دې مخکې هم څو ځلې نیول شوی دی.
نوموړی د ایالتي حکومت غړی و چې د روانې میاشتې په پیل کې ړنګ شو.
په پاکستان کې چارواکو په وروستیو څو میاشتو کې د مخالفینو ځپنې ته زور ورکړی او د پخواني صدراعظم عمران خان هغه ځواک یې مات کړی چې لارو او کوڅو کې یې د لاریونونو په ترسره کولو سره نندارې ته وړاندې کړی و.
عمران خان، چې تېر کال له قدرته لرې کړای شوی، روانه میاشت د فساد په تور زنداني شو.
خو نوموړي پر ځان لګول شوي تورونه رد کړي او هغه یې سیاسي انګېزه بللې ده.
