- والسټریټ ژورنال
له امریکا خپریدونکې والسټریټ ژورنال ورځپاڼې یوه لیکنه خپره کړې چې سرلیک یې دی"افغانستان کې چا ګټه وکړه؟ "
د لیکوال په باور د افغانستان له جګړې خصوصي قرادادیانو ډیره ګټه پورته کړه.
په لیکنه کې وړاندې راغلي، هغه کسانو کې چې افغانستان ته یې د امریکا د دولت د پیسو د بهېر له ورماتېدو ګټه وټه ترلاسه کړه، د وسلو له لویو تولیدونکو نېولی تر سوداګرو پورې کسان شامل وو.
والسټریټ ژورنال لیکلي:
د کلفورنیا یو سوداګر چې په قرغزستان کې یوه میخانه لري، د سونګ د موادو د کاروبار له درکه یې میلیاردونه ډالر عواید ترلاسه کړي.
لیکنه وړاندې وايي، یو ځوان افغان ترجمان، نړیوالو ځواکونو ته د سرتختي د چمتو کولو له قرارداده د سوداګرۍ په یو امپراتور بدل شو او یوه ټلوېزیوني شبکه او یو داخلي هوايي شرکت یې جوړ کړل.
همدارنګه د امریکا د پوځ د ملي ګارډ د دوو سرتیرو په اړه لیکي چې له اوهایو څخه یې یې یو وړوکی کاروبار پیل کړ.
دوی د امریکا په پوځ کې د کار لپاره افغان ترجمانان استخدامول او په دې سره د امریکا د پوځ په مهمو قراردادیانو بدل شول.
ورځپاڼه د موجودو اسنادو پر بنسټ وايي، د فډرال د قراردانونو له دې کاروباره څلور میلیارده ډالر ترلاسه شوي دي.
والسټریټ ژورنال په دې لیکنه کې وړاندې وايي، د امریکا متحده ایالاتونه له افغانستانه د خپلو ځواکونو د بشپړې وتنې څلور میاشتې وروسته د هغو درسونو په ارزونه بوخت دي چې باید له دې جګړې زده شي.
یو شمېر چارواکي او څارونکې ډلې وايي، په دې منځ کې یوه موضوع، د جګړې په ډګر کې پر قراردادیانو اتکا او د جګړې د لګښت د لوړېدو څرنګوالی دی.
د امریکا متحده ایالاتونو د ۲۰۲۱ م زیږدیز کال د اګسټ د میاشتې په پای کې په افغانستان کې خپله شل کلنه جګړه پای ته ورسوله او خپل ټول ځواکونه یې له دې هېواد څخه وویستل.
تېره اوونۍ راپور ورکړل شوی چې د امریکا د جمهوري غوښتونکو او ډموکراټانو یوه ځانګړې ۱۶ کسېز کمېسیون د افغانستان د جګړې ارزونه کوي.
- هندو
له هندوستان خپریدونکې هندو ورځپاڼې په یو راپور کې لیکلي چې هند نوی میلادي کال پرون افغانستان ته د پنځه سوه زره ډوزه کرونا ضد واکسینونو په ورکولو پیل کړ.
د هند د بهرنیو چارو وزارت وايي، د بشري مرستې دا بسته د هغو یو میلیون ډوزه واکسینو نیمايي دي چې هند یې افغانستان ته د مرستې په توګه ورکوي.
دې وزارت همدارنګه ویلي دي چې هند د افغانستان خلکو سره د بشري مرستو دوام ته ژمن دی.
په لیکنه کې وړاندې ویل شوي، دا له افغانستان سره د هند د بشري مرستو یوه له لویو پروژو څخه ده چې په کې به درمل او غنم هم شامل وي او د ملګرو ملتونو له بنسټونو سره په همغږۍ به تنظیمیږي.
هندوستان تر دې مخکې د ۲۰۲۱ م کال د فبروري په میاشت کې افغانستان ته د کرونا ضد واکسینونو یوه بسته استولې وه، خو پر افغانستان د طالبانو د بیا واکمنېدو راهېسې دا افغانستان ته د هند له خوا د کرونا ضد واکسینو لومړنۍ مرسته ده.
افغانستان کې د طالبانو د حکومت د روغتیا وزارت د شنبې په ورځ وویل چې د دې هېواد روغتیايې سیستم له ستونزمن وضعیت سره مخ دی.
د دې وزارت په وینا پخواني حکومت کې د روغتیا سکتور تر ډېره په بهرنیو مرستو تکیه و او د بهرنیو مرستو له بندېدو سره د افغانستان روغتیايي سیستم له ستونزو سره مخ دی.
نړیوال روغتیايي سیستم د سېپټمبر میاشت کې خبرداری ورکړی و چې افغانستان کې روغتیايي سیستم د نړېدو په حال کې دی.
