ورځ تر بلې مخ پر ډېرېدو تاوتریخوالي او هدفي وژنو چې مسوولیت یې هم څوک نه مني، د افغانستان د سولې لپاره د امریکا ځانګړی استازی اندېښمن کړی.
زلمي خلیلزاد دا ډول پېښې د سولې روان بهیر لپاره ګواښ بللی.
ښاغلي خلیلزاد په خپله ټویټرپاڼه لیکلي: "دا ډول قتلون او هدفي وژنې باید بندې شي. افغانان سوله غواړي او اوربند او سیاسي هوکړه بېړنۍ اړتیاوې دي. "
۵/۵ - دا هدفي وژنې او قتلونه باید بند شي. دا د سولې بهیر ګواښوي. افغانان سوله غواړي. اوربند او سیاسي جوړجاړی بیړني دي. زه له مذاکره کونکو ډلو غواړم چې خپلې هڅې دوچنده کړي. موږ مرسته کولو ته چمتو یو.
— U.S. Special Representative Zalmay Khalilzad (@US4AfghanPeace) December 24, 2020
زلمي خلیلزاد پر افغان حکومت او طالبانو غږ کړی چې اوربند او سیاسي هوکړې ته د رسېدو لپاره خپلې هڅې دوه برابره کړي او دوی هم چمتو دي چې په دې برخه کې مرسته وکړي.
په ښکاره زلمي خلیلزاد دا څرګندونې په کابل کې د افغانستان د ازادو او عادلانه ټاکنو د اجرائیه رئیس یوسف رشید او په کاپیسا کې د مدني فعالې فرشته کوهستانۍ له وژنو وروسته کړي.
۳/۵- د یوسف او فرشتې په څیر کسان د هرې ټولنې لپاره اړین دي. دوی د ټولنې وجدان په څیر دي او د ټولنې زړه ژوندی ساتي. دوی باید ویره ونه لري، ونه ګواښول شي، یا تر دې بدتره، ونه وژل شي.
— U.S. Special Representative Zalmay Khalilzad (@US4AfghanPeace) December 24, 2020
که څه هم د دې وژنو مسوولیت څوک نه مني، خو افغان حکومت یې تر ډېره پړه پر وسلهوالو طالبانو اچوي، ولې طالبان دا ادعا ردوي.
د تاوتریخوالي د پای ته رسېدو او یوې سیاسي هوکړې ته د لاسرسي غوښتنه یوازې د امریکا په ځانګړي استازي پورې محدوده نه ده، بلکې تازه د اندونیزیا پخواني مرستیال ولسمشر او د محمدیه علماوو سازمان رئیس یوسف کالا هم له ولسمشر غني سره په کتنه کې له طالبانو د تاوتریخوالي پای ته رسول غوښتي.
ولسمشرۍ ماڼۍ وايي، له ولسمشر محمد اشرف غني سره په کتنه کې ښاغلي کالا ویلي، اندونیزیا غواړي د یوه ستر اسلامي هېواد په توګه د افغانستان د سولې په پروسه مرسته او همکاري وکړي.
د ولسمشر د ویاند مرستیال دواخان مینهپال ازادي راډیو ته وویل، یوسف کالا همدا ډول دغه شان د سولې خبرو د کوربهتوب او په اندونیزیا کې د افغانستان د سولې په اړه د نړۍ د عالمانو کنفرانس جوړېدو ته چمتووالی ښودلی.
دی وايي: "دوی په اندونیزیا کې د اسلامي نړۍ د علماوو په ګډون د یوه کنفرانس د جوړېدو لپاره چې د افغانستان د سولې بحث او خبرې وکړي، چمتووالی وښود او زیاته یې کړه، اندونیزیا چمتو ده چې د سولې خبرو د یوه پړاو کوربهتوب وکړي. "
د محمدیه علماوو سازمان رئیس د ملي مصالحې عالي شورا له رئیس سره په کتنه کې د افغان حکومت او طالبانو ترمنځ د سولې خبرو د منځګړتوب غوښتنه هم کړې.
په کابل کې د ملي مصالحې د عالي شورا له غړو سره د اندونیزیا د پخواني مرستیال ولسمشر او د محمدیه د علماوو سازمان رئیس یوسف کالا لیدنه
که څه هم افغان حکومت په دې اړه څه نه وايي، خو طالبان بیا وايي، ټولو هغو هڅو ته د قدر په نظر ګوري چې له مخې یې د افغانستان ستونزه پای ته ورسېږي.
په قطر کې د طالبانو د سیاسي دفتر ویاند محمد نعیم ازادي راډیو ته په رالېږلي پیغام کې لیکلي: "اندونیزیا یو مهم او پر نفوسه اسلامي هېواد دی او دوی ورسره نږدې او ښې اړیکې لري، خو د مذاکراتو لپاره د ځای ټاکل د دواړو ټیمونو په هوکړه ټاکل کېږي. "
اوربند او سیاسي هوکړه بېړنۍ اړتیاوې دي، ځکه افغانان سوله غواړي.
د تاوتریخوالي د پای او اوربند غوښتنه داسې مهال مطرح کېږي چې تمه ده ۱۰ ورځې وروسته د افغانستان دولت او طالبانو پلاوي بیا سره په دوحه کې د سولې خبرې پیل کړي.
هغه خبرې چې دواړه لوري یې مهمې او د سولې خبرو اصلي منځپانګه بولي، خو له دې ټولو سره-سره په افغانستان کې جګړې زور اخېستی او ورځ تر بلې د نامعلومه کسانو لهخوا د افغانستان مطرح څېرې، خبریالان او مدني فعالان په نښه کېږي، هغه پېښې چې په ځان پسې ډېر اندېښنې او شکونه زېږوي.