د طالبانو د حکومت د بهرنیو چارو وزارت د هلمند سیند د اوبو د کچې د معلومولو لپاره دهراود ته د ایراني پلاوي سفر تایید کړ.
د طالبانو د حکومت د بهرنیو چارو وزارت وايي چې ایراني پلاوي په دهراود کې د اوبو کچه د نورمالو کلونو پرتله خورا کمه ګڼلې ده.
تر دې مخکې پرون یکشنبه په افغانستان کې د ایران سفیر حسن کاظمي قمي ویلي وو، ایراني متخصصان په لومړي وار د هلمند سیند د اوبو د لانجې په تړاو د افغانستان د اروزګان ولایت دهراود ولسوالۍ ته لاړل.
قمي همدراز وویل چې د دوی تخنیکي پلاوی اوس په کابل کې دی، او ژر به خپل راپور وړاندې کړي.
د طالبانو د حکومت د باندنیو چارو وزارت په یوه خبرپاڼه کې پرون یکشنبه وویل چې د ایران تخنیکي پلاوي په دهراود کې د هلمند سیند اوبو د کچې له کتلو وروسته نتیجه ترلاسه کړه چې د وچکالۍ له کبله د نورمالو کلونو په نسبت اوبه ډېرې کمې دي.
دا وزارت وايي، ایراني پلاوي اوبه اندازه کړې، د اوبو بهیر په هره ثانیه کې تر اوو متره ټیټ و او دا ډېر بوږنوونکی حالت دی.
د هلمند د اوبو پر سر د ایران او د طالبانو د حکومت ترمنځ په وروستیو کې ترینګلتیا رامنځته شوې وه.
د ایران د ولسمشر په شمول ځینو ایراني چارواکو طالبان په دې تورن کړل چې د ۱۳۶۱ لمریز کال د تړون پر اساس د ایران د اوبو حق نه ورکوي خو طالب چارواکو په ځلونو ویلي چې د وچکالۍ له کبله د اوبو اندازه کمه شوې ده.
په همدې حال کې د طالبانو د حکومت د اوبو او انرژۍ وزارت ویندوی مطیعالله عابد پرون اریانا نیوز تلویزېون ته وویل چې هېڅ ایرانی پلاوی کجکي او کمال خان بند ته نه دی تللی او د ۱۳۵۱ لمریز کال د تړون پر اساس ایرانی پلاوی یوازې د خاصو شرایطو او میکانیزمونو پر اساس د دهراود هغه ځای ویني چې د اوبو د اندازه کولو اله پهکې نصب ده.
د دهراود د اوبو اندازه کولو اله تر کجکي پورته نصب شوې او دا اله هلمند سیند ته د بهېدونکو اوبو اندازه معلوموي.
د طالبانو د حکومت د باندنیو چارو وزارت په اعلایمه کې ویل شوي چې ایراني پلاوي ته دهراود د اوبو مېچلو الې له کتلو وروسته څرګنده شوې چې په هلمند سیند کې د اوبو بهیر حداقل ته رسیدلی او د دې سیند مرستیال سیندونه لکه ارغنداب، موسي کلا، ارغستان او ترنک سیندونه بیخي وچ شوي او یوازې د سیلونو په مهال اوبه پهکې بهېږي.
افغانستان او ایران په ۱۳۵۱ لمریز کال، چې په دواړو هیوادونو کې شاهي نظامونه وو، د هلمند د اوبو د وېش تړون لاسلیک کړ.
د دې تړون پر اساس افغانستان منلې چې په نورمال کلونو کې به، چې وچکالي نه وي، ایران ته ۸۲۰ میلیون مترمکعب اوبه ورکوي.
