د طالبانو او ایراني پوځیانو ترمنځ د نیمروز ولایت په کنګ سرحدي ولسوالۍ پرون یوځل بیا نښتې وشوې.
د نیمروز ولایت په کنګ سرحدي ولسوالۍ کې د طالبانو او ایراني پوله ساتو ترمنځ نښته بېګا تر ناوخته پورې روانه وه.
په دې جګړه کې دواړو لورو له درنو او سپکو وسلو کار اخیست.
د طالبانو د حکومت د کورنیوچارو وزارت پرون جګړه تایید کړه او له دواړو لوریو یې د تلفاتو خبر ورکړ.
د دې وزارت ویاند عبدالنافع ټکور له ازادي راډیو سره په خبرو کې وویل: "په نښته کې له دواړو خواوو یو یو تن وژل شوی او ګڼ شمېر نور هم ټپیان دي. موضوع د دواړو غاړو تر مشرانو رسېدلې ده. اوس وضعیت د کابو کېدو په حال کې دی. د یادونې وړ ده چې اسلامي امارت له هېچا سره د نښتو پلوي نه کوي."
ایراني رسنیو هم د جګړې د پای ته رسېدو خبر ورکړی.
سپاه پاسداران ځواک ته د نژدې فارس خبري آژانس د راپور له مخې د دواړو هېوادونو سرحدي چارواکو د دې پېښې په اړه څېړنې پیل کړې دي.
ایرنا خبري آژانس راپور ورکوي چې په دې نښته کې د ایران د سرحدي ځواکونو دوه سرتېري وژل شوي او دوه ملکي وګړي ټپیان دي.
د ایرنا د راپور له مخې له جګړې وروسته په کنګ ولسوالۍ کې د میلک سرحد تر بلې خبرتیا پورې تړل شوی دی.
فارس خبري آژانس راپور ورکړی چې معلومه نه ده پرونۍ نښته د کومو کسانو ترمنځ شوې، خو د طالبانو تر ادارې لاندې باختر خبري آژانس بیا ویلي، جګړه هغه مهال پیل شوه چې ایراني سرتېرو د کنګ ولسوالۍ پر سیمو ډزې وکړې.
باختر د دفاع وزارت د سرچینو په حواله خبر ورکوي چې وايي، د هرې ستونزې لپاره خبرې معقوله لار ده او منفي اقدامات او د جګړې لپاره د پلمو لټول د یوه لوري په ګټه هم نه دي.
سیمه ایزو سرچینو ازادي راډیو ته وویل چې جګړه پای ته رسېدلې ده.
د سرچینو په وینا، د افغانستان لوري ته د جګړې په ټپیانو کې لږترلږه درې مېرمنې او څلور ماشومان هم شامل دي.
د نښتې عیني شاهدان وايي، د دواړو خواوو ترمنځ جګړه درنه وه.
د مرکز زرنج یوه اوسېدونکي چې نه غواړي نوم یې په راپور کې یاد شي ازادي راډیو ته وویل: "د دواړو خواوو ترمنځ جګړې څو ساعته دوام وکړ. له درنو او سپکو وسله وسلو کار واخیستل شو. ایراني ځواکونو عمومي ځایونه لکه د زرنج ښار پخوانی هوايي ډګر او د استوګنې کورونه په نښه کړل."
پرون په داسې حال کې چې په نیمروز کې جګړه لا روانه وه، د طالبانو د حکومت د بهرنیو چارو وزیر امیرخان متقي په کابل کې د ایران له سفیر حسن کاظمي قمي سره وکتل.
دې وزارت په یوه بیان کې په ضمني ډول یادونه کړې چې متقي او قمي د دواړو خواوو په همغږۍ، د سرحد پر مدیریت ټینګار وکړ خو په بیان کې د پرونۍ نښتې یادونه نه ده شوې.
د هلمند سیند په اوبو کې د ایران د اوبه خور په اړه د ایران د ولسمشر ابراهیم رییسي له تندو څرګندونو او په ځواب کې یې د طالبانو له تند غبرګون وروسته دا لومړی ځل دی چې د طالبانو او ایران ځواکونه سره نښلي.
خو پر افغانستان د طالبانو له واکمنېدو په راوروسته موده کې دواړو خواوو له دې مخکې څوځلې نور هم په سرحد کې نښتې کړې دي.
