د افغانستان لپاره د امریکا د سفارت شارژدافېره وايي، د نړۍ هېڅ هېواد اوسمهال پلان نه لري چې د طالبانو حکومت په رسمیت وپېژني.
د افغانستان لپاره د متحدوایالتونو د سفارت شارژدافېره کرن ډیکر وايي، که څه هم یو شمېر هېوادونو په دې وروستیو کې د طالبانو استازو ته د افغانستان په سفارتونو کې ځای ورکړی، خو هغې وویل، هېڅ هېواد هم د طالبانو د حکومت د رسمیت پېژندنې پلان نه لري.
مېرمن ډیکر چې پرون له یو شمېر افغان ښځینه خبریالانو سره په انلاین غونډه کې خبرې کولې دې پوښتنې ته چې ایا متحدایالات به د دې هېوادونو لاره تعقیقب کړي که نه په ځواب کې وویل چې متحدایالات هم داسې یو پلان نه لري.
هغې زیاته کړه: "موږ له ټولو دې هېوادونو اورېدلي دي چې دوی پلان نه لري د طالبانو حکومت د افغانستان د مشروع حکومت په توګه په رسمیت وپېژني. زما درک دا دی چې زما د خپل هېواد په ګډون داسې کوم هېواد نه شته چې د طالبانو د حکومت د رسمیت پېژندنې پلان ولري. نو که طالبان له نورې نړۍ سره ښه اړیکې غواړي، باید د خپل هېواد له ښځو او نارینه وو سره ښه اړیکې ولري."
په روانه اونۍ کې د طالبانو د حکومت د بهرنیوچارو وزارت یو پلاوی تاجکستان ته تللی و، څو په خاروغ ښار کې د افغانستان له قونسلګرۍ څخه لیدنه وکړي.
طالبانو ته په مسکو او پېکېنګ کې د افغانستان د سفارتونو له سپارلو وروسته په تهران کې د افغانستان سفارت د طالبانو حکومت ته وسپارل شو.
همداراز په دوبۍ او استانبول ښارونو کې د افغانستان قونسلګرۍ هم طالبانو ته سپارل شوې دي.
د امریکا د سفارت شارژدافېرې په خپلو پرونیو څرګندونو کې هغه راپورونه هم رد کړل چې ګنې امریکا د طالبانو حکومت ته نقدې پیسې ورکوي.
مېرمن ډیکر وویل، متحدایالات له افغانستان سره تر ټولو زیاتې بشري مرستې کوي، خو د هغې په وینا دا پیسې د ملګروملتونو د ادارو له لارې د افغانستان له خلکو سره د بشري مرستو په پار کېږي.
نوموړې زیاته کړه، دا طالبان دي چې وایي، امریکا دوی ته نقدې پیسې ورکوي.
د نوموړې په وینا حقیقت دا دی چې متحدوایالتونو له دوی سره د یوې افغانۍ مالي مرسته هم نه ده کړې.
طالبان تقریباً هره میاشت په منظم ډول د نړیوالو د بشري مرستو د کڅوړو د ترلاسه کولو خبر ورکوي، خو هېڅکله یې نه دي ویلي چې دا مرستې کوم هېواد یا کوم نړیوال سازمان ورسره کوي.
