یو شمېر کابل مېشتي وايي، که څه هم د نفتي توکو او تېلو بیې راټېټې شوي، خو د خلکو په ژوند یې هیڅ مثبت اغېز نهدی کړی.
دوی نیوکه کوي چې د تېلو او نفتي توکو د بیو په راټېټېدو سره بیا هم د موټرو په کرایو کې کمی نهدی راغلی.
د کابل یو اوسېدونکی ظفر ازادي راډیو ته وايي: "که څه هم د تېلو بیې را کمي شوي، خو د موټرونو په کرایو کې تغییر نهدی راغلی، یعنې د خلکو په ژوند یې مثبت بدلون نهدی راوستی. په افغانستان کې له بده مرغه چې کومه ستونزه ده، هغه دا ده چې یو ځل د یوه توکي بیه پورته شي، هغه که تېل وي یا خوراکي مواد، ورسره د موټرو کرايې پورته کېږي، خو بیې چې بیا راټېټې شي، نه کرایه ارزانېږي او نه هم خوراکي مواد."
"که څه هم د تېلو بیې را کمي شوي، خو د موټرونو په کرایو کې تغییر نهدی راغلی
ظفر له طالب چارواکو غواړي چې په بازار کې د توکو د بیو کنټرول ته پام وکړي.
دا په داسې حال کې ده چې د طالبانو حکومت د صنعت او سوداګرۍ وزارت وايي، له روسیې سره د تېلو له قرارداد وروسته، په افغانستان کې د تېلو بیه ۱۰ سلنه راښکته شوې ده.
د دې وزارت ویاند عبدالسلام جوادي په دې اړه ازادي راډیو ته وویل: "د کال له پیله تر اوسه موږ له یو شمېر هېوادونو سره هوکړې کړي. په ژمي کې وتوانېدو چې د نفتي او خوراکي توکو بیې عادي وساتو. د سالنګ له بندېدو سره بیې یو څه پورته شوې، خو بېرته راټېټې شوې. هغه معلومات چې موږ لرو، د تېلو بیې ۱۰ سلنه راښکته شوي، د ګازو بیه چې ۷۵ افغانۍ شوې وه، اوس ۶۲ تر ۶۳ افغانیو ده."
یو شمېر موټر چلوونکي بیا د تېلو د بیو په راټېتېدو خوښ دي.
بسمالله چې د غزني اوسېدونکی دی او اوس په کابل کې ټکسي چلوي ازادي راډیو ته یې وویل: "وړاندې تېل ۱۰۵ افغانۍ و، اوس په ۷۵ دي، که له دې ارزانه شي، ښه به وي، ځکه زموږ په کار روزګار ښه اغېز لري. وړاندې چې موږ د ۴۰۰ افغانیو تېل اچول، اوس یې په درې یا هم درې نیم سوه اچوو، له هره اړخه موږ ته سل یا دوه سوه افغانۍ ګټه لري."
د ژمي په پیل کې افغانانو شکایت کاوه چې د نفتي موادو او خوراکي توکو بیې پورته شوي دي.
دوی ازادي راډیو ته ویلي و، اقتصادي ستونزې یې د دې لامل شوي چې د هوا په سړېدو سره د دې توکو د اخیستلو توان نهلري.
د طالبانو حکومت د صنعت او سوداګرۍ وزارت د معلوماتو پر بنسټ، له روسیې سره د دوی د هوکړې پر بنسټ، روسیه افغانستان ته یو ملیون ټنه پټرول، یو میلیون ټنه ډیزل، ۵زره ټنه مایع ګاز او دوه میلیونه ټنه غنم ورکوي.
