د غزې تړانګې له خان یونس ښارګوټي وروستي اسراییلي سرتېري ووتل او په سیمه کې د سخت دریځې حماس ډلې چې متحده ایالات او اروپایي ټولنه یې ترهګره ډله ګڼي، پر وړاندې د ځمکنیو عملیاتو یوه حساسه مرحله بشپړه شوه.
د اسوشیتید پرس خبري اژانس د راپور له مخې، د اسراییل پوځي چارواکو وویل چې ځواکونه یوازې ځانونه سره منسجم کوي ځکه پوځ د حماس بل مرکزرفح ته د ننوتو لپاره چمتووالی نیسي.
اسراییل له اوونیو راهیسې ژمنه کړې چې د غزي په جنوبي ښارګوټي رفح کې به چې د کلابندې شوې غزې نیمایي نفوس یعنې شاوخوا ۱،۴ ملیونه کسانو پکې پناه اخیستې، ځمکني عملیات پیل کړي.
په دې سیمه کې د اسراییل د پوځي عملیاتو پرپلان نړیوالو جدي اندېښنه ښکاره کړې او د اسراییل نژدې متحد، متحدو ایالتونو هم د ولسي وګړو د خوندیتوب لپاره د یوه باوري پلان غوښتنه کړې ده.
د اسراییل صدراعظم بنیا مین نتنیاهو د دوشنبې په ورځ وویل چې پر رفح ښارګوتي د پوځي عملیاتو لپاره نېټه مشخصه شوې ده.
اسراییل دا سیمه د حماس ډلې وروستی پیاوړی مرکز بولي.
د فرانسپرس خبري اژانس د راپور له مخې، ښاغلي نتنیاهو نه دي ویلي چې دغه عملیات به کله پیلیږ؛خو هغه ټینګار وکړ چې پر سخت دریځي حماس ډلې د بري لپاره اړتیا ده چې ځواکونه یې رفح ته داخل شي او په سیمه کې د ده په وینا د ترهګرو کنډکونه له مینځه یوسي.
نتنیاهو په یوه ویډیویي بیان کې ټینګار وکړ چې دا کار به وشي او د پوځي عملیاتو لپاره نېټه ټاکل شوې ده.
د اسراییل صدراعظم داسې مهال دغه څرګندونې وکړې چې د مصر په پلازمېنه قاهره کې، په غزه کې د یوه اوربند لپاره د نړیوالو هڅو په ترڅ کې مرکچیان له حماس سره د یوه اوربند پر سر خبرې مخ ته وړي.
د رویترز د راپورله مخې، د حماس یوه چارواکي د خپل نوم نه ښودلو په شرط د دوشنبې په ورځ وویل چې د قاهرې په نوي پړاو خبرو کې په غزه کې د اوربند د ټینګیدو په برخه کې هیڅ پرمختګ نه دی شوی.
هغه ویلي چې د اسراییل په دریځ کې بدلون نه دی راغلی نو ځکه د قاهرې په خبرو کې نوي څه نشته.
په واشنګټن کې د امریکا د ملي امنیت د شورا ویاند جان کربي وویل چې متحده ایالات هیله من دی چې هرڅومره ژر چې کېدای شي د یرغملو د خلاصون لپاره له حماس سره یوجوړجاړی وشي، چې هغه به په سیمه کې د شپږو اوونیو لپاره یوه اوربند ته هم لاره هواره کړي.
د غزې د روغتیایي چارواکو په وینا ،په روانه جګړه کې ۳۳ زره او ۲۰۰ کسان وژل شوي او نژدې ۷۶ زره نور ټپیان شوي دي.
د راپور له مخې، د حماس ترکنټرول لاندې د روغتیا وزارت د ولسي وګړو او وسله والو ترمنځ توپیرنه کوي، خو وایي چې د وژل شویو دوه پر درېیمه برخه یې ښځې او ماشومان دي.
په غزه کې د اسراییل له لوري پوځي عملیات وروسته له هغې پیل شول چې د حماس وسله والو د تیرکال د اوکتوبرپراومه نیټه د اسراییل پر قلمرو په برید کې شاوخوا ۱۲۰۰ کسان ووژل او شاوخوا دوه نیم سوه نور یې یرغمل کړل.
