د بلوچستان په «جل مګسي» کې د یوه صوفي پر مزار ځانوژونکی برید شوی چې شل تنه یې وژلي او شااوخوا دېرش تنه یې ټپیان کړي دي.
جل مګسي د بلوچستان په جنوب ختیځ کې د شااوخوا درې نیم سوه کېلومتره په فاصله پرته سیمه ده.
پرون د پنجشنبې په ماځیګر د دې سیمې په فتح پور سیمه کې د یوه صوفي پیر رکیل شاه پر مزار سلګونه کسان را غونډ شوي وو چې ناببره د مزار په دروازه کې یوه زوروره چاودنه وشوه او لسګونو کسان یې مړه او ژوبل کړل
د جل مګسي مرستیال کمېشنر اسد کاکړ رسنیو ته وویل چې د مزار په لویه دروازه کې پولیس عسکر د امنیت ساتلو لپاره ولاړ وو او په دې مهال یو مشکوک تن- چې مزار ته د ننوتلو هڅه یې کوله- یوه پولیس افسر د تالاشۍ لپاره و دراوه چې په همدې وخت یوه زوروره چاودنه وشوه.
د جل مګسي د مرکز ګنداوا د روغتیا مسئوله ډاکټره رخسانه مګسۍ وايي، تېر ماښام په چاودنه کې د پنځلسو وژل شویو کسانو جسدونه د مرکز روغتون ته وروړل شوي وو او شااوخوا دېرش تنه ټپیان وو، خو اوس د مړیو شمېر شل تنو ته رسېدلی چې یو پولیس افسر او درې ماشومان هم پکې شامل دي.
مګسۍ وايي، د چاودنې شااوخوا شل تنه ټپیان- چې د ځینو حالت مرګونی بلل شوی- د سید لاړکانې او د بلوچستان مرکز کوټې ته وړل شوي دي.
د بلوچستان د کورنیو چارو وزیر میر سرفراز بګټی وایي، دا یو ځانوژونکی برید وو.
وایي د چاودنې له ځایه یې داسې شواهد تر لاسه کړي چې یو تن د مزار په دروازه کې په ځان پورې تړلي چاودېدونکي مواد چاودلي دي، خو د ځانوژونکي د هویت په اړه یې څه نه ونه ویل.
بګټی وایي، که ځانوژونکی مزار ته ننوتی وای، نو د چاودنې تلفات به تر دې څو چنده زیات وای.
له سیمې د تر لاسه شویو مالوماتو په اساس، د پیر سید رکیل شاه په دې مزار کې په کال کې یو لوی عرس جوړېږي او په میاشت کې دوه ځله خلک د مرادونو د غوښتنو لپاره ورباندې را ټولېږي.
د چاودنې مسئولیت تر اوسه کومې وسله والې ډلې نه دی منلی، خو په دې وروستیو کې چې په پاکستان کې د صوفیانو پر مزارونو کوم تروریستي بریدونه شوي، مسئولیت یې اکثر داعش وسله والې ډلې منلی دی.
د صوفیانو پر مزارونو دا دویم برید دی چې په روال کال کې کېږي.
په تېره فبرورۍ میاشت کې ږهم د سیند ایالت په سېوڼ شریف کې د لال شهباز قلندر پر مزار خونړی برید شوی وو چې شاخوا اتیا تنه پکې وژل شوي وو.
د یادونې وړ ده چې د پیر رکیل شاه پر همدې مزار په ۲۰۰۵مېلادي کال کې هم چاودنه شوې وه چې شااوخوا څلوېښت کسان پکې وژل شوي او تر پینځوسو زیات پکې ټپیان شوی وو.
رپوټ: بارکوال میاخېل