۲۰۲۲ کال له داسې بې مخینې تحولاتو سره تړلی و چې نوی ۲۰۲۳ کال به یې هم له پایلو اغېزمن وي.
اسټرالیا او نیوزیلنډ د نوي کال په نمانځلو کې مخکښان وو.
د سیډني ښار د ۲۰۲۳ کال د جشن لپاره بې سارې اورلوبې او نندارې جوړې کړې وې.
وروسته د جاپان، چین او تایلنډ خلکو هم نوی کال په خاصو مراسمو او اورلوبو سره ونمانځله.
اروپايي هېوادونو هم د اورلوبو او ځانګړو مراسمو سره د نوي کال هرکلی وکړ.
د ملګرو ملتونو سرمنشي انټونیو ګوټرېش په خپل ټویټر کې په یوه لنډ پيغام کې وویل: "هر نوی کال د بیا زېږون شېبه ده. راځئ چې په ګډه ۲۰۲۳ کال داسې جوړ کړو چې ژوند، کور او نړۍ ته سوله بېرته راستنه شي."
۲۰۲۲ کال په اوکراین باندې د روسیې د یرغل، د حکومت پر ضد د ایراني ولس مظاهرو او د مظاهره چیانو ځپل، په افغانستان کې د ناوړه بشري او اقتصادي وضعیت د دوام او د نړۍ د څو مهمو او مشهورو کسانو د مړینو له پېښو او تحولاتو سره مخ وو.
د بریتانیا ملکه دوهمه الیزابت، د نړۍ مشهور فوټبال ستوری پېلې، د جاپان پخوانی صدراعظم شینزو ابې، د چین پخوانی ولسمشر جیانګ زیمین او د پخواني شوروي اتحاد وروستی مشر میخایل ګرباچوف په ۲۰۲۲ کال کې مړه شول.
د نوي کال په ماښام د عیسویانو پخواني پاپ شپږم بنډیکټ له دې نړۍ سترګې پټې کړې.
په تېر نومبر میاشت کې د نړۍ نفوس له اتو میلیاردو څخه واوښت.
ځینو اوکراینیانو نوی کال د شمعې په رڼا کې په دعا سره ونمانځه.
پر اوکراین د روسیې له برید درې سوه ورځې تېرې شوې دي.
د ملګرو ملتونو د شمېرو له مخې، په دې جګړه کې څه باندې اووه زره کسان وژل شوي او لس زره نور کسان ټپیان شوي.
شپاړس میلیونه اوکراینیان بې کوره شوي دي.
د اوکراین د انرژۍ په زیربناوو باندې د روسیې د هوايي بریدونو په پایله کې د دغه هېواد په ډېرو سیمو کې برښنا پرې شوې او خلک تر ډېره په تیاره کې ژوند کوي.
په مسکو کې هم د نوي کال اورلوبې وروسته له هغه لغوه شوې چې ښاروال سرګي سوبیانین له خلکو څخه د دې جشن د نمانځلو په اړه د دوی نظرونه وغوښتل.
خو په چین کې نوی ۲۰۲۳ کال په داسې حال کې پیل شو چې دغه هېواد د محدودیتونو له لرې کېدو وروسته د کرونا ویروس له زیاتوالي سره مخ دی.
په داسې حال کې چې د واکسين په نتيجه کې د نړۍ په ټولو هېوادونو کې د خلکو ژوند عادي حالت ته راګرځېدلی، چين لا هم د دغه ويروس د خپرېدو په مخنيوي کې له ستونزو سره مخ دی.
په چین کې روغتونونه چې د نړۍ ترټولو نفوس لرونکی هېواد دی له ناروغانو ډک دي.
له دې سره سره بیا هم نوی کال خلکو په تیاترونو، میخانو او هوټلونو کې ونمانځه.
