د افغانستان د خبریالانو د ملاتړ سازمان وایي، چې د طالبانو په حکومت کې د افغانستان په یو ویشت ولایتونو کې ښځینه خبریالانې د فعالیت حق نه لري.
د دې سازمان په وینا ،له شپږ ولایتونو پرته ښځینه خبریالانې په نورو ولایتونو کې په خبرې غونډو کې برخه نه شي اخیستلی.
سرچینه زیاتوي، چې د اوس لپاره په افغانستان کې یوازې دوه سوه څلور اتیا خبریالانې له رسنیو سره کار کوي.
د دې سازمان مشر حامد عبیدي په یوه پیغام کې چې ازادي راډیو ته یې رااستولی دی، وايي چې په تیرو دوو لسیزو کې په افغانستان کې د بیان ازادي او د ښځینه خبریالانو کار له لویو لاسته راوړنو څخه وو، خو اوس دا هڅې د له منځه تلو په حال کې دي.
عبیدي وایي:
" د جمهوریت په شل کلنه دوره کې په رسنیو کې د ښځینه خبریالانو حضور زیات شو او په سلګونو خبریالانې په دندو بوختې وې ان تر دې چې تر مدیریتي کچې یې فعالیت کاوه، خو له بده مرغه د طالبانو له واکمنیدو سره سم په رسنیو کې د ښځینه خبریالانو شمیر کم شو، ښځینه خبریالانې اطلاعاتو ته لاس رسی نه لري، مطبوعاتي کنفرانسونو کې ګډون نه شي کولی او د دوی ټولې خپرونې تر سانسور او مونټور لاندې دي"
د افغانستان د خبریالانو د ملاتړ سازمان په یوه مفصل راپور کې، چې د جمعې په ورځ یې خپور کړ، ویلي دي چې د امنیتي ګواښونو او اقتصادي ستونزو له امله په کابل او ولایتونو کې نژدې نهه سوه خبریالانې بیکاره شوې دي.
په دې راپور کې وړاندې راغلې دي، چې په دوه زره دوه ویشتم کال کې له ښځینه خبریالانو سره د خشونت پنځه ویشت پيښې ثبت شوې دي، چې په دې کې نیول، وهل، ستغې سپورې ویل او نورې غیرقانوني کړنې شاملې دي.
د افغانستان د ازادو خبریالانو ټولنې هم په خپلې تازه سروې کې ویلي دي، چې د تېرو دوو کلونو په ترڅ کې د اقتصادي ستونزو له امله د شپږ سوه رسنیو له ډلې دوه سوه دیارلس رسنۍ بندې شوې دي.
د دې ټولنې په وینا، د اوس لپاره لس خبریالان له طالبانو سره زنداني دي او په ټوله کې د دوو کلونو په ترڅ کې له خبریالانو سره دوه سوه څوارلس ځله د تاوتریخوالي پیښې ثبت شوې دي.
د راپورونو له مخې، د طالبانو تر واکمنۍ مخکې تر یوزر څلور سوه ډیرو ښځینه خبریالانو په افغانستان کې له رسنیو سره کار کاوه.
طالبانو پروسږکال د ډسمبر په میاشت کې د ازادي راډیو او امریکا غږ منځنۍ څپې او ایف ایم څپې بندې کړې، چې بیا ازادي راډیو د نوې ټکنالوژۍ په وسیله خپلې خپرونې د دولس ساعته په ځای څلرویشت ساعته کړې.
