د لاسرسۍ وړ لېنکونه

تازه خبر
شنبه ۱۲ کب ۱۴۰۲ کابل ۰۲:۰۷

د ژولیا پارسي د خوشې کېدو هرکلی او د نورو فعالانو پر خلاصون ټینګار


ښځینه فعاله ژولیا پارسي چې طالبانو بندي کړې وه او بېرته یې خوشې کړه
ښځینه فعاله ژولیا پارسي چې طالبانو بندي کړې وه او بېرته یې خوشې کړه

د طالبانو له زندانه د ښځو د حقونو د دوو فعالانو له ازادۍ وروسته، د بشري حقونو یو شمېر ملاتړي بنسټونه غوښتنه کوي چې له طالبانو سره زنداني نور فعالان او فعالانې دې هم خوشې شي.

دا غوښتنه داسې مهال کېږي چې د ښځو د حقونو فعاله ژولیا پارسي د طالبانو په زندان کې له درې میاشتنې بند وروسته د دوشنبې په ورځ خوشې شوه. ندا پرواني بیا د تېرې پنج‌شنبې په ورځ د طالبانو له بنده ازاده شوې وه.

اوس د بښنې نړیوال سازمان وايي، د ښځو د حقونو د دې دوو فعالانو له خوشې کېدو پرته، منیژه صدیقي او پریسا ازاده لا هم د طالبانو په قید کې دي.

سمیرا حمیدی، د بښنې نړیوال سازمان غړې
سمیرا حمیدی، د بښنې نړیوال سازمان غړې

د دې سازمان د جنوبي اسیا څانګې کمپاینرې د دوشنبې په ورځ په خپله ایکس‌پاڼه غوښتنه کړې چې د بشري حقونو د فعالانو د ازادۍ لپاره په ګډه کار او فشار راوړلو ته دوام ورکړي.

د بشري حقونو یو بل ملاتړي سازمان فریډم نو بیا په خپله ایکس‌پاڼه د طالبانو له زندانه د ژولیا پارسي د ازادۍ هرکلی کړی او هر څه ژر یې د پریسا ازاده، منیژې صدیقي او ټولو هغو خبریالانو او فعالانو د خلاصون غوښتنه کړې چې د طالبانو له‌خوا په خپل‌سري ډول نیول شوي دي.

راپورونه وايي چې د ښځو د حقونو فعالانې او معترضینې پریسا ازاده او منیژه صدیقي له دوو میاشتو را پدېخوا د طالبانو په زندانونو کې دي او تر څنګ یې یو شمېر خبریالان او فعالان هم له طالبانو سره بندیان دي.

د طالبانو حکومت تر اوسه د معترضو ښځو او نورو فعالانو د نیولو لامل نه‌دی ښودلی، خو د یو شمېر خبریالانو د نیولو په اړه یې ادعا کړې چې دوی د ځینو نورو لاملونو پر بنسټ نیول شوي دي.

په ورته وخت کې د شنبه‌های ارغواني غورځنګ وايي، د طالبانو په زندان کې پراته فعالان د عدالت غوښتنې له امله زنداني شوي دي.

د دې غورځنګ مشرې مریم معروف اروین ازادي راډیو ته وویل:

"دا بسنه نه‌کوي، موږ هر څه ژر د ټولو هغو معترضو ښځو، د بشري حقونو فعالانو، مدني فعالانو، خبریالانو، د پوهنتون استادانو او مخکنیو امنيتي او دفاعي ځواکونو د ازادۍ غوښتنه کوو چې د حق، عدالت او ازادۍ غوښتنې له امله د طالبانو په زندانونو کې دي. "

له دې وړاندې د افغانستان لپاره د ملګرو ملتونو د بشري حقونو شورا ځانګړی راپور ورکوونکي ریچارډ بنیټ د بشري حقونو د فعالانو په ګډون د طالبانو په زندانونو کې د مخکنیو افغان امنیتي او دفاعي ځواکونو، خبریالانو، مدني فعالانو، دولتي کارکوونکو او د غیردولتي موسسو د استازو د ازادۍ غوښتنه کړې وه.

طالبانو د خپلې دویمې ځلي واکمنۍ له پیل راهیسې، د معترضو ښځو په ګډون چې د افغان نجونو د زده‌کړو، کار او یو شمېر نورو حقونو د خوندیتوب لپاره یې لاریونونه پیل کړل، ډېر شمېر نور فعالان هم زنداني کړل چې ډېر یې د یو څه وخت زندان تېرولو وروسته بېرته خوشې کړل.

خو تر ننه یې د خپلو دې ډول خپل‌سرو نیونو په اړه رسنیو سره دقیق معلومات او لاملونه نه‌دي شریک کړي.

د افغانستان لپاره د ملګرو ملتونو د بشري حقونو شورا ځانګړی راپور ورکوونکي ریچارډ بنیټ
د افغانستان لپاره د ملګرو ملتونو د بشري حقونو شورا ځانګړی راپور ورکوونکي ریچارډ بنیټ

له دې وړاندې د افغانستان لپاره د ملګرو ملتونو د بشري حقونو شورا ځانګړی راپور ورکوونکي ریچارډ بنیټ د بشري حقونو د فعالانو په ګډون د طالبانو په زندانونو کې د مخکنیو افغان امنیتي او دفاعي ځواکونو، خبریالانو، مدني فعالانو، دولتي کارکوونکو او د غیردولتي موسسو د استازو د ازادۍ غوښتنه کړې وه.

طالبانو د خپلې دویمې ځلي واکمنۍ له پیل راهیسې، د معترضو ښځو په ګډون چې د افغان نجونو د زده‌کړو، کار او یو شمېر نورو حقونو د خوندیتوب لپاره یې لاریونونه پیل کړل، ډېر شمېر نور فعالان هم زنداني کړل چې ډېر یې د یو څه وخت زندان تېرولو وروسته بېرته خوشې کړل.

خو تر ننه یې د خپلو دې ډول خپل‌سرو نیونو په اړه رسنیو سره دقیق معلومات او لاملونه نه‌دي شریک کړي.

اړوند مطالب

XS
SM
MD
LG