د افغانستان په اړه د نړيوالو ورځپاڼو تبصرې
پر امریکايي ورځپاڼو سربېره د برېتانیا او کاناډا ورځپاڼو هم له افغانستانه د ۲۰۲۱ په اګست کې د امریکايي پوځیانو د بې بندوبسته وتلو په اړه کانګریس ته د امریکا د اوسني ولسمشر پر توضیحاتو لیکنې خپرې کړي دي.
مېل ورځپاڼه:
د برېتانیا مېل ورځپاڼې کښلي چې ولسمشر جو بایډن ټوله پړه پر پخواني ولسمشر ډونالډ ټرمپ اچولې ده.
د امریکا ولسمشر جو بایډن د کابل د هوايي ډګر د پېښې په اړه د تحقیقاتو امر کړی و او ویلي و چې، په دې څېړنه کې باید څرګنده شي چې څه شی سبب شو چې دا پېښه رامنځته شي.
سپینې ماڼۍ د پنجشنبې په ورځ له افغانستانه د ځواکونو د ایستلو او د امریکا د اوږدې جګړې د پای ته رسولو په اړه ۱۲ مخیز راپور خپور کړ.
په دغه راپور کې د خپلو اقداماتو په اړه د ولسمشر بایډن مسوولیت ته لږه اشاره شوې ده.
د امریکا حکومت وايي، له افغانستانه د ځواکونو له ایستلو وروسته ارزونې، چې د پنجشنبې په ورځ کانګریس ته وسپارل شوې، خورا محرمانه دي او د خلکو د لیدو لپاره به خپرې نهشي.
د سپینې ماڼۍ د مالوماتو پر اساس، په دې ارزونه کې ویل شوي چې، له افغانستانه د ځواکونو د ایستلو په اړه ولسمشر بایډن ډېر انتخاب نه درلود مګر دا چې د پخواني ولسمشر له پرېکړې سره سم اقدام وکړي.
واشنګټن ټايمز ورځپاڼه:
خو واشنګټن ټایمز ورځپاڼې لیکلي چې د سپینې ماڼۍ راپور د کانګریس د جمهوریپالو غړیو له قهرجن عکس العمل سره مخامخ شو.
جمهوریپالو غړیو د تحقیقاتو لپاره د ولسمشر بایډن پر حکومت فشار راوست چې له افغانستانه د بې بندوبسته وتلو په اړه دوی ته راپور وړاندې کړي.
د کانګریس د استازو جرګې د بهرنیو اړیکو کمېټې جمهوریپال رئیس مایکل مککال پر حکومت توندې نیوکې وکړې، ویې ویل چې د ځواکونو د ایستلو امر بایډن کړی و او مسوولیت ده ته ورله غاړې دی.
مککال، چې د ځواکونو د ایستلو په مهال د ګډ وډیو په اړه د جمهوریپالو له لوري د پیل شویو څېړنو څارنه کوي، وايي چې پر بهرنیو چارو او دفاع وزارتونو د ده پر له پسې تورونو او د هغو د احضارولو خبردارۍ سبب شول چې بالاخره حکومت کانګریس ته سند یا راپور ولېږي.
په سند کې، منل شوې چې حکومت له افغانستانه د ځواکونو له ایستلو یو لړ درسونه زده کړي دي.
له افغانستانه د ځواکونو ایستلو د امریکا د تاریخ تر ټولو اوږده جګړه پای ته ورسوله خو په نتیجه کې یې طالبان یو وار بیا واک ته ورسېدل.