د افغانستان ملي دفاع وزارت وايي، ترورېزم بهرنۍ ستونزه ده ځکه هغه تروریستي ډلې چې په افغانستان کې حملې کوي، بهر مېشتې دي او په بهر کې مالي سرچینې لري.
د ملي دفاع وزارت د هغو رپوټونو په اړه په غبرګون کې دا څرګندونې کړي چې وايي، د افغانستان د جګړې په اړه د امریکا په نوې کړنلاره کې پر پاکستان د فشارونو زیاتولو ته پام شوی دی.
د افغانستان ملي دفاع وزارت وايي، د افغانستان د ستونزو د حل یوازینۍ لار پر پاکستان د فشار زیاتول او هلته د تروریستانو د ځالو او مالي سرچینو بندول دي.
د دې وزارت ویاند جنرال دولت وزیري پرون شنبه ازادي راډیو ته وویل، د افغانستان د جګړې په اړه د امریکا په کړنلاره کې دې مسئلې ته د پام هرکلی کوي.
جنرال دولت وزیري وايي:
"د افغانستان مسئله کورنۍ مسئله نهده بلکه بهرني لاسونه دي چې د تروریستانو ملاتړ کوي او هغوی تمویلوي. که د امریکا متحد ایالات او هغه ټول نور هېوادونه چې له ترورېزمه کړېږي، پر هغو استخباراتي کړیو فشار وارد کړی، زما په فکر دا مسئله حل کېږي. که د امریکا دفاع وزارت له افغانستانه بهر پر تروریستي حلقو فشار راولي نو ستونزه به ژر حل شي او د افغانستان دفاع وزارت هم لهدې اقدامه ملاتړ کوي."
واشنګټن ایکزماینر د امریکا د دفاع وزارت د یوه مهم چارواکي په حواله ویلي چې د افغانستان د جګړې په نوې ستراتيژي کې پر هغو تروریستانو تمرکز هم شامل دی چې په پاکستان کې دېره دي.
دې چارواکي له دې امله چې پر کړنلاره لا هم کار روان دی، واشنګټن ایکزماینر ته د خپل هویت د پټ پاتې کېدو په شرط ویلي چې د حقاني شبکې د ځپلو لپاره به پر پاکستان به فشار زیات شي.
د امریکا دفاع وزیر جېمز متېس تېره اوونۍ کانګرس ته وویل چې د جولای میاشتې تر نیمايي به د افغانستان د جګړې په اړه خپله کړنلاره بشپړه او اعلان کړي.
متېس افغانستان ته د ۳ او ۵ زرو ترمنځ عسکرو او پوځي سلاکارانو د استولو پر امکان هم غور کوي.
د دې ستراتيژي جزئیات لا رسماً نهدي اعلان شوي.
خو د افغانستان د دفاع وزارت سرپرست طارق شاه بهرامي پرون باور څرګند کړ چې د امریکا د دفاع وزارت په نوي ستراتیژۍ کې به د تروریستانو د مرکزونو پر ویجاړولو تمرکز وشي.
ښاغلي بهرامي خبریالانو ته وویل، متحده ایالات د افغانستان، پاکستان او ټولې سیمي په اړه خپله کړنلاره بدلوي او دی باور لري چې د ترورېزم پر اصلي مرکز به غور کوي.
د افغانستان دولت د پاکستان پر استخباراتو تور پورې کوي چې د تروریستي ډلو ملاتړ کوي او په خپله خاوره کې یې ځای ورکړی خو اسلاماباد تل د کابل داسې ادعاوې رد کړي دي.
